लेम क़म्मा
३
ब़ब़,
नाना खोन्कि निछाचि ओ,
खानानिन ब़द्धेकापाङ काचिन्चि मान्लिदानिन।
देकिनालो खानानिन त़सिन्तुम्योम,
आन्कान्का काचिन्चिओ आन्काओ छ़ङ्छेन्मा ब़द्धे चाअ़त्लो लि।
२ देकिनालो आन्कान झारासा ब़द्धे फिसुम्च़म।
साङ चेप्ओ य़ङ्दा देम्खाछाङ अ़फिसुन्नालो खोसाआ झारा अ़याम क़म्मा ऱ,
खोन्कि खो लाहि मात्द़ङ्ओ म़ना लि।
३ युक्वाचि क़म्माचिओ निकि आन्कान मोचिओ अ़चुदोदा काक्माय़ङ काकारा पाक्तुम्च़म्नालो मोचि झारा अ़चुपोक खादात्नि खात्मा स़न,
मोह्यात्निङा आन्कान खात्मा ऱम्च़म।
४ वाप्तेलाचिछाङ खानुम्च़म।
ह़क्ओ अ़सावाआ मुत्तु खात्तुङुचिहिदा वाप्तेला हुखाआ अ़क्तात अ़चुप्पो वाप्तेला हुखालाम्पा खादात्नि खात्मानि मिन,
मोह्यात्निङा खात्तु।
५ मोवात्निङा लेम उन्चित्को मुयाङ्नुछाङ अ़धिवो य़ङ्चिदा ऱक्भाक मु।
अ़क्तात अ़चुप्पो मि छेन्वाआ अ़धिवो खोक्लिछाङ राङ्तुखाइसु।
६ लेम्छाङ अ़क्तात मिङा ओ।
ओ आन्पोक्ओ अ़फुत्चिदा झारादाङ्का ब़द्धे अ़अ़त्पा ओ।
ओसाआ झारा पोक पोप्तु खोन्कि झारा ह़ङ्म़ङ्दा मि लोङ्सुलोइसुकि मिराक्युओ मिदा मो राङ्खात।
७ झाराकाखालाओ साक्स़ङ्चि,
छोङ्वाचि,
कासात्नान्चिन्चि खोन्कि धियाङ्वामादाओ सायाम्पोक्चि म़क़म,
खोन्कि मोचि म़नाचिआङा म़क़म्तुयुङ्सुचि।
८ मेन साङ्आछाङ लेम क़म्मा अ़ऱन।
मो लेम ना क़म्मा अ़ऱन्मिन्ओ अ़अ़त्पा ओ,
खोन्कि स़मादामादा म़तात्लाओ अ़छ़क्आ भेप्तुओ।
९ ओ लेम्आ आन्कान हाङ्पा खोन्कि निनाम्हाङ पापा चोन्तुम्योम,
खोन्कि ओ लेम्आङा आन्कान निनाम्हाङ्ओ अ़चुकात्मादा म़मुयुचिओ म़नाचि माङ्हिम्सुम्च़म।
१० अ़क्तात दोदाङ्का चोन्मा खोन्कि माङ्हिम लोन।
अ़ङ्ब़ब़,
नाना खोन्कि निछाचि ओ,
ओवात्नि लिमा अ़नुनिन।
११ दि अ़क्तात बोन्वादाङ्काङा ख़क्याङ्ओ खोन्कि चानुयाङ्ओ चाक्वा लोन कि?
१२ अ़ङ्ब़ब़,
नाना खोन्कि निछाचि ओ,
दि वासिताङ्आ जैतुन,
माङ्लो अङ्गुरा अ़ताङ्आ वासि सिसु कि?
ख़क्ओ चाक्वा लोन्खादाङ्का चानुओ चाक्वा लोन्मा अ़ऱनिन।
निनाम्मादुङ्काओ खारु
१३ खानानिन्एदा खारु कातोक खोन्कि कातुप साङ युङ्याङ?
खोसोओ अ़खारुदाङ्का ताओ अ़सिम्मान्चिन्आ अ़काचिचि मुचिकि अ़नुवाक अ़च़माथाङ्मा खाङ्मुसुचिने।
१४ मेन आम्नुओ साकोङ्वादा चात्लो ऩङ्च़ खोन्कि आप्पि ओन्ङा तोक्मामिन्मा याक्याङ्नालो आम्नुओ खारुदा ऱफोक्वा मान्मुदानिन,
खोन्कि अ़छ़ङ य़ङ सोज्जेओ मान्मुदानुम।
१५ ओवाको खारु निनाम्मादुङ्का अ़य़निन।
मेन ओ ना हेन्खामादाङ्काओ,
मान्साम्योक्मि खोन्कि सैतानादाङ्का ओ।
१६ खादा ऩङ्च़ खोन्कि आप्पि ओन्ङा तोक्मामिन्मा याक,
मोदा म़पुप्खात,
खोन्कि झारा अ़अ़त्पा काचि लि।