Yɑkɔbu u Esɑun domɑru mwɑ
27
1 Sɑnɑm mɛ Isɑki u tɔkɔ kuɑ, win nɔni dɑm dwiiyɑ, u ǹ mɑɑ yɑm wɑɑmɔ, mɑ u win bii yerumɑ sokɑ u nɛɛ, Esɑu.
Esɑu u nɛɛ, nɛ wee.
2 Mɑ Isɑki u nɛɛ, wee nɑ tɔkɔ kuɑ, nɑ ǹ mɑɑ nɛn gɔɔn tɔ̃ru yɛ̃. 3 Yen sɔ̃, nɑ nun kɑnɑmɔ tɛ̃, ɑ seewo ɑ wunɛn sɛ̃ɛ bwɑ̃ɑru kɑ wunɛn tɛndu suɑ ɑ dɑ yɑkɑsɔ ɑ mɑn yɑɑ goowɑmɑ. 4 Kpɑ ɑ kɑ mɑn ye yɑɑ dibu kuɑ nge mɛ nɑ rɑ kɑ̃ ɑ kɑ mɑn nɑɑwɑ n di kpɑ n nun domɑru kuɑ n sere gbi.
5 Mɑ Esɑu u seewɑ u dɑ yɑkɑsɔ u kɑ gbeeku yɑɑ ye goomɑ. N deemɑ Rebekɑ u nɔɔmɔ ye Isɑki u win bii Esɑu sɔ̃ɔmɔ. 6 Yerɑ u win bii Yɑkɔbu sɔ̃ɔwɑ u nɛɛ, wee nɑ nuɑ wunɛn bɑɑ u wunɛn mɔɔ Esɑu sɔ̃ɔwɑ u nɛɛ, 7 u doo u nùn yɑɑ goowɑmɑ kpɑ u kɑ nùn ye yɑɑ dibu kuɑ u di kpɑ u nùn domɑru kuɑ Yinni Gusunɔn wuswɑɑɔ u sere gbi. 8 Tɛ̃ nɛn bii, ɑ nɛn gɑri nɔɔwɔ yi kon nun sɔ̃. 9 A doo boo gɔ̃rɔ ɑ mɑn boo binu yiru tɑmɑ ni nu wɑ̃ kpɑ n nu wunɛn bɑɑbɑ kuɑ nge mɛ u rɑ kɑ̃, 10 kpɑ ɑ kɑ nùn dɑɑwɑ u di, kpɑ u nun domɑru kuɑ u sere gbi.
11 Yɑkɔbu u win mɛro wisɑ u nɛɛ, wee, nɛn mɔɔ u sɑnsu mɔ ɑdɑmɑ nɛnɑ kun mɔ. 12 À ku tubɑ, nɛn bɑɑbɑ koo mɑn bɑbɑ kpɑ n ko wee kowo win mi. Kpɑ domɑ te nɑ kĩ mi, tu ko bɔ̃ri.
13 Win mɛro nùn sɔ̃ɔwɑ u nɛɛ, nɛn bii, ɑ de bɔ̃ri yi, yi wɔri nɛn wirɔ. A gesi nɛn gɑri nɔɔwɔ kpɑ ɑ mɑn boo ni tɑmɑ.
14 Mɑ Yɑkɔbu u dɑ u kɑ boo ni nɑ u win mɛro wɛ̃. U kɑ yɑɑ dibu kuɑ bi Isɑki u rɑ kɑ̃. 15 Yen biru u win bii gbiikoo Esɑun tɔ̃ɔ bɑkɑ yɑ̃nu suɑ ni nu wɑ̃ɑ dirɔ u nu Yɑkɔbu sebusiɑ. 16 Mɑ u nùn boo bii nin gɔni tɛ̃kusi win nɔmɑɔ kɑ win wĩirɔ, domi u ǹ sɑnsu mɔ. 17 Mɑ u dĩɑ duro ni kɑ pɛ̃ɛ ye u kuɑ win bii Yɑkɔbu nɔmu bɛriɑ. 18 Sɑɑ yerɑ Yɑkɔbu u kɑ nu dɑ win tundon mi, u nɛɛ, bɑɑbɑ.
Mɑ tundo u wurɑ u nɛɛ, nɛ wee, wunɑ were nɛn bii.
