26
Mgo Pogbolig Ko Ogtooron Ka Kasabutan
1 “Dokow oghimu to mgo tinuuhan, woy dokow ogpasasindog to inotowotow woy ko in-oog now no batu, woy dokow ogsabuk to binas-basan no batu to tano now no ogluhuran now no tinuuhan. Sikoddi ka Magboboot no Igbudyag now.
2 “Doromdoma now ka mgo allow ku to Poghimooy, woy ilaha now ka koddi no in-oog no baoy. Sikoddi ka Magboboot.
3 “Ko ogsundul kow to tibon mgo udlin ku, woy ogpoomot kow to pogbabali to tibon mgo sugu ku, 4 ogpa-aapan ku sikaniu to uran to litos no buwan, woy ogpabogas ka tano to mgo pinamua, woy ogbogoy ka mgo kadyu to bogas dan. 5 Kono kow ogpakaponga to pogdiok to ginaab no bogas no oglopow on ka buwan to pogpamu-pu to mgo ubas, woy kono ogkatakas ka pogpamu-pu to mgo ubas no oglopow on ka buwan to pog-oorok, woy ogkabuung kow to pogkoon woy waro igkasasow to pog-ugpo now to tano now. 6 Ogbogadyan ku sikaniu to maawang no pog-ugpo, woy ogpokohirogo kow no waro igkahallok now no otow. Ogdogilon ku ka tibon mgo mabuut no mgo magintaunan to tano now, woy waro otow no oglusud to pig-ugpaan now no tano no og-aap to kampilan. 7 Ogpakagapun kow to mgo usig now, woy ogkakapood sikandan to tangkaan now pinabadyo to kampilan. 8 Lalima kaniu ka ogpakagapun to songo gatus no otow, woy songo gatus kaniu ka ogpakagapun to sampuu no libu no otow, woy ogkakapood ka mgo usig now to tangkaan now pinabadyo to kampilan. 9 Ogmarodyowon ku ka goinawa ku kaniu woy ogmoon-ing kow woy ogtooron ku ka kasabutan ku kaniu. 10 Kono kow pad ogtakas to pogkoon to bogas to sagboka no tuid ko oglopow on ka iam no bogas no og-awoon now ka taan odyow no duon ogkasabukan now to iam. 11 Og-ugpo a to taliwaro now, woy kono ku ogsamilian sikaniu. 12 Ogdumaruma a kaniu woy ogkohimu a no Magboboot now woy ogkohimu kow no koot-otawan ku. 13 Sikoddi ka Magboboot no Igbudyag now no nig-aap kaniu ligkat to Ehiptu odyow no kono kow on ogko-uripon to mgo otow to Ehiptu; piggopu ku ka mgo yugu no intiang now odyow no ogpokohipanow kow no kono ogkagukut.”
Mgo Tungadyow ko Kono Ogbabalion ka Kasabutan
14 “Di, ko kono kow ogpannalinga koddi, no kono kow ogbabali to soini tibon mgo sugu ku, 15 woy ko ogkasubali kow to mgo udlin ku woy ogsamilian now ka mgo balaod ku woy kono now ogtooron ka mgo sugu ku no ogligal kow to pogbabali to kasabutan ku, 16 no soini ka oghimuon ku kaniu: ogpatokowan ku sikaniu to mokohinhinaat no igkahallok, mgo dau no igmaggaso now, woy no ogmoinit kow no ogkabutud kow woy ogmaotoy kow. Kono now ogkapuusan ka pog-orok now su ka mgo usig now ian ka ogkoon to bogas. 17 Og-atuan ku sikaniu odyow no ogkaroog kow to mgo usig now; ogkabobootan kow to mgo otow no nigdomot kaniu, woy ogpanlaguy kow agad no waro niggapon kaniu.”
18 “Ko kono kow pad ogpannalinga koddi takas to sikan, oglogparan ku sikaniu no ogsulian ku sikaniu to papitu no akob tongod to mgo sao now. 19 Ogguguson ku ka pogparakol-dakol now no waro katamanan woy og-unawa to putow ka langit no kono og-uran woy og-unawa to brunsi ka tano. 20 Kono ogkapuusan ka dadyagang now, su kono ogbogoy ka tano now to bogas din, woy kono ogpamogas ka mgo kadyu to tano.”
21 “Ko ogparagas kow no og-usigon a now no ogligal kow to pogpannalinga koddi, ogtimuan ku ka igkabaybadyari now to papitu no akob, no ian ka litos no logpad to mgo sao now. 22 Ogpa-aapan ku sikaniu to mgo mabuut no magintaunan, woy og-agowon dan ka mgo anak now, ogpanghimatadyan dan ka mgo adyam now woy ogmaintok kow on taman to warad otow no ogkakitaan no oghip-hipanow to mgo daan now.”
