Egibiti sunɔ u dosɑ
41
1 Wɔ̃ɔ yirun biru Egibiti sunɔn tii u dosɑ. Wee u yɔ̃ dɑru bɔ̃ɔwɔ. 2 Yerɑ nɑɑ mɛro burɛ nɔɔbɑ yiru yi yi bɔɔru yi yɑrimɑ dɑɑrun di yi dimɔ dɑru bɔ̃ɔwɔ. 3 Mɑ nɛɛ nɔɔbɑ yiru gɛɛ mɑɑ yɑrimɑ dɑɑrun di yi yi woore yi ǹ wɑɑbu wɑ̃, yi yɔ̃rɑ yiɔnɔn bɔkuɔ dɑru bɔ̃ɔ mi. 4 Mɑ yi nɛɛ burɛ yi yi bɔɔru mwɛ. Mɑ u dom yɑndɑ.
5 U kpɑm dweeyɑ mɑ u dosɑ nɔn mɛɛruse. Wee, doo gɑ̃ɑ teeru sɔɔ, u doo wii geenu nɔɔbɑ yiru wɑ ni nu bɛm mɔ swɛɛ swɛɛ. 6 Mɑ doo winu nɔɔbɑ yiru gɑnu nu mɑɑ yɑrɑ niɔnɔn temɔ, ni nu sɑkosu sɑ̃ɑ nu gbere sɔ̃ɔ kɑ woon sɔ̃. 7 Doo wii sɑko si, su doo wii geenu mwɛ mwɛ. Mɑ u dom yɑndɑ u deemɑ u dosɑwɑ.
8 Ye n kuɑ bururu win bwɛ̃rɑ kun kpunɛ. U sɔrobu kɑ bwisigibu kpuro sokɑ be bɑ wɑ̃ɑ Egibitiɔ. U bu win dosu si kpuro sɑɑriɑ. Adɑmɑ bɑɑ ben turo kun kpĩɑ u nùn dosu si tubusie.
9 Sɑɑ ye sɔɔrɑ win nɔri wɛ̃ɔ wi, u nùn sɔ̃ɔwɑ u nɛɛ, gisɔrɑ nɑ yɑɑyɑ mɑ nɑ torɑ. 10 Sɑnɑm mɛ ɑ mɔru kuɑ kɑ bɛsɛ wunɛn sɔm kowobu, mɑ ɑ derɑ bɑ sun kpɛ̃ɛ nɛ kɑ pɛ̃ɛ kowobun wirugii pirisɔm kɔ̃sobun wirugiin dirɔ, 11 bɛsɛ yiru ye, sɑ dosɑ wɔ̃ku teeru. Mɑ bɛsɛn bɑɑwure u win dosun tubusiɑnu nuɑ nge mɛ u dosɑ. 12 N deemɑ bɛsɛ kɑ Heberu bii goowɑ sɑ wɑ̃ɑ mi, wi u sɑ̃ɑ pirisɔm kɔ̃sobun wirugiin yoo. Ye sɑ nùn bɛsɛn dosu si sɑɑriɑ, yerɑ u sun si tubusiɑ. 13 Mɑ n kuɑ nge mɛ u bɑɑwure tubusiɑ. A mɑn wesiɑ nɛn sɔmburu sɔɔ, mɑ ɑ derɑ bɑ pɛ̃ɛ kowobun wirugii wi sɑ̃ɑrusiɑ.
Yosɛfu u Egibiti sunɔn
dosusu tubusiɑ
14 Ye Egibiti sunɔ u nuɑ mɛ, u Yosɛfu sokusiɑ. Mii mii bɑ nùn yɑrɑmɑ pirisɔm dirun di, u win toburu kɔnɑ kɑ win bɑɑ sɑnsu u yɑ̃nu kɔsɑ, mɑ u seewɑ u dɑ sunɔ win mi. 15 Sunɔ u nùn sɔ̃ɔwɑ u nɛɛ, nɑ dosɑ. Goo kun kpĩɑ u mɑn dosu ge tubusie. Nɑ mɑɑ nuɑ ɑ rɑ dosu tubusie bɑ̀ n nun gu sɔ̃ɔwɑ.