19 Yɑkɔbu u win tundo wisɑ u nɛɛ, nɛnɑ Esɑu, wunɛn bii yerumɑ. Wee, nɑ kuɑ nge mɛ ɑ geruɑ. A seewo ɑ sinɑ ɑ nɛn tɑɑsorun yɑɑ tem, kpɑ ɑ mɑn domɑ te kuɑ.
20 Mɑ Isɑki u nùn bikiɑ u nɛɛ, ɑmɔnɑ ɑ kɑ ye wɑ fuuku mɛ, nɛn bii.
Yɑkɔbu u nùn wisɑ u nɛɛ, Gusunɔ wunɛn Yinniwɑ u mɑn ye gɑwɑmɑ.
21 Mɑ Isɑki u nɛɛ, ǹ n mɛn nɑ, ɑ susimɑ nɛn bii, n nun bɑbɑ n wɑ ɑ̀ n sɑ̃ɑ Esɑun nɑ kɑ gem.
22 Yɑkɔbu u susi win bɑɑbɑ Isɑkin mi, mɑ u nùn bɑbɑ u nɛɛ, Yɑkɔbun nɔɔwɑ nɑ nɔɔmɔ, ɑdɑmɑ Esɑun nɔmɑ nɑ bɑbɑ.
23 U ǹ nùn tubɑ yèn sɔ̃ win nɔmɑ sɑnsu mɔ nge Esɑugiɑ. Adɑmɑ ye u kĩ u nùn domɑru kuɑ, 24 u ginɑ nɛɛ, wunɑ nɛn bii Esɑu kɑ gem?
U wisɑ u nɛɛ, oo, nɛnɑ.
25 Isɑki u nɛɛ, ɑ kɑ susimɑ n wunɛn tɑɑsorun yɑɑ tem kpɑ n nun domɑru kuɑ.
Yɑkɔbu u kɑ susi win mi, mɑ u di. U mɑɑ tɑm suɑ u nùn wɛ̃ mɑ u nɔrɑ. 26 Yen biru Isɑki u nùn sɔ̃ɔwɑ u nɛɛ, ɑ susimɑ ɑ mɑn sɔ̃su, nɛn bii.
27 Yɑkɔbu u susi u nùn sɔ̃su. Isɑki u win yɑ̃nun nuburu nuɑ mɑ u nùn domɑru kuɑ u nɛɛ, wee nɛn biin nuburɑ kɑ gberun nuburu weenɛ te Yinni Gusunɔ u domɑru kuɑ.
28 Gusunɔ u de gurɑ yɑ n dɑ nun nɛɛyɛ tem bɑrukɑgim sɔɔ,
kpɑ ɑ ɑlikɑmɑ kɑ resɛm wɑ n kpɛ̃ɑ n bɑndɑ.
29 Tɔn dɑbinu nu nun wiru kpĩiyɑ,
kpɑ bwese dɑbinu nu nun yiirɑ.
Kpɑ ɑ ko wunɛn mɛro bisibun yinni,
kpɑ ben tii bu nun yiirɑ.
Wi u nun bɔ̃rusi u koo bɔ̃ri wɑ.
Wi u mɑɑ nun domɑru kuɑ, yɛ̃ro koo domɑru wɑ.
30 Ye Isɑki u Yɑkɔbu domɑru kuɑ u kpɑ, sɑnɑm mɛ Yɑkɔbu u doonɑ kese, yerɑ win mɔɔ Esɑu u wurɑmɑ tɑɑsorun di. 31 Mɑ u dĩɑnu kuɑ u kɑ dɑ win tundon mi, u nùn sɔ̃ɔwɑ u nɛɛ, bɑɑbɑ, ɑ seewo ɑ nɛn tɑɑsorun yɑɑ tem kpɑ ɑ mɑn domɑ te kuɑ.
32 Win tundo Isɑki u nùn bikiɑ u nɛɛ, wunɑ were.
U nɛɛ, nɛnɑ Esɑu wunɛn bii yerumɑ.
33 Mɑ Isɑki u diirɑ gem gem u nɛɛ, ǹ n mɛn nɑ, wɑrɑ u mɑn gbeeku yɑɑ tɑmɑ nɑ temɑ ɑ sere tunumɑ, nɑ mɑɑ nùn domɑru kuɑ. Yɛ̃ro koo mɑɑ bɑrukɑ ko.
