27
Si Josue ka Ogsoip ki Mosis
1 2No nigkagi ka Magboboot ki Mosis to “Takorog ka to soini no bubungan to mgo bubungan to Abarim, woy pantowa nu ka tano no inbogoy kud to mgo otow to Israil. 13 Takas to nakita nud on, songo ogpaka-agpot ka to mgo kabuybudyagan nu unawa to kakoy nu no si Aaron, 14 su to pog-atu to mgo otow dio to mgo woig to han-hanawan to Sin, nigligal kow daruwa to pogtood to sugu ku to pog-ila to pogkoin-oog ku to tangkaan dan.” (Sikan ian ka mgo woig to Miriba to Kadis to han-hanawan to Sin.) 15 Nigkagi si Mosis duon to Magboboot to, 16 “Marodyow porom, Magboboot no Igbudyag to tibon mgo gimukud to tibon mgo otow, ko og-aam ka to otow no og-aap to soini no koot-otawan. 17 Sagboka no otow no ogsood woy oglibuwas to tangkaan dan, no og-aap kandan to poghipanow woy to poglibong odyow no ka koot-otawan to Magboboot kono ogko-unawa to puntuk to mgo karniru no waro taagbantoy.”
18 No nigkagi ka Magboboot ki Mosis to “Puruta nu si Josue no anak ni Nun, sagboka no otow no pigsooran on to gimukud ku, woy sampoonga nu ka uu rin. 19 Pasasindoga nu sikandin to tangkaan ni Iliasar no taagpanubad woy to tibon koot-otawan woy tinurua nu sikandin to pogpitow ran. 20 Ibogoy nu kandin ka katongod nu to pogboot, odyow no og-iloon sikandin to tibon koot-otawan to Israil. 21 Oghasindog sikandin to tangkaan ni Iliasar no og-inso to pogboot to Magboboot pinabadyo to Urima. Woy on oghipanow ka tibon koot-otawan to Israil ko ogkagi sikandin, woy sikandin ka ogkagi odyow no oglibong sikandan. 22 Pighimu ni Mosis ka insugu to Magboboot kandin. Inpasasindog din si Josue to tangkaan ni Iliasar no taagpanubad woy to tibon koot-otawan. 23 No pigsampoongan din ka uu ni Josue, woy pigtinuru din sikandin no igbudyag sumao to innangon to Magboboot ki Mosis.