16 Mɑ Yosɛfu u nùn wisɑ u nɛɛ, n ǹ nɛ, Gusunɔwɑ u koo nun ge tubusiɑ n dorɑ.
17 Mɑ sunɔ u nɛɛ, wee, nɛn dosu sɔɔ nɑ yɔ̃ dɑru bɔ̃ɔwɔ. 18 Yerɑ nɑɑ mɛro burɛ nɔɔbɑ yiru yi yi bɔɔru yi yɑrimɑ dɑɑrun di yi dimɔ dɑru bɔ̃ɔwɔ. 19 Mɑ nɛɛ nɔɔbɑ yiru gɛɛ mɑɑ yɑrimɑ dɑɑrun di yi yi woore yi ǹ wɑɑbu wɑ̃. Nɑ ǹ nɑɑ kɔ̃simii nin bweseru wɑɑre Egibitin tem kpuro sɔɔ. 20 Nɛɛ yi, yi nɛɛ gbiikii nɔɔbɑ yiru yi yi bɔɔru mi mwɛ. 21 Adɑmɑ ye yi yi mwɛ mɛ, ɑ ǹ kɑɑ n mɑm yɛ̃ nge yi gɑ̃ɑnu mwɛ. Domi mɛ yi woore yellun di, mɛyɑ yi woore mi. Mɑ nɑ dom yɑndɑ. 22 Yen biru nɑ kpɑm dosɑ nɑ doo gɑ̃ɑ teeru sɔɔ doo wii geenu nɔɔbɑ yiru wɑ ni nu bɛm mɔ swɛɛ swɛɛ. 23 Mɑ doo winu nɔɔbɑ yiru gɑnu nu mɑɑ yɑrɑ niɔnɔn temɔ ni nu sɑkosu sɑ̃ɑ nu gbere sɔ̃ɔ kɑ woon sɔ̃. 24 Doo wii sɑko si, su doo wii gee ni mwɛ mwɛ. Nɑ dosu ge nɛn sɔrobu sɑɑriɑ ɑdɑmɑ ben goo kun mɑn gu tubusie.
25 Yosɛfu u nùn sɔ̃ɔwɑ u nɛɛ, gɑ̃ɑ teenɑ ɑ dosɑ. Gusunɔwɑ u nun sɔ̃ɔsi ye u koo ko. 26 Nɑɑ mɛro burɛ nɔɔbɑ yiru ye, kɑ doo wii geenu nɔɔbɑ yiru ye, wɔ̃ɔ nɔɔbɑ yiruwɑ. Ye kpuro yɑ sɑ̃ɑwɑ dosu teu. 27 Nɛɛ nɔɔbɑ yiru yi yi woore yi ǹ wɑɑbu wɑ̃ mi, yi yi yɑrɑ yiɔnɔn biruɔ, kɑ doo wii sɑkosu nɔɔbɑ yiru si su gbere sɔ̃ɔ kɑ woon sɔ̃ mi, nu sɑ̃ɑwɑ wɔ̃ɔ nɔɔbɑ yiru yè sɔɔ gɔ̃ɔrɑ ko n wɑ̃ɑ. 28 Gusunɔwɑ nun sɔ̃ɔsi ye u koo ko nge mɛ nɑ rɑɑ nun sɔ̃ɔwɑ, sunɔ. 29 N wee, wɔ̃ɔ nɔɔbɑ yiru sɔɔ, deburɑ ko n wɑ̃ɑ Egibitin tem kpuro sɔɔ. 30-31 Adɑmɑ yen biru gɔ̃ɔrɑ koo tem mɛ kpuro wɔri wɔ̃ɔ nɔɔbɑ yiru kpɑ tu kpɛ̃ɑ gem kɑ tiɑ sere bɑ ǹ koo mɑɑ debu ten yirɑ wɑ. 32 Ye ɑ kɑ dosu ge kuɑ nɔn mɛɛru, Gusunɔ u kĩ ɑ n yɛ̃ mɑ yɑ koo koorɑwɑ yɑ ǹ mɑɑ tɛɛmɔ. 33 Tɛ̃, sunɔ, n weenɛ ɑ bwisigii goo kɑsu wi u lɑsɑbu mɔ, kpɑ ɑ nùn ko Egibitin wirugii. 34 Kpɑ ɑ mɑɑ tɔmbu gɑbu wunɑ be bɑ koo deburun sɑɑn dĩɑnu kpuro bɔnu ko subɑ nɔɔbu kpɑ bu nin sube teeru mwɑ bɑɑwuren mi. 35 Kpɑ bu dĩɑ ni kpuro mɛnnɑ kɑ wunɛn yiiko bu doo bɔkunu bere birɑnu sɔɔ wuu bɑɑgeren sɔ̃ kpɑ bɑ n nu kɔ̃su. 36 Niyɑ nu ko n beruɑ tɔmbun sɔ̃ bɑ n kɑ gɔ̃ɔrun wɔ̃ɔ nɔɔbɑ yiru ye mɑrɑ ye yɑ wee tem mɛ sɔɔ, kpɑ tu ku rɑɑ kɑ tɔmbu kpuro go.
Bɑ Yosɛfu kuɑ
Egibitin wirugii
37 Mɑ Yosɛfun gɑri yi, yi Egibiti sunɔ dore kɑ win sinɑ ɑsɑkpɔbu kpuro. 38 Yerɑ u bu bikiɑ u nɛɛ, mɑnɑ sɑ ko mɑɑ tɔnu wɑ wi u Gusunɔn Hunde mɔ nge wini.
39 Mɑ u Yosɛfu sɔ̃ɔwɑ u nɛɛ, nge mɛ Gusunɔ u nun ye kpuro sɔ̃ɔsi, goo mɑɑ sɑri wi u bwisi kɑ lɑsɑbu mɔ nge wunɛ. 40 Kon nun ko nɛn yɛnu yɛ̃ro. Nɛn tɔmbu kpuro bɑ koo wunɛn gɑri mɛm nɔɔwɑ. Nɛn sinɑ gɔnɑ tɔnɑwɑ ko nɑ n kɑ nun kere. 41 U mɑɑ nɛɛ, wee, nɑ nun kuɑ Egibitin tem kpuron wirugii.
