33
Nigtomu Si Jacob Ki Esau
1 Nigtonggak si Jacob woy nakita rin si Esau no oglopow duma to hop-at no gatus no otow rin. No pigbaad ni Jacob ka mgo anak din dio to ki Lia woy ki Rakil woy to daruwa no suguonon dan. 2 Inpohun-a rin ka mgo suguonon duma to mgo anak dan, nigsinundul si Lia kandan duma to mgo anak din, woy nigmouri si Rakil duma ki Jose. 3 Nighun-a si Jacob to mgo boi woy mgo anak din, woy nig-unduk sikandin to kapapitu to pogdani rin to kakoy rin. 4 Di nigpallaguy si Esau no nigtomu ki Jacob, woy pigkopkopan ni Esau si Jacob woy pigharokan din, woy naninogow sikandan daruwa. 5 Nigtonggak si Esau woy pigkita rin ka mgo boi woy ka mgo bato. Nig-inso sikandin ki Jacob to “Hontow soini no nigduma koikow?”
Nigtabak si Jacob to “Sikandan ka mgo anak no inbogoy to Magboboot tongod to koid-u rin to soini no suguonon nu.” 6 No nigdani ka daruwa no mgo suguonon duma to mgo anak dan woy nangunduk sikandan. 7 Songo nigdani si Lia duma to mgo anak din, woy nangunduk sikandan. To mourian, nigdani si Jose woy si Rakil, woy songo nangunduk sikandan.
8 Nig-inso pad si Esau to “Nokoy ka tuud nu to pogpa-aap to sikan no mgo ka-adyaman no natomuan ku?”
Nigtabak si Jacob to “Igbudyag ku, inpa-aap ku sikandan odyow no ogkoid-uan a nu.”
9 Di nigtabak si Esau to “Marasig on ka mgo adyam ku, suod. Dio nu ro to koikow sikan.”
10 Kagi ni Jacob to “Dokag iing! Ko narago ka to pogpitow kanak, tinawaa nu sikan no igbogoy ku kuna. Hoo su inat nakita ku ka langlanguan to Magboboot to pogkakita ku to langlanguan nu no waro ka nabou kanak. 11 Tinawaa nu soini no igbogoy ku kuna, su noid-uan a to Magboboot no litos pad ka duon kai to kanak.” Woy tongod to pogbaghot ni Jacob, pigtinawo ni Esau ka mgo inbogoy ni Jacob. 12 No nigkagi si Esau ki Jacob to “Oghondio kid on. Ogduma a koikow.”
13 Di nignangon si Jacob kandin to “Igbudyag ku, nataga ka no mallintok pad ka mgo anak ku, woy no ogbantadyan ku pad ka mgo karniru woy mgo baka no nigpasusu pad to mgo nati ran. Ko ogdagusuon ku sikandan agad to sagboka ro no allow, ogkammatoy sikandan. 14 Hun-a ka ro to soini no suguonon nu, no ognanoynanoy a ro duma to soini no mgo adyam ku woy mgo anak ku no mannanoy, taman to poglopow ku dio’t koikow dio to Siir.”
15 No nigtabak si Esau to “Ko sikan naan, igaat ku ro ka mgo otow ku no ogbulig koikow.” Nigtabak si Jacob to “Manio no oghimu ka to sikan? Litos on kanak no narago ka to pogpitow nu kanak.”
16 No to sikan no allow nighipanow si Esau to pog-uli dio to Siir. 17 Dokad di si Jacob nighipanow pohondio to Sukot, woy nigpos-ok sikandin to og-ugpaan din dio, woy nighimu sikandin to mgo pinadyag to mgo adyam din. Sikan ian no pighingaranan ka sikan no longod to Sukot su ogpasabut sikan to ‘pinadyag.’
18 Takas to nigligkat si Jacob to Paddan Aram, niglopow sikandin to lunsud to Sikim to Canaan no waro ogkasasawan din woy nigpos-ok sikandin to mgo tukbung din to longod no ogkakitaan ka lunsud. 19 Nigboli si Jacob to tano no pigpos-okan din to mgo tukbung din puun to mgo anak ni Hamor no amoy ni Sikim to songo gatus no saapi.
20 Nighimu si Jacob to tubarananadio, woy pighingaranan din ka sikan no ugpaan to Il Ilohi Israil, no to kanta pad “Ka Magboboot ian ka Igbudyag ni Israil.”