25
Ka Tuid to Poghimooy to Tano
1 Nigkagi ka Magboboot ki Mosis duon to bubungan to Sinai to, 2 “Kagi ka duon to mgo otow to Israil woy nangoni nu sikandan no ‘to poglopow now to tano no igbogoy ku kaniu, songo pohimaadya now ka tano tongod to Magboboot. 3 Sood to hon-om no tuid og-orokan now ka mgo kamot now, woy sood to hon-om no tuid pamungoli now ka mgo pinamua now no ubas woy punpuna now ka mgo bogas. 4 Di to igkapitu no tuid oghimooy ka tano to ‘Sabat’aduon to Magboboot. Dokow og-oorok to mgo kamot now, woy dokow ogpamungoli ka mgo pinamua now no ubas. 5 Dokow oggarab to ogtubu do duon, woy dokow ogpunpun to mgo ubas no ogtubu to mgo inbaagad now no mgo pinamua. Oghimooy ian ka tano to sagboka no tuid. 6 Ko nokoy ka ogtubu to tuid to Sabat* ian ka ogkoonon now; sikoikow woy ka uripon nu no lukos woy ko boi, woy ka pigbadyaran nu no suguonon woy ka dagpu no otow no nig-agpot to pog-ugpo kaniu, 7 ilagkos pad ka mgo adyam now woy ka mgo magintaunan no nig-ugpo to tano now. Agad nokoy no ogtulin to tano ogkakoon now.’”
Ka Tuid to Pogkukuus
8 “‘Soola now ka papitu no tuid no himooy - ian papitu no akob to papitu no tuid - odyow no ka papitu no tuid no himooy ogkohimu no kohop-atan woy sasiyam no tuid. 9 Paraginga now ka budyung to tibon mgo ugpaan now to igkasampuu no allow to igkapitu no buwan to tuid; ian ka Allow to Pogpo-ul-ulioy ogparagingon now ka budyung to tibon tano now. 10 Ooga now ka igkakalimma-an no tuid, woy ipoitaga now ka kalipuwasan to tibo no nig-ugpo to tibon tano now. Ogkohimu no tuid now to pogkukuus; ogman-uli ka tibon mgo otow duon to tano to mgo kabuybudyagan dan no og-agpot to lunggunan to mgo kaminunaan dan. 11 Ogkohimu no tuid to pogkukuus now ka igkakalimma-an no tuid. Dokow og-oorok woy dokow ogga-ani to ogtubu do duon, woy dokow ogpunpun to ogtubu to inbaagad now no mgo pinamua to ubas. 12 Hoo su tuid to pogkukuus no in-oog kaniu; ogkoon kow ro ko nokoy ka ogkapurut now to mgo kamot.’”
13 “‘Ogman-uli kow tibo to kaniu no pigligkatan no tano to sikan no Tuid to Pogkukuus. 14 Ko ogbaligyo ka to tano to sagboka no karumahan nu, woy ko ogboli ka to kandin, doka oglo-loiga ka duma nu. 15 Ko ogboli ka to tano ogdoromdomon nu ko pila ka tuid ligkat to nigligad no Tuid to Pogkukuus. Songo ko ogbaligyo sikandin koikow ogdoromdomon din pad ko pila no tuid ka nagaat odyow to pogpunpun. 16 Ko moon-ing pad ka mgo tuid, ogdakolon now ka igbadyad, di ko maintok do ka mgo tuid, ogmaintokon now ka igbadyad, hoo su ka maugot no inbaligyo ian ko pila ka ogkapunpun. 17 Dokow oglo-loiga ka mgo duma now, di kahalloki now atag ka Magboboot. Sikoddi ka Magboboot no Igbudyag now.’”
18 “‘Babalia now ka mgo udlin ku woy dorodyowa now to pogpannalinga to mgo sugu ku, odyow no marodyow ka pog-ugpo now to tano. 19 No ogmambogas ka mgo pinamua to tano, woy ogkabuung kow to pogkoon woy waro igkasasow now to pog-ugpo dio.”’
