Yosɛfu u wɑ̃ɑ Potifɑɑn mi
39
1 Isimɛɛlibɑ bɑ kɑ Yosɛfu dɑ Egibitiɔ. Mɑ Potifɑɑ Egibitigii u nùn dwɑ ben mi. Potifɑɑ wi, u sɑ̃ɑwɑ Egibiti sunɔn sinɑ kpɑɑ kɔ̃sobun wirugii. 2 Yinni Gusunɔ u wɑ̃ɑ kɑ Yosɛfu, mɑ u nùn kuɑ tɔn bɑrukɑgii. U wɑ̃ɑ win yinni Egibitigiin yɛnuɔ. 3 Yinni wi, u wɑ mɑ Yinni Gusunɔ u kɑ nùn wɑ̃ɑ, mɑ u mɑɑ nùn swɑɑ kusiɑmmɛ yɑbu bɑɑyere sɔɔ ye u mɔ̀. 4 Yen sɔ̃, u kɑ nùn nɔnu geu mɛɛrɑ u nùn kuɑ win yɛnun sɔm kowobu kpuron wirugii, mɑ win ye u mɔ kpuro u nùn nɔmu sɔndiɑ. 5 Sɑɑ mìn di u Yosɛfu kuɑ win yɛnun sɔm kowobu kpuron wirugii mɑ u nùn ye u mɔ kpuro nɔmu sɔndiɑ, Yinni Gusunɔ u win yɛnu ge domɑru kuɑ kɑ ye u mɔ kpuro yɛnuɔ kɑ gberɔ. 6 Potifɑɑ wi, u ye u mɔ kpuro deri Yosɛfun nɔmɑ sɔɔ. U ǹ mɑɑ yen gɑɑn gɑri yɛ̃ mɑ n kun mɔ win dĩɑ ni u koo doke nɔɔwɔ bɑɑsi.
Yosɛfu kɑ Potifɑɑn kurɔ
N wee Yosɛfu durɔ burɔwɑ. Win wɑsi kɑ win wuswɑɑ girimɑ mɔ. 7 Yerɑ sɔ̃ɔ teeru win yinnin kurɔ u nùn nɔni girɑri mɑ u nɛɛ, ɑ de ɑ kɑ mɑn kpunɑ.
8 Adɑmɑ Yosɛfu u yinɑ. U kurɔ wi sɔ̃ɔwɑ u nɛɛ, n wee, nɛn yinni u ǹ yɛnun gɑ̃ɑnun gɑri yɛ̃. Win ye u mɔ kpuro, nɛnɑ u nɔmu sɔndiɑ. 9 U ǹ mɑn dɑm kere yɛnu ge sɔɔ, u ǹ mɑɑ mɑn gɑ̃ɑnu yinɑri mɑ n kun mɔ wunɛ tɔnɑ yèn sɔ̃ ɑ sɑ̃ɑ win kurɔ. Yerɑ kon gɑ̃ɑ ninin bweseru ko kpɑ n Gusunɔ torɑri?
10 Bɑɑdommɑwɑ kurɔ wi, u rɑ n kɑ nùn gɑri yi mɔ̀. Kɑ mɛ, Yosɛfu u yinɑ u kɑ nùn kpunɑ. U ku rɑ mɑm kɑ̃ bɑ n wɑ̃ɑ sɑnnu.
11 Sɔ̃ɔ teeru Yosɛfu u duɑ dirɔ u kɑ win sɔmburu ko. N deemɑ yɛnu gen tɔnu goo sɑri turuku. 12 Yerɑ kurɔ wi, u Yosɛfun bekuru nɛnuɑ u nɛɛ, ɑ kɑ mɑn kpunɔ.
Yosɛfu u nùn beku te deriɑ u dukɑ yɑrɑ tɔɔwɔ. 13 Ye kurɔ wi, u wɑ mɑ u nùn beku te deriɑ u dukɑ yɑrɑ tɔɔwɔ, 14 yerɑ u win yɛnugibu sokɑ u nɛɛ, i nɑ i wɑ. Heberu wi nɛn durɔ kɑ nɑ u sun kɑm mɛɛrɑ. U kĩ u kɑ mɑn kpunɑ ɑdɑmɑ nɑ wurɑ kuɑ tɑ̃ɑ tɑ̃ɑ. 15 Ye u nuɑ nɑ wurɑ kuɑ mɛ, u mɑn win bekuru deriɑ u dukɑ yɑrɑ tɔɔwɔ.
16 Mɑ kurɔ wi, u beku te yii yeru kuɑ sere win yinni u kɑ wurɑmɑ yɛnuɔ. 17 Sɑnɑm mɛ u wurɑmɑ mi, kurɔ wi, u nùn sɔ̃ɔwɑ u nɛɛ, yoo Heberu wi ɑ kɑ sun nɑɑwɑ mi, u mɑn duwi u kɑ mɑn sɑnku. 18 Ye nɑ wurɑ kuɑ, yerɑ u mɑn win bekuru deriɑ u dukɑ yɑrɑ tɔɔwɔ.
19 Ye durɔ wi, u win kurɔn gɑri yi nuɑ, yerɑ u mɔru bɛsirɑ. 20 Mɑ u Yosɛfu suɑ u doke pirisɔm dirɔ mi bɑ rɑ sunɔn pirisɔmbɑ doke.
Bɑ Yosɛfu pirisɔm kpɛ̃ɛ
Miyɑ u wɑ̃ɑ. 21 Adɑmɑ Yinni Gusunɔ u wɑ̃ɑ kɑ wi. U mɑɑ nùn domɑru kuɑ u derɑ u kĩi geeru wɑ pirisɔm kɔ̃sobun wirugiin mi. 22 Mɑ wirugii wi, u nùn pirisɔm be bɑ wɑ̃ɑ mi kpuro nɔmu sɔndiɑ. Ye bɑ koo ko kpuro, wiyɑ rɑ yen woodɑ wɛ̃. 23 Wirugii wi, u ku rɑ mɛɛri ye Yosɛfu u mɔ̀ domi Yinni Gusunɔ u wɑ̃ɑ kɑ wi. Mɑ u derɑ win ye u kuɑ kpuro yɑ wɛ̃rɑ.