10
Ka Pogkamatoy to Mgo Anak ni Aaron
1 No kuntoon, pigpurut ni Nadab woy ni Abihu no mgo anak ni Aaron ko mgo tutunganan dan to palina, woy pigsooran dan to hapuy woy to palina, woy nigtaruwoy sikandan to hapuy duon to Magboboot no waro din sugua no nig-atu sikandan to innangon din. 2 No sikan ian niglibuwas ka hapuy puun to tangkaan to Magboboot woy pig-aboong sikandan to hapuy no nammatoy sikandan duon to tangkaan to Magboboot.
3 No nigkagi si Mosis duon ki Aaron to “Soini ka innangon to Magboboot to pogkagi rin to ‘Ipakita ku to mgo otow no ogdani koddi no in-oog a; ogkabantug a to pogpitow to mgo otow.’” Waro mogkagi si Aaron.
4 Inpo-umow ni Mosis si Misail woy si Ilsapan no mgo anak to anggam ni Aaron no si Usiil, woy pignangonan din sikandan to “Kai kow; aapa now ka mgo suod now libuwas to pig-ugpaan to mgo otow, no ipamariu now to tangkaan to in-oog no tukbung.”
5 No nigdani sikandan woy pig-aap dan ka mgo lawa ni Nadab woy ni Abihu no nigsau-ub pad to mgo kinabo to taagpanubad, dio to libuwasan to pig-ugpaan to mgo otow, sumao to insugu ni Mosis. 6 No nigkagi si Mosis ki Aaron woy to mgo anak din no lukos no si Iliasar woy si Itamar to “Dokow ogbaagara ka bulbul now no kono ogsugkaron, woy dokow oghigbita ka mgo kinabo nowa, su ko oghimuon now sikan ogkammatoy kow woy ogkabou ka Magboboot to tibon koot-otawan. Di ogpakapandaawit ka mgo karumahan now woy ka tibon lunggunan to Israil tongod to mgo otow no pighimatadyan to Magboboot pinabadyo to hapuy. 7 Dokow oglibuwas to gomawan to Tukbung to Pogtangko, odyow no kono kow ogkammatoy, hoo su pig-oog kow pinabadyo to lana to Magboboot no inbus-ug kaniu.” No pigbabali ran ka innangon ni Mosis.