23 “Ko agad takas to sikan kono kow pad ogpamminog to pogsapad ku kaniu no ogparagas kow to pog-usig koddi, 24 songo og-usigon ku sikaniu woy ogsulian ku ka mgo sao now to papitu no akob. 25 Ogpa-aapan ku sikaniu to kampilan no ogsulian kow tongod su waro now toora ka kasabutan ku kaniu. Ko ogpanlaguy kow pohondio to mgo lunsud now ogpa-aapan ku sikaniu dio to mokohinhinaat no dau, woy ogkarakop kow to mgo usig now. 26 Ko ogtamporon ku ka ogligkatan to pan now, sampuu do no boi ka ogpakahilutu to tibon pan now, woy ogkohilutu dan to sagboka ro no hilutuanan. Og-ong-ongoron dan ka pan to pogpambogoy ran. Ogkokoon kow di kono kow ogkabuung to pogkoon.”
27 “Ko agad takas to sikan kono kow pad ogpamminog koddi di ogparagas kow to pog-usig koddi, 28 og-usigon ku sikaniu pinabadyo to kabou ku, woy koddi ian ka ogsuli kaniu to papitu no akob tongod to mgo sao now. 29 Ogkoonon now pad ka sapu to mgo anak now no lukos woy ka sapu to mgo anak now no boi. 30 Ogguguson ku ka mgo tubaranan now to ampow to mgo bubungan, woy ogpooron ku ka mgo tutunganan now to palina, woy oglimuron ku ka mgo namatoy no lawa now ampow to mgo inotowotow now no songo waro goinawa, woy ogkarootan a to pogpitow kaniu. 31 Oglupoton ku ka mgo lunsud now woy ogguguson ku ka mgo in-oog no longod now, woy kono ad on ogkohomutan to pogngarog to mgo igpanubad now. 32 Ogmarooton ku ka tano now odyow no ogkohinaatan to mgo usig now no og-ugpo duon. 33 Igpansawod ku sikaniu duon to mgo loinloin no mgo nasud, woy oghuabuton ku ka kampilan ku woy oggaponon ku sikaniu, woy ogmarooton ku ka tano now woy ogko-ongkoran ka mgo lunsud now no nagugus. 34 No bali ogpakagoram ka tano to mgo tuid to poghimooy rin tagood no og-ugpo kow duon to mgo usig now no waro ogtarabau duon; sikan ian ogpakahimooy ka tano woy ogkabuung to mgo tuid to poghimooy rin. 35 Tagood to tibon mgo tuid no waro ogtarabau duon, ogpakahimooy ka tano to mgo tuid to poghimooy no waro now toora to duon kow pad. 36 Oghinallokon ku lagboy ka mgo otow no ogkagaat no nig-ugpo taliwaro to mgo usig dan odyow ko agad ogdinog sikandan to doun no naladyap to kaamag ogpanlaguy sikandan. Ogpallaguy sikandan unawa to otow no oggaponan to kampilan, woy ogpakarogpak sikandan agad no waro niggapon kandan. 37 Ogpokogsalsaligkat sikandan iing to oggaponon sikandan to kampilan, agad no waro niggapon kandan. No sikan ian no kono kow ogpaka-atu to mgo usig now. 38 Ogkammatoy kow duon to taliwaro to loinloin no mgo nasud woy unawa to og-aboongon kow to tano to mgo usig now. 39 Ogmaggaso ka mgo otow kaniu no ogkagaat no manokal dio to tano to mgo usig dan no oglogparan sikandan tongod to mgo sao dan woy tongod to mgo sao to mgo amoy ran ogmaintok sikandan.”
40 “Di ko og-abin sikandan no nakasao sikandan woy og-abinon dan ka sao to mgo amoy ran no nig-atu koddi woy no nig-ongkod koddi, 41 no ian ka pugtian to pog-atu ku kandan woy to pogdogil ku kandan pohondio to tano to mgo usig dan - no, ko ogpasaad-saad sikandan to goinawa ran no nigparakol-dakol, woy ko ogbadyaran dan on ka logpad tongod to mgo sao dan, 42 ogdoromdomon ku ka kasabutan ku ki Jacob, ki Isaak woy duon ki Abraham woy ogdoromdomon ku ka tano dan. 43 Hoo su ogko-ongkoran dan ka tano woy ogkabuung sikan to mgo tuid din to poghimooy tagood to noongkoran dan. Ogbadyad sikandan tongod to mgo sao dan su pigsamilian dan ka mgo balaod ku woy pigdomotan dan ka mgo udlin ku. 44 Di agad to sikan tibo, to dio sikandan to ugpaan to mgo usig dan, kono kud ogsamilian sikandan woy kono kud ogdomotan sikandan odyow no ogkoubus sikandan ogkaawo, su ko warad sikandan kono ogkatood ka kasabutan ku kandan. Sikoddi ka Magboboot no Igbudyag dan. 45 Di tongod to koid-u ku kandan ogdoromdomon ku ka kasabutan ku to mgo kabuybudyagan dan no pig-aap ku ligkat to Ehiptu to tangkaan to pogpitow to mgo koot-otawan odyow no ogkohimu a no Magboboot dan. Sikoddi ka Magboboot.”
46 Sikan ian ka mgo udlin, mgo balaod woy mgo tuaro no inpalogsad to Magboboot dio to bubungan to Sinai taliwaro kandin woy to mgo otow to Israil pinabadyo ki Mosis.