35
Mgo Lunsud no Aputanan woy ka Pogbunu
6 Ogkohimu no mgo lunsud no aputanan ka hon-om to mgo lunsud no igbogoy now to mgo kapunganan ni Livi. Ogpakapanlaguy dio ka otow no nakahimatoy to songo otow. Songo ogbogoy kow pad to 42 no mgo lunsud duon to mgo kapunganan ni Livi. 7 To tibo, ogbogoy kow to 48 no lunsud duon to mgo kapunganan ni Livi duma to mgo sabsabanan no niglingut to sikan. 8 Og-aamon now ka mgo lunsud no igbogoy now to mgo kapunganan ni Livi pinabadyo to koon-ingan to mgo lunsud no duon to tano to kara lunggunan to Israil. Ko moon-ing ka mgo lunsud dan, moon-ing ka igbogoy, di ko mointok ka mgo lunsud, maintok ka igbogoy.”
9 No nigkagi pad ka Magboboot ki Mosis to 10 “Kagii nu pad ka mgo otow to Israil woy nangoni nu sikandan to ‘Ko ogtalipag kow to Jordan no woig pohondio to Canaan, 11 aam kow to mgo lunsud no aputanan, no ian ka mgo ogkapanlagudyan to otow no nokohimatoy to songo otow no waro din tuura. 12 Ogkohimu no aputanan odyow no kono oghimatadyan to taagsuli ka otow no pigbadyungan to nighimatoy tagood to waro pad sikandin nokotangko to mgo otow to poghusoy. 13 Ogkohimu no aputanan now ka sikan no hon-om no lunsud. 14 Tatou ka lunsud no og-aamon now to soini no ilis to Jordan no woig, woy tatou ka og-aamon now dio to diipag dio to Canaan no mgo lunsud no aputanan. 15 Ogkohimu no aputanan sikan no hon-om no mgo lunsud odyow no ogkapanlagudyan to agad hontow no nakahimatoy to songo otow no waro din tuura, agad ko otow sikandin to Israil, woy ko dagpu, woy agad hontow no nig-ugpo taliwaro kandan.
16 Ko duon otow no ogbaras to songo otow pinabadyo to putow no kaaglagan no ogkamatoy ka otow, nakabunu sikandin, woy oghimatadyan now ka otow no nigbunu. 17 Ko duon batu no ogpakahimatoy duon to boad to otow, woy ogko-igu ka songo otow woy ogkamatoy ka otow, nigbunu ka niggon-gon to batu woy oghimatadyan now ka otow no nigbunu. 18 Woy ko duon kadyu no ogpakahimatoy duon to boad to otow, woy ogbarasan din ka songo otow no ogkamatoy ka otow, nakabunu ka nigbaras, woy oghimatadyan now ka nigbunu. 19 Ka otow no taagsuli to langosa no nigtigis ian ka oghimatoy to otow no nigbunu. Ko ogkitoon to taagsuli ka nakabunu oghimatadyan din. 20 Ko duon otow no panoy ogbabantak no og-usung to songo otow woy ko ogdogpakan din to botang no intuud din odyow no ogkamatoy ka otow 21 woy ko pinabadyo to pogdomot ogsuntukon din ka otow odyow no ogkamatoy, oghimatadyan now ka otow su nigbunu sikandin. Oghimatadyan to taagsuli to intigis no langosa ka nakabunu ko ogkitoon din. 22 Di ko waro maroot no goinawa no og-usung do ka otow to songo otow, woy ko ogdogpak to botang no waro din tuura 23 woy ko og-uugan to batu no ogpakahimatoy di waro sikandin nakakita no duon otow to diraom no ogkamatoy ka otow, no tongod su kono no usig din, woy waro sikandin nigbabantak to maroot, 24 oghusadyon to koot-otawan to tangkaan to taagsuli to intigis no langosa no sikan ian no mgo udlin ka sosokoroy ran. 25 Ogbantoy ka koot-otawan no kono oghimatadyan ka pigbadyungan to bunu to taagsuli to intigis no langosa. Iglibong dan sikandin pohondio to lunsud no aputanan no pigpanlagudyan din. Dio og-ugpo ka otow taman to pogkamatoy to igbudyag no taagpanubad no in-oog pinabadyo to pogbus-ug to lana. 26 Di ko duon allow no oglibuwas ka otow to oatan to lunsud no pigpanlagudyan din 27 woy ko ogkakitaan sikandin to otow no taagsuli to libuwasan to lunsud, ogkohimatadyan sikandin to taagsuli no kono ogkasonditan to bunu sikan. 28 Og-ugpo ka otow no pigbadyungan to bunu dio to lunsud no aputanan taman to pogkamatoy to igbudyag no taagpanubad. Woy on ogpaka-uli sikandin to kandin no tano ko ogkamatoy ka igbudyag no taagpanubad.
29 Soini ka mgo udlin now to tibon mgo tipouri now, agad hondoi kow og-ugpo. 30 Woy now on oghimatadyi ka otow no nakahimatoy to songo otow ko duon ogpakanangon no nakita ran ka poghimatoy. Di waro otow no oghimatadyan now tongod do to pogkagi to sagboka ro no otow. 31 Dokow ogtinawaa ka badyad liwan to koudyagan to otow no nakahimatoy. Oghimatadyan now ro ian sikandin su sikan ka litos no logpad. 32 Dokow ogtinawaa ka badyad ligkat to otow no nakapanlaguy to sagboka no lunsud no aputanan odyow no ogpaka-uli sikandin poron to tano din to waro pad namatoy ka igbudyag no taagpanubad. 33 Dokow ogligsomi ka tano no og-ugpaan now. Ogkaligsoman ka tano ko duon ogtigis no langosa to kamatadyon dio. Kono ogko-ulian ka tano tongod to intigis no langosa ko konon pinabadyo to langosa to otow no nigpatigis to langosa to songo otow. 34 Dokow ogligsomi ka tano no ugpaan now no songo ugpaan ku, hoo su nig-ugpo a no Magboboot to taliwaro to mgo otow to Israil.’”