34
Si Dina Woy Si Sikim
1 Kuntoon, nanumbaoy si Dina no anak ni Lia woy ni Jacob to mgo boi to sikan no ugpaan. 2 Ka igbudyag to sikan no ugpaan ian si Hamor no kapunganan ni Hib, woy duon anak din no si Sikim. To pogkakita ni Sikim ki Dina, piggon-gonan din, woy piglogos din si Dina. 3 Nigdakol ka goinawa ni Sikim ki Dina no anak ni Jacob, woy nig-aaukuy sikandin ki Dina woy pig-im-imuan din. 4 Nignangon si Sikim to amoy rin no si Hamor to “Puruti a nu to soini no boi, odyow no og-asawoon ku sikandin.”
5 To pogkarinog ni Jacob no pigligsoman ka anak din no si Dina, dio pad to mariu ka mgo anak din duma to mgo adyam dan. No sikan ian waro sikandin nigkagi-kagi taman to noko-uli on sikandan.
6 No nighipanow si Hamor no amoy ni Sikim odyow to pog-a-aukoy ki Jacob.
7 Nig-uli ka mgo anak ni Jacob to pogkarinog dan to pighimu ki Dina. Nigmasakit lagboy ka mgo goinawa ran, woy nabou sikandan su maroot lagboy ka pighimu ni Sikim to koot-otawan ni Israil to poghulid din to anak ni Jacob; waro otow poron no oghimu to iing duon.
8 Di nignangon si Hamor kandan to “Dakol so goinawa to anak ku no si Sikim dio to anak now no boi. Ibogoy now kun sikandin ki Sikim su og-asawoon din. 9 Marodyow ko ogkasagboka ki no koot-otawan no og-asawa koy to mgo anak now no mgo boi, woy songo og-asawa kow to mgo anak noy no boi. 10 Ogpoko-ugpo kow kai to tano noy, waro ogbaabag kaniu to pog-ugpo to soini no tano. Kai kow og-ugpo, woy ogpakapanaliu kow kanami, woy ogpakatagtuun kow to tano.”
11 No nigkagi si Sikim dio to amoy woy mgo ma-ama ni Dina to “Ko ogkoiniatan a now, igbogoy ku ka agad nokoy no ogbudyuon now. 12 Ogbadyad a to agad nokoy no dakol no ogbudyuon now ko igbogoy now ka boi no og-asawoon ku.”
13 Tongod su pigligsoman si Dina, niggawoy ka mgo anak ni Jacob to pogtabak dan ki Sikim woy to amoy rin no si Hamor. 14 Nignangon sikandan to “Kono ogkohimu sikan; kono koy ogpakabogoy to atoboi noy no og-asawoon to otow no waro matuli. Ogpakasipod kanami ka unawa to sikan. 15 Igbogoy noy ro sikandin ko ogbabali kow to soini no ignangon noy; igpatuli now ka tibo no mgo lukos now odyow no og-uunawa kinow. 16 Ko sikan ka oghimuon now, igpa-asawa noy kaniu ka mgo anak noy no boi, woy songo og-asawa koy to mgo anak now no boi. Og-ugpo koy ro kai to kaniu, woy ogkasagboka ki ro no koot-otawan. 17 Di ko kono kow ogpatuli, og-awo koy kai woy og-aapon noy ka atoboi noy.”
18 Inat narodyowan si Hamor woy si Sikim to innangon dan. 19 Waro moglianlian si Sikim no babantugi to mgo anak ni Hamor to poghimu to innangon dan, hoo su dakol ka koiniat din to anak ni Jacob no si Dina. 20 No nighondio si Hamor woy ka anak din no si Sikim dio to gomawan to lunsud odyow to pog-a-aukoy to mgo tag-inugpo dan. 21 Nigkagi sikandan to “Marodyow ka pog-otow-otow to soini no mgo otow kanta. Marodyow ko ogbabali ki no og-ugpo sikandan kai no ogsaliu to kanta. Mau-ag ka tano no litos pad kandan. Ogpaka-asawa ki to mgo anak dan no boi, woy songo ogpaka-asawa sikandan to mgo anak ta no boi. 22 Di kono og-ugpo sikandan kai no ogsagboka kanta ko kono ki ogpatuli no mgo lukos, iing to natuli sikandan. 23 Ko ogbabali ki, sikanta ka ogpakatagtuun to mgo adyam dan, woy mgo kaaglagan dan. No ogbabali ki poron odyow no og-ugpo sikandan kai to kanta.”
24 Nigbabali ka tibon mgo lukos no nanlimud to gomawan to lunsud to mgo innangon ni Hamor woy ni Sikim no anak din. Sikan ian no nigpatuli ka tibon mgo lukos to lunsud.
25 To igkatou no allow, tagood to nasakitan pad ka mgo lukos, nighondio dio to lunsud si Simion woy si Livi no mgo anak ni Jacob woy mgo ma-ama ni Dina. Nig-aap sikandan to mgo kampilan dan woy piglusuran dan ka lunsud, woy pigpanghimatadyan dan ka tibon mgo lukos. 26 Songo pighimatadyan dan no pigtigbas si Hamor woy si Sikim no anak din, woy pighawi dan si Dina puun to baoy ni Sikim, woy nighipanow sikandan.
27 Nighondio ka ruma no mgo anak ni Jacob to lunsud woy nakita ran ka mgo lawa to mgo nammatoy. Nigpamurut sikandan to mgo kaaglagan to lunsud su pigligsoman ka atoboi ran dio. 28 Pig-agow ran ka tibon mgo adyam no mgo karniru, mgo kambing, mgo baka woy mgo asnu, woy songo pig-agow ran ka tibon mgo kaaglagan no duon to lunsud woy dio to mgo kamot. 29 Pigpurut dan ka tibon karatuan to lunsud lagkos to mgo boi woy mgo bato woy pig-agow ran ka tibo no duon to mgo baoy.
30 Nignangon si Jacob ki Simion woy ki Livi to “Intinuud a now to karootan, su inat narootan on to pogpipitow kanak ka mgo koot-otawan no nig-ugpo to soini no tano no mgo kapunganan ni Canaan woy ni Piris. Maintok ki ro, woy ko ogkasagboka sikandan no og-atu kanak, ogkamatoy a duma to tibon lunggunan ku.”
31 Di nigtabak si Simion woy si Livi to “Litos buwa no og-iingon dan to pogpipitow ka atoboi noy to agkadyon no boi?”