20 “‘Naugpa ko og-inso kow, “Nokoy naan ka ogkoonon noy to igkapitu no tuid ko kono koy og-orok woy kono koy ogpunpun?” 21 No, ogbogadyan ku sikaniu to dakol lagboy no pogbolig to igkohon-om no tuid odyow no ogmambogas ka mgo pinamua now to litos to tatou no tuid. 22 To pog-orok now to igkawau no tuid ogkoon kow pad puun to napunpun now, woy ogparagas kow to pogkoon to sikan taman to pogpunpun to igkasiyam no tuid.’”
23 “‘Kono now ogduara ka tano no kono now ogkalokat, hoo su sikoddi ka tagtuun to tano woy pigpatag-tagooran ku ro sikaniu su mgo dagpu kow ro. 24 To tibon mgo tano no oggon-gonan now, ogbogoy kow to daan odyow no ogkalokat ka tano.’”
25 “‘Ko ogkawaraan ka sagboka no otow now no ogduruad sikandin to baad to tano din, oglopow poron ka marani rin no suod no oglokat to naruad din. 26 Di, ko naugpa waro otow ka ogpakalokat to sikan di to moorian ogmarodyow on ka pog-ugpo to sikan no otow no nigduad to tano, no duon litos no iglokat din to tano, 27 ogdoromdomon din ko pila ka napunpun to mgo tuid ligkat to tuid to pogduad din, woy ogliwanan din ka inboli nokani no ogsalinan pad to kantidad to napunpun no ogbadyad sikandin dio to otow no nigboli nokani. Takas to sikan, ogpakalibong ka otow to pog-ugpo to taan no tano din. 28 Di ko kono ogpakalimud ka otow to saapi no iglokat to tano, ogkagaat ka pigduad no tano dio to boad to otow no nigboli taman to Tuid to Pogkukuus. To Tuid to Pogkukuus, oglibong ka tano dio to taan no tagtuun, woy ogpaka-uli sikandin to tano din.’”
29 “‘Ko duon otow no ogduad to baoy sood to lunsud no nalingkusan to aad no batu, duon kantongod din to poglokat to sikan sood to songo tuid ligkat to allow to pogduad. Sood to sikan no tuid ogkalokat din pad. 30 Di ko kono ogkalokat sikan sood to sagboka ian no tuid, ian tagtuun to baoy ka nigboli woy ka kandin no mgo tipouri taman to katamanan. Kono oglibong ka baoy to Tuid to Pogkukuus. 31 Di ka mgo baoy dio to mgo ugpaan no waro malingkusi to aad no batu ogdoromdomon now no unawa to tano; ogkalokat sikan woy ilibong now to Tuid to Pogkukuus.’”
32 “‘Di ka mgo kapunganan ni Livi atag, ogpakalokat sikandan ladyun to mgo baoy ran to mgo lunsud no natagtuun to mgo kapunganan ni Livi. 33 No, sikan ian ogkalokat ka mgo baoy no naruad to mgo lunsud to mgo kapunganan ni Livi, woy i-uli sikan to Tuid to Pogkukuus, hoo su sikan do no mgo baoy ian ka baad to mgo kapunganan ni Livi taliwaro to mgo otow to Israil. 34 Di kono ogkaruad ka tano no pasabsaban no niglingut to mgo lunsud dan; kandan ka tagtuun taman to katamanan.’”
