24
Pighimatadyan Ka Otow no Nigtungadyow to Magboboot
10-11 No kuntoon duon lukos no ka amoy rin matig Ehiptu di ka inoy rin ian si Silomit no anak ni Dibri no otow to lunggunan ni Dan to koot-otawan to Israil. Niglibuwas ka sikan no otow taliwaro to pig-ugpaan to mgo otow to Israil woy nigpog-ogotoy sikandin to sagboka no otow to Israil woy pigtungadyawan din ka Ngaran to Magboboot. No sikan ian no pig-aap sikandin to mgo otow duon ki Mosis. 12 Pigpakalabusu ran sikandin taman to ogkatagaan dan ka pogboot to Magboboot.
13 No nigkagi ka Magboboot ki Mosis to 14 “Aapa now ka otow no nigtungadyow dio to libuwasan to pig-ugpaan to mgo otow. Ogsampoongan ka uu rin to mgo boad to tibon mgo otow no nigdinog kandin, woy takas to sikan igparogpak sikandin to batu to tibon koot-otawan. 15 Nangoni nu ka mgo otow to Israil no ‘Ko duon otow no ogtungadyow to Magboboot, ogsonditan ian sikandin; 16 oghimatadyan ian ka agad hontow no ogtungadyow to ngaran to Magboboot. Igparogpak sikandin to batu to tibon koot-otawan. Agad ko dagpu no otow sikandin woy ko tag-inugpo, ko ogtungadyow sikandin to Ngaran, oghimatadyan ian sikandin.’”
17 “‘Songo oghimatadyan now ka agad hontow no otow no oghimatoy to otow. 18 Ko duon otow no oghimatoy to adyam to songo otow ogliwanan din ian – adyam no manokal liwan to adyam no namatoy. 19 Ko duon otow no ogpo-il to songo otow, agad nokoy ka pighimu rin ian ka igbadyad kandin; 20 pantig liwan to pantig, mata liwan to mata, ngipon liwan to ngipon. Ko nokoy ka po-il din to songo otow ian ka po-il no iglogpad now kandin. 21 Ko hontow ka oghimatoy to adyam ogliwan to pighimatadyan din, di ko hontow ka oghimatoy to otow ogkohimatadyan now ian sikandin. 22 Sikan dod ka udlin agad ko dagpu no otow woy ko tag-inugpo.’ Sikoddi ka Magboboot no Igbudyag now.”
23 No nigkagi si Mosis duon to mgo otow to Israil, woy pig-aap dan ka otow no nigtungadyow to Magboboot dio to libuwasan to pig-ugpaan to mgo otow, woy pigdorogpak dan sikandin to batu. Nigbabali ian ka mgo otow to Israil to insugu to Magboboot.