25
Ka mgo Lukos to Israil woy ka mgo Boi to Moab
1 To nig-ugpo ka mgo otow to Israil duon to Sitim, nigbunsud ka mgo lukos to pogpanghilabot to mgo boi no matig Moab, 2 woy pighinggat sikandan to mgo boi to pog-agpot to pogpanubad duon to kandan no mgo tinuuhan. Nigkokoon woy nig-unduk ka mgo otow to tangkaan to sikan no mgo tinuuhan. 3 No sikan ian no nig-agpot ka mgo otow to Israil to pogsadyo to Baalato Pior. Woy nigmoinit lagboy ka goinawa to Magboboot tongod kandan.
4 Nigkagi ka Magboboot ki Mosis to “Limura nu ka mgo igbudyag to soini no mgo otow woy pambitadya nu to ma-allow to tangkaan to Magboboot, odyow no ogkabohow ka moinit no goinawa to Magboboot duon to Israil.”
5 No nigkagi si Mosis duon to mgo taaghusoy to koot-otawan to Israil to “Kara sagboka kaniu ogpurut to mgo otow now no naka-agpot to pogsadyo to Baal to Pior, woy ogpanghimatadyan now sikandan.” 6 No tagood to nigsin-sinogow sikandan to gomawan to Tukbung to Pogtangko, duon otow to Israil no nig-aap to sagboka no boi to Midian duon to lunggunan din dio to tangkaan to pogpitow ni Mosis woy to tibon koot-otawan to Israil. 7 Si Pinihas ian ka anak ni Iliasar woy apu ni Aaron no taagpanubad. To pogkakita rin to sikan, nig-ongkod sikandin to koot-otawan no nigkomkom to kommag din. 8 Nigsundul si Pinihas to otow to Israil pohondio to tukbung din. Pigpilak din sikandan daruwa no niglagbas ka kommag din to lawa to lukos to Israil pohondio to lawa to boi to diraom. No nighagtong ka mokohinhinaat no dau duon to mgo otow to Israil 9 di namatoy on ka 24,000 no otow to dau.
10 Nigkagi ka Magboboot ki Mosis to 11 “Tongod ki Pinihas no anak ni Iliasar woy apu ni Aaron no taagpanubad na-awo ka kabou ku duon to mgo otow to Israil; hoo su unawa ka kandin no goinawa to goinawa ku tongod to ngaran ku no in-oog taliwaro kandan. Woy tongod to sikan waro ku toora ka moinit no goinawa ku to poghimatoy kandan tibo. 12 No, nangoni nu sikandin no oghimu a to kasabutan to maawang no goinawa kandin. 13 Oghimu a to kasabutan kandin no sikandin woy ka kandin no mgo tipouri ka ogkohimu no mgo taagpanubad taman to katamanan su unawa ka kandin no goinawa to goinawa ku tongod to pogko-oog to Magboboot din, woy su pigpo-uli din ka mgo otow to Israil duon to Magboboot.”
14 Si Simri no anak ni Salu ian ka otow to Israil no namatoy duma to boi no matig Midian. Sagboka no igbudyag sikandin to sagboka no lunggunan no kapunganan ni Simion. 15 Woy ka boi no matig Midian no pighimatadyan ian si Kosbi no anak ni Sur no sagboka no datu to sagboka no lunggunan to Midian.
16 Nigkagi ka Magboboot ki Mosis to 17 “Ogdoromdomon nu no mgo usig nu ka mgo otow to Midian woy ogpanghimatadyan now sikandan, 18 hoo su unawa to nig-usig sikandan kaniu to poggawoy ran kaniu to nabadyaan now to Pior woy to pighimu ni Kosbi no atoboi ran. Sikandin sagboka no anak to datu to Midian no ian ka boi no pighimatadyan to poglopow to mokohinhinaat no dau tongod to Pior.”