32
Nigbabantaan Si Jacob To Pogtomu Ki Esau
1 Songo nighipanow si Jacob, woy pigtomu sikandin to mgo diwata to Magboboot. 2 To pogkakita ni Jacob kandan, nignangon sikandin to “Soini ka ugpaan to karasigan to Magboboot” no pighingaranan ni Jacob ka longod to Mahanaima. 3 Pigpohipanow ni Jacob ka mgo suguonon din no oghun-a kandin dio to kakoy rin no si Esau dio to tano to Siir dio to Idom. 4 Nignangon si Jacob kandan to “Soini ka inangon now to igbudyag ku no si Esau. Nangon kow to “Nignangon ka suguonon nu no si Jacob no nig-ugpo sikandin ki Laban taman kuntoon. 5 Duon on pig-aap din no mgo baka, mgo asnu, mgo karniru woy kambing, mgo suguonon no mgo lukos woy mgo boi. Kuntoon nigbudyu sikandin to igbudyag din no kono ka poron ogkabou no og-uli sikandin.””
6 To poglibong dio to ki Jacob to mgo suguonon no nigpoitaga ki Esau, nignangon sikandan to “Nighondio koy to kakoy nu no si Esau, woy kuntoon oghongkai sikandin odyow to pogtomu koikow, woy hop-at no gatus no otow ka mgo nigduma kandin.”
7 Nahallok lagboy woy no-ook-ook si Jacob woy pigbaad din ka mgo otow no duma kandin to daruwa. Songo pigbaad din ka mgo adyam no pig-aap din. 8 Hoo su nigsumansuman sikandin to “Ko oglopow si Esau woy ogbokasan din ka sagboka no puntuk, naugpa ogpakapanlaguy ka rangob no puntuk.”
9 No nigpanubad si Jacob no kagi “Magboboot no igbudyag to amoy ku no si Abraham, woy igbudyag to amoy ku no si Isaak, Igbudyag ku no nignangon kanak to pog-uli to pigligkatan ku no tano woy to lunggunan ku woy no ogbuligan a nu, 10 kono a poron no litos to pogtinawo to tibo no karodyowan woy to pogtood nu no inpakita nu kanak no suguanon nu. To pogtalipag ku to Jordan no woig nokani, ka tukod ku ro ian ka na-aap ku di kuntoon nohimu a to daruwa no puntuk. 11 Pangabangi a nu puun to boad to kakoy ku, su nahallok a no ogkalusuran a rin woy ogkammatoy ka mgo inoy duma to mgo anak dan. 12 Di nignangon ka to “Ogboligan ku sikoikow, woy ogmarasigon ku ka mgo kapunganan nu odyow no og-iing sikandan to badyokbok to ilis to dagat no kono ogkasool.””
13 Dio nig-ugpo si Jacob to sikan no maukilom woy nig-aam sikandin to igkabogoy rin to kakoy rin no si Esau puun to mgo duon to kandin. Soini ka pig-aam din; 14 daruwa no gatus no boian no mgo kambing, woy kawaan no mgo lukosan no mgo kambing, daruwa no gatus no boian no karniru woy kawaan no lukosan no karniru, 15 katouan no mgo boian no kamil duma to mgo nati ran, kohop-atan no mgo boian no baka woy sampuu no lukosan no baka, woy kawaan no boian no asnu woy sampuu no lukosan no asnu. 16 Inbogoy rin soini dio to mgo suguonon din no pigloinloin din ka mgo adyam to pogpuntuk. Nignangon sikandin to mgo suguonon din to “Hipanow kow hun-a koddi, woy ol-oati now ka mgo puntuk.”
17 Nignangon si Jacob to nokohun-a no suguonon din to “Ko ogkatomuan ka to kakoy ku no si Esau, woy ko og-inso sikandin koikow to “Hontow ka igbudyag nu, woy oghondoi ka, woy hontow ka tagtuun to soini no mgo adyam no inpohipanow nu?” 18 soini ka igtabak nu kandin, kagi, “Si Jacob no suguonon nu ian ka tagtuun to soini no mgo adyam. Inpa-aap din soini no igbogoy rin to igbudyag ku no si Esau. Ogsundul do sikandin kanami.””
19 Songo nignangon si Jacob to igkaruwa, woy igkatou woy duma pad no og-aap to mgo adyam to “Sikan dod ka igkanangon now ki Esau ko ogkatomu kow rin. 20 Woy dokow ogkalingawi to pognangon no ‘Ogsundul kanami si Jacob no suguonon nu.’”
Sikan ka pighimu ni Jacob su nigsumansuman sikandin to “Ogpohibauon ku ka moinit no goinawa ni Esau kanak pinabadyo to soini no mgo igkabogoy ku. Naugpa ko ogsundul a to mgo inkabogoy ku og-ot-otawon a rin dod.”
21 No sikan ian no nighun-a ka mgo igkabogoy ni Jacob kandin, di nig-ugpo man do sikandin to pigpos-okan din to tukbung din to sikan no maukilom.
22 To sikan no maukilom, nig-onow si Jacob woy pig-aap din ka daruwa no mgo asawa, woy ka mgo as-asawa rin no daruwa woy ka sampuu woy sagboka no mgo anak din no lukos, woy nigtalipag sikandan to Yabok no woig dio to talipaganan. 23 Takas to inpatalipag ni Jacob sikandan, songo inpatalipag din ka tibo no mgo kaaglagan din. 24 No nigpalinggaat si Jacob no sagsagboka ro sikandin to diipag, woy duon otow no niglopow no nigbuog kandin taman to napawo. 25 To pogkakita to otow no kono din ogkagoon si Jacob, pigpogo din ka pangkul ni Jacob odyow no ogkasopangan ka paa ni Jacob to pogpabu-buogoy ran. 26 No nignangon ka otow to “Lokoi a nu su napawo on.” Di nigtabak si Jacob to “Kono a ogloko koikow ko kono a nu ogkaboligan.”
27 Nig-inso ka otow kandin to “Hontow ka ngaran nu?”
Nigtabak sikandin to “Jacob.”
28 Kagi to otow to “Ka ngaran nu konad no si Jacob ko kono no si Israilbon, hoo su nakapabu-buogoy ka to Magboboot woy to otow woy nakaroog ka.”
29 Nignangon si Jacob to “Nangoni a nu to ngaran nu.” Di nigtabak ka otow to “Manio no og-inso ka to ngaran ku?” No pigboligan din si Jacob dio. 30 No pighingaranan ni Jacob ka sikan no longod to Piniil, no to kanta pad langlanguan to Magboboot, su nigkagi sikandin to “Nakakita a to langlanguan to Magboboot, di waro a himatadyi.”