34 Ye Esɑu u gɑri yi nuɑ win tundon nɔɔn di, yerɑ u wurɑ kuɑ kɑ nuku sɑnkirɑ bɑkɑnu, mɑ u win tundo sɔ̃ɔwɑ u nɛɛ, bɑɑbɑ, ɑ mɑɑ nɛn tii domɑru kuo.
35 Isɑki u nɛɛ, wunɛn wɔnɔ u nɑ u wunɛn domɑru mwɑ kɑ bwisi.
36 Esɑu u nɛɛ, wee u mɑn tɑki di nɔn yiru nge mɛ win yĩsiru. U mɑn nɛn yerumɑru mwɑɑri. Gisɔ u mɑɑ nɛn domɑru mwɑ. A ǹ mɑɑ domɑru gɑru mɔ ɑ mɑn kuɑ?
37 Isɑki u nùn wisɑ u nɛɛ, wee nɑ nùn kuɑ wunɛn yinni, nɑ mɑɑ nùn win mɛro bisibu kpuro wɛ̃ bu ko win yobu. Nɑ mɑɑ sii dĩɑnu kɑ dɑ̃ɑ bii ni bɑ rɑ kɑ tɑm ko kpuron domɑru kuɑ. Ǹ n mɛn nɑ, mbɑ kon kpĩ n mɑɑ nun kuɑ, nɛn bii.
38 Esɑu u nɛɛ, ǹ n mɛn nɑ, domɑ teni tɔnɑwɑ ɑ mɔ, bɑɑbɑ? A mɑɑ mɑn domɑru kuo.
Wunɛn tem kun bɑrukɑ wɑsi.
Mɛyɑ gurɑ kun mɑɑ nɛmɔ wunɛn mi.
Wunɛn tɑkobin ɑreyɑ kɑɑ n dimɔ ɑ n kɑ wɑ̃ɑ.
40 Kɑɑ mɑɑ ko wunɛn wɔnɔn yoo.
Adɑmɑ ɑ̀ n dɑ kɑ tii yinɑ,
kɑɑ win yoru yɑri nge mɛ kɛtɛ yɑ rɑ yen sugu fɛ̃re yu kɔ̃.
Yɑkɔbu u dɑ Lɑbɑnin mi
41 Sɑɑ dɔmɑ ten diyɑ Esɑu u Yɑkɔbu tusɑ domɑ te ben tundo nùn kuɑn sɔ̃. Mɑ u geruɑ win tii sɔɔ u nɛɛ, nɛn bɑɑbɑn gɔɔ turuku kuɑ. Win gɔɔ gbɑbu sindun biruwɑ kon nɛn wɔnɔ go.
42 Bɑ Rebekɑ gɑri yi dɔmɛyɑ yi win bii gbiikoo Esɑu u geruɑ. Mɑ u win bii dɑ̃ɑko Yɑkɔbu sokusiɑ u nùn sɔ̃ɔwɑ u nɛɛ, n wee, wunɛn mɔɔ u kĩ u win mɔru kɔsiɑ u nun go. 43 Tɛ̃ nɛn bii, ɑ nɛn gɑri swɑɑ dɑkio. A seewo ɑ kpikiru dɑ nɛn sesu Lɑbɑnin mi Hɑrɑniɔ. 44 Kpɑ ɑ sinɑ mi sɔ̃ɔ mɛɛru gɑɑ sere wunɛn mɔɔn bwɛ̃rɑ yɑ̀ n kpunɑ. 45 Win mɔru yɑ̀ n sɑrɑ wunɛn min di, u koo duɑri ye ɑ nùn kuɑ. Sɑnɑm mɛyɑ kon de ɑ gɔsirɑmɑ. Domi nɑ ǹ kĩ n bɛɛ yiru kpuro biɑ sɔ̃ɔ teeru.
46 Yerɑ Rebekɑ u dɑ u Isɑki sɔ̃ɔwɑ u nɛɛ, nɑ kɑ nɛn wɑ̃ɑru wɑsirɑ Esɑun kurɔ benin dɑɑn sɔ̃, be bɑ sɑ̃ɑ Hɛtibɑ. Yɑkɔbu ù n mɑɑ kurɔ suɑ tem mini nge be, mbɑn wɑ̃ɑrɑ ko nɑ n mɑɑ wɑ̃ɑ.