35 “‘Ko ogkawaraan ka sagboka no duma now woy konad ogpaka-udyag sikandin to pog-ugpo duma kaniu, buligi now sikandin unawa to pogbulig now poron to dagpu woy ko otow no nig-agpot to kaniu no nigtagtagood do, odyow no ogpakaparagas ka otow to pog-ugpo taliwaro kaniu. 36 Dokow ogpa-anaka ka inbogoy now kandin, di kahalloki now ka Magboboot, odyow no ogpakaparagas ka duma now to pog-ugpo taliwaro to kaniu no koot-otawan. 37 Dokow ogpasamboy kandin no ogpa-anakon now ka saapi woy dokow ogbaligyo kandin no ogtimuan now ka badyad no inbadyad now. 38 Sikoddi ka Magboboot no Igbudyag now no ian ka nig-aap kaniu ligkat to Ehiptu odyow to pogbogoy kaniu to tano to Canaan woy odyow no ogkohimu a no Magboboot now.’”
39 “‘Ko duon sagboka no duma now to koot-otawan now no ogkawaraan no ogduad sikandin to dadyagang din to kaniu, dokow ogpogos kandin to pogtarabau unawa to uripon. 40 I-unawa now ka pog-otow-otow now kandin to sagboka no otow no inbadyad now to pogtarabau kaniu woy to otow no nigtagtagood do to pog-agpot kaniu. Ogtarabau ka otow to koikow taman to Tuid to Pogkukuus. 41 To sikan no tuid ogloka-an now sikandin woy ka mgo anak din, woy og-uli sikandin to kandin no lunggunan woy dio to tano no natagtuun to kandin no mgo kabuybudyagan. 42 Kono ogkaruad unawa to uripon ka mgo otow to Israil su pig-aap ku sikandan ligkat to Ehiptu woy sikandan ka mgo suguonon ku. 43 Dokow oglo-loiga sikandan, kahallok kow duon to Magboboot now. 44 Ko duon mgo uripon now ogligkat do sikandan to mgo koot-otawan no niglingut kaniu; ogpakaboli kow to mgo uripon dio. 45 Woy songo ogpakaboli kow to mgo dagpu no nig-ugpo to taliwaro now woy to mgo anak to mgo kapunganan dan no no-otow to kaniu no tano, woy ogkohimu no sikaniu ka tagtuun kandan. 46 Igkatugun now sikandan to mgo anak now ko ogkamatoy kow unawa to mgo kaaglagan no igkagaat woy ogkohimu sikandan no mgo uripon now tagood to manokal pad sikandan, di dokow oglo-loiga ka mgo duma now no mgo otow to Israil.’”
47 “‘Ko duon otow to loin no koot-otawan woy ko dagpu no nig-ugpo taliwaro kaniu no ogkadatu woy duon sagboka to mgo duma now no ogkawaraan no ogduad to dadyagang din duon to sikan no dagpu no nig-ugpo taliwaro kaniu ko dio to sagboka no duma to sikan no dagpu, 48 duon dod katongod din no ogkalokat sikandin takas to naruad. Ogkalokat sikandin to sagboka no karumahan din: 49 Ogkalokat sikandin to anggam din, woy ko suod din, woy agad hontow pad no langosa rin to koot-otawan din. Woy ko ogkaruonan sikandin ogpakalokat sikandin to kandin do no lawa. 50 Ogsool sikandin woy ka otow no nigboli kandin to mgo tuid ligkat to tuid no induad sikandin taman to Tuid to Pogkukuus. Sikan no mgo tuid ian ka igsokod dan ko monu karakol ka badyad to poglokat su ka iglokat to otow ian ka babadyaroy poron to otow no ogtarabau to sikan no mgo tuid . 51 Ko moon-ing ka mgo tuid pohondio to Tuid to Pogkukuus, dakol dakol ka baad to induad ian ka iglokat kandin. 52 Ko maintok do no mgo tuid no oglopow on ka Tuid to Pogkukuus, sikan ka igsokod dan no malmaintok ka iglokat no litos to sikan. 53 Unawa poron ka pogbantoy to tagtuun kandin to pogbantoy rin to otow no ogbadyaran to pogtarabau to tibon mgo tuid; sikaniu ka ogbantoy no kono oglo-loigan sikandin to tagtuun.’”