40
1 Yebɑ kpuron biru Egibiti sunɔn sɔm kowobun wirugibu yiru bɑ nùn torɑri. Turo u sɑ̃ɑ pɛ̃ɛ kowobun wirugii, turo mɑɑ wi u rɑ nùn nɔrɑ wɛ̃. 2 Mɑ u kɑ be yiru ye mɔru bɑrɑ. 3 U bu doke pirisɔm kɔ̃sobun wirugiin dirɔ mi bɑ Yosɛfu kɛnuɑ. 4 Pirisɔm kɔ̃sobun wirugii wi, u bu Yosɛfu nɔmu sɔndiɑ u n bu sɔmburu kuɑmmɛ. Mɑ bɑ sɔ̃ɔ mɛɛru kuɑ pirisɔm diru mi.
Yosɛfu u dosusu tubusiɑ pirisɔm dirɔ
5 Yerɑ wɔ̃kuru gɑru be yiru ye, bɑ dosɑ pirisɔm diru mi. Ben bɑɑwure kɑ wiguu kɑ gen tubusiɑnu nɛnɛm. 6 Ye Yosɛfu u nɑ ben mi bururu u bu mɛɛrɑ, yerɑ u deemɑ ben nuki sɑnkire. 7 Mɑ u bu bikiɑ u nɛɛ, ɑmɔnɑ bɛɛn wuswɑɑ kɑ burisinɛ mɛ gisɔ.
8 Bɑ nùn wisɑ bɑ nɛɛ, sɑ dosɑwɑ. Goo mɑɑ sɑri wi u koo sun dosu si tubusiɑ.
Yosɛfu u bu sɔ̃ɔwɑ u nɛɛ, n ǹ Gusunɔwɑ u rɑ n gɑ̃ɑnu kpuron tubusiɑnu yɛ̃? Ǹ n mɛn nɑ, i mɑn bɛɛn dosu si sɑɑrio.
9-10 Mɑ wi u rɑ Egibiti sunɔ tɑm nɔrɑ wɛ̃, u win dosu Yosɛfu sɑɑriɑ u nɛɛ, nɛn dosu sɔɔ wee, nɑ resɛm dɑ̃ru wɑ nɛn wuswɑɑɔ tɑ kpiɑ. Dɑ̃ɑ te, tɑ kɑ̃ɑsi itɑ mɔ. Mɑ tɑ wɛ̃su kuɑ tɑ binu mɑrɑ nu ye. 11 N deemɑ nɑ Egibiti sunɔn nɔrɑ nɛni nɛn nɔmuɔ. Nɑ resɛm ye wɔkɑ nɑ gɑmɛ nɔrɑ ye sɔɔ. Mɑ nɑ ye suɑ nɑ nùn wɛ̃.
12 Mɑ Yosɛfu u nùn sɔ̃ɔwɑ u nɛɛ, dosu gen tubusiɑnu wee. Kɑ̃ɑsi itɑ ye, sɔ̃ɔ itɑwɑ mi. 13 N tie sɔ̃ɔ itɑ sunɔ u kɑ nun yɑrɑ pirisɔm di kpɑ u nun wesiɑ wunɛn sɔmburu sɔɔ. Kɑɑ kpɑm nùn win nɔrɑ wɛ̃ nge mɛ ɑ rɑ rɑɑ ko sɑnɑm mɛ ɑ sɑ̃ɑ win sɔm kowo. 14 Adɑmɑ ɑ n mɑn yɑɑye sɑnɑm mɛ ɑ doo nɔɔru wɔri. Nɑ nun kɑnɑmɔ, ɑ mɑn durom kuo ɑ sunɔ nɛn gɑri sɔ̃ kpɑ ɑ mɑn yɑrɑ dii tenin di. 15 Domi bɑ mɑn gbɛnɑwɑ sɑɑ Heberubɑn tem di, bɑ kɑ mɑn nɑ mini. Yen biru nɑ ǹ mɑɑ gɑ̃ɑnu kue bɑ kɑ mɑn kpɛ̃ɛmɑ pirisɔm diru mi.
16 Ye pɛ̃ɛ kowobun wirugii wi, u wɑ mɑ Yosɛfu u wiɔnɔn dosu ge tubusiɑ n dorɑ, yerɑ u nɛɛ, wee, nɛn dosu sɔɔ, nɛnɑ mɑɑ birenu itɑ sɔɔwɑ nì sɔɔ bɑ rɑ pɛ̃ɛ doke. 17 Bire te tɑ wɑ̃ɑ wɔllɔ, kirɑ bwese bwesekɑwɑ wɑ̃ɑ mi, ye bɑ yeesiɑ pɛ̃ɛ doo sɔɔ. Mɑ gunɔsu kirɑ ni dimɔ bire te sɔɔ, nɛn wiru wɔllɔ.
18 Yosɛfu nùn wisɑ u nɛɛ, gen tubusiɑnu wee. Birenu itɑ ye, sɔ̃ɔ itɑwɑ mi. 19 N tie sɔ̃ɔ itɑ sunɔ u kɑ wunɛn wiru burɑ kpɑ bu nun sɑ̃ɑrusiɑ dɑ̃ɑ wɔllɔ, gunɔsu su wunɛn yɑɑ di.
20 Ye n kuɑ sɔ̃ɔ itɑ ye, Egibiti sunɔ u win mɑrubun tɔ̃ɔ bɑkɑru kuɑ. Mɑ u sɔm kowobu yiru ye yɑrɑ pirisɔm di, u bu yɔ̃rɑsiɑ win sɔm kowo be bɑ tien wuswɑɑɔ. 21 Mɑ wi u rɑ nùn nɔrɑ wɛ̃ mi, u nùn wesiɑ win sɔmburu sɔɔ. 22 Adɑmɑ bɑ pɛ̃ɛ kowobun wirugii wi sɑ̃ɑrusiɑ nge mɛ Yosɛfu u rɑɑ bu tubusiɑ. 23 Yen biru sunɔn nɔri wɛ̃ɔ wi, u Yosɛfu duɑri.