42 Yerɑ u win tɑɑbu ge gɑ win yĩreru mɔ potɑ win nɔmun di u Yosɛfu dokeɑ win nɔmuɔ. Mɑ u nùn yɑ̃ɑ burɑnu sebusiɑ. Yen biru u nùn yɔni wurɑgii dokeɑ wĩirɔ. 43 Mɑ u derɑ bɑ nùn yɔɔsiɑ kɛkɛ sɔɔ ye dumi gɑwe yɑ wigiɑ swĩi. Gɑbɑ nùn gbiiye bɑ mɔ̀, i yiiro i yiiro. Nge mɛyɑ Egibiti sunɔ u kɑ Yosɛfu kuɑ tem mɛ kpuron wirugii.
44 Mɑ u kpɑm nùn sɔ̃ɔwɑ u nɛɛ, nɛ Egibiti sunɔ, nɛnɑ nɑ geruɑ, Egibitin tem kpuro sɔɔ, goo kun kpɛ̃ u gɑ̃ɑnu ko mɑ n kun mɔ kɑ wunɛn woodɑ.
45-46 Mɑ u Yosɛfu yĩsiru kɑ̃ Sɑfenɑti Pɑniɑki te tɑ sɑ̃ɑ be Egibitigibun yĩsiru. Mɑ u nùn Potiferɑn bii Asinɑti kɑ̃ kurɔ. Potiferɑ wi, u sɑ̃ɑwɑ wuu ge bɑ mɔ̀ Onin yɑ̃ku kowo. Yosɛfu u mɔwɑ wɔ̃ɔ tɛnɑ sɑnɑm mɛ Egibiti sunɔ u nùn kuɑ wirugii.
Mɑ Yosɛfu u doonɑ u dɑ u Egibitin tem kpuro berɑ. 47 Deburun wɔ̃ɔ nɔɔbɑ yiru ye sɔɔ, tem mu dĩɑnu kuɑ gem gem. 48 Yerɑ Yosɛfu u wuu bɑɑgeren gbeɑn dĩɑnu mɛnnɑ wɔ̃ɔ nɔɔbɑ yiru ye sɔɔ, u nu beruɑ wuu gen birɑnu sɔɔ. 49 Dĩɑ ni u mɛnnɑ mi, nin kpɑ̃ɑrɑ bɑndɑ sere bɑ ǹ kpɛ̃ bu nin geeru giɑ. Nu sɑ̃ɑwɑ nge yɑni sɛɛri.
50 Gɔ̃ɔ ten sɑɑ yu sere nɑ, Asinɑti, Potiferɑn bii u Yosɛfu bii tɔn durɔbu yiru mɑruɑ. 51 Yen gbiikoowɑ Yosɛfu u yĩsiru kɑ̃ Mɑnɑse, u nɛɛ, domi Gusunɔ u derɑ nɑ nɛn wɑhɑlɑ kpuro duɑri kɑ mɑɑ nɛn bɑɑn yɛnu kpuro. 52 Mɑ u yiruse yĩsiru kɑ̃ Efɑrɑimu, u nɛɛ, domi Gusunɔ u derɑ nɑ mɑrɑ tem mi nɑ nɔni swɑ̃ɑru wɑ.
53 Sɑnɑm dɔɔ sɑnɑm wee, debu bɑkɑ ten wɔ̃ɔ nɔɔbɑ yiru yen bɑɑ doonɑ Egibitin temɔ. 54 Mɑ wɔ̃ɔ nɔɔbɑ yiru gɔ̃ɔrugiɑ yɑ tunumɑ nge mɛ Yosɛfu u rɑɑ geruɑ. Gɔ̃ɔ te, tɑ tem bɑɑmɑ kpuro nɛnuɑ, mɑ n kun mɔ Egibitin tem tɔnɑ sɔɔ mi dĩɑnu wɑ̃ɑ. 55 Adɑmɑ ye gɔ̃ɔrɑ rɑ duɑ mi, tɔmbɑ Egibiti sunɔ wuri koosimɔ bu kɑ dĩɑnu wɑn sɔ̃. Mɑ u bu sɔ̃ɔwɑ u nɛɛ, bu doo Yosɛfun mi, kpɑ bu ko ye u koo bu sɔ̃. 56 Ye Yosɛfu u wɑ gɔ̃ɔrɑ tem mɛ kpuro nɛnuɑ, yerɑ u birɑ ni kpuro wukiɑ u tɔmbu dĩɑnu dɔremɔ. Gɔ̃ɔ te, tɑ kpɛ̃ɑmɔ. 57 Mɑ tɔmbɑ nɑɑmɔ Egibitiɔ tem kpuron di bu kɑ dĩɑnu dwe Yosɛfun mi, domi gɔ̃ɔ te, tɑ tem kpuro nɛni gem gem.