28
1 Yerɑ Isɑki u Yɑkɔbu sokɑ u nùn domɑru kuɑ, mɑ u nùn sɔ̃ɔwɑ u nɛɛ, ɑ ku rɑ ko ɑ Kɑnɑni minin kurɔ suɑ. 2 Yen sɔ̃, ɑ seewo ɑ dɑ Pɑdɑnɑrɑmuɔ, Bɛtuɛli wunɛn mɛron bɑɑbɑn yɛnuɔ kpɑ ɑ kurɔ suɑ mi, Lɑbɑni wunɛn dwɑɑnin bibu sɔɔ. 3 Kpɑ Gusunɔ Dɑm kpurogii u nun domɑru kuɑ, ɑ mɑrurɑ ɑ tɛriɑ ɑ kɑ ko bwese dɑbinun nuuru. 4 Kpɑ u nun domɑru kuɑ wunɛ kɑ wunɛn bibun bweseru nge mɛ u Aburɑhɑmu kuɑ, kpɑ tem mɛ, mu ko wunɛgim mi ɑ sɔru dimɔ, mɛ Gusunɔ u Aburɑhɑmu kɑ̃.
5 Isɑki u derɑ Yɑkɔbu u dɑ Pɑdɑnɑrɑmu giɑ Lɑbɑnin mi, wi u sɑ̃ɑ Bɛtuɛli Arɑmugiin bii, Yɑkɔbu kɑ Esɑun dwɑɑni.
6 Esɑu u wɑ mɑ Isɑki u Yɑkɔbu domɑru kuɑ mɑ u nùn gɔrɑ Pɑdɑnɑrɑmu giɑ u win kurɔ kɑsu. U mɑɑ nuɑ mɑ sɑɑ ye u nùn domɑru kuɑmmɛ u nɛɛ, u ku rɑɑ kurɔ sue Kɑnɑnin bii tɔn kurɔbu sɔɔ. 7 U mɑɑ wɑ mɑ Yɑkɔbu u win bɑɑ kɑ win mɛron gɑri nuɑ mɑ u doonɑ Pɑdɑnɑrɑmu giɑ. 8 Yerɑ u giɑ mɑ Kɑnɑnin bii tɔn kurɔbun dɑɑ yɑ ǹ win bɑɑ wɛ̃remɔ. 9 Mɑ u seewɑ u dɑ Isimɛɛlin mi, u win bii Mɑhɑlɑti, Nɛbɑyɔtun sesu suɑ kurɔ u doke kurɔ be u rɑɑ mɔ sɔɔ. Isimɛɛli wi, u sɑ̃ɑwɑ Aburɑhɑmun bii.
Yɑkɔbu u dosɑ Betɛliɔ
10 Yɑkɔbu u seewɑ sɑɑ Beri Sebɑn di u doonɑ Hɑrɑni giɑ. 11 U turɑ yɑm gɑm. Miyɑ u sĩ domi sɔ̃ɔ u duɑ. Ye u kpunɑmɔ u kperu gɑru suɑ u tu wiru kpĩiri. 12 Yerɑ u dosɑ u wɑ wee, sɛrɑ gɑɑ yɑ yɔ̃ temɔ mɑ yen wirɑ wɔllu girɑri, mɑ u Gusunɔn gɔrɑdobɑ wɑ bɑ yɔɔmɔ bɑ sɑrɑmɑmɔ kɑ sɛrɑ ye. 13 Yinni Gusunɔn tii u yɔ̃ yen wɔllɔ mɑ u kɑ nùn gɑri kuɑ u nɛɛ, nɛnɑ Gusunɔ, Aburɑhɑmu wunɛn debun Yinni kɑ Isɑkin Yinni. Tem mi ɑ kpĩ mi, wunɑ kon mu wɛ̃ kɑ sere mɑɑ wunɛn bibun bweseru. 14 Wunɛn bibun bwese te, tɑ koo kowɑ nge yɑni sɛɛri kpɑ tu tɛriɑ tem mɛn goonu nnɛ kpuro sɔɔ. Wunɛ kɑ wunɛn bibun bweserun min diyɑ hɑnduniɑn bwesenu kpuro nu koo domɑru wɑ. 15 Wee nɑ wɑ̃ɑ kɑ wunɛ, ko nɑ n mɑɑ nun kɔ̃su yɑm kpuro mi ɑ dɔɔ kpɑ n mɑɑ kɑ nun wurɑmɑ tem mɛ sɔɔ. Domi nɑ ǹ nun derimɔ sere n kɑ ko nge mɛ nɑ nun sɔ̃ɔwɑ.
16 Yɑkɔbu u dom yɑndɑ mɑ u nɛɛ, Yinni Gusunɔ u wɑ̃ɑ mini kɑ gem. Nɑ ǹ dɑɑ mɑɑ yɛ̃ mɛ.
17 Yerɑ bɛrum nùn mwɑ mɑ u nɛɛ, n wɑ̃ bu suunu mi nɑsiɑ. Gusunɔn yɛnuwɑ mini kɑ mɑɑ wɔllun duu yeru.
18 Mɑ u seewɑ buru buru yellu u kpee te suɑ te u wiru kpĩiri mi, u girɑ temɔ tu kɑ ko yĩreru. Mɑ u ten wɔllɔ gum wisi. 19 U yɑm mi yĩsiru kɑ̃ Betɛli. Yen tubusiɑnɑ Gusunɔn wɑ̃ɑ yeru. Adɑmɑ wuu ge gɑ wɑ̃ɑ mi, bɑ rɑ rɑɑ gu sokuwɑ Lusi. 20 Yen biru u nɔɔ mwɛɛru kɑrɑ u nɛɛ, Gusunɔ ù n kɑ mɑn wɑ̃ɑ, mɑ u mɑn kɔ̃su nɛn sɑnum mɛ sɔɔ, mɑ u mɑn dĩɑnu wɛ̃ kɑ yɑ̃ɑ ni kon sebe, 21 kpɑ n gɔsirɑ nɛn bɑɑbɑn yɛnuɔ kɑ ɑlɑfiɑ, wiyɑ ko n sɑ̃ɑ nɛn Yinni. 22 Kpee te nɑ girɑ mini, tɑ kuɑ yĩreru mɑ miyɑ n ko n ko win wɑ̃ɑ yeru. Ye u mɑɑ mɑn wɛ̃ kpuron wɔkuru bɑɑteren wɔllɔ kon nùn tiɑ tiɑ wesiɑ.