31
Nigpanlaguy Si Jacob Ligkat Ki Laban
1 No kuntoon, nigdinog si Jacob to mgo kinagian to mgo anak no lukos ni Laban no nignangon sikandan to “Pig-agow ni Jacob ka tibo no natagtuun to amoy ta, woy naratu sikandin puun to karatuan to amoy ta.” 2 Woy songo nakakita si Jacob no nohutuk on ka pog-otow-otow ni Laban kandin. 3 No nignangon ka Magboboot ki Jacob to “Uli ka rio to tano to mgo kabuybudyagan nu, dio to mgo karumahan nu, woy ogdumaan ku sikoikow.”
4 No inpo-umow ni Jacob si Rakil woy si Lia odyow to pogtomu kandin dio to tano to longod to mgo adyam din. 5 Nignangon si Jacob kandan to “Nakakita a no nohutuk on to nokani ka pog-otow-otow to amoy now kanak, di nabuligan a to Magboboot no igbudyag to amoy ku. 6 Nataga kow no nigtarabau a to amoy now to tibon dadyagang ku, 7 di pigluk-lukuan a to amoy now no to kosampuu din hut-hutuka ka igbadyad din kanak. Di waro mogbabali ka Magboboot no pighimuan a to amoy now to maroot. 8 Ko nignangon ka amoy now to “Ka mgo mabatok no adyam ian ka igbadyad ku koikow” no nig-anak ka tibon mgo adyam to mgo mabatok. Ko nignangon si Laban to “Ka mgo mabadlis ian ka igbadyad ku koikow” no nig-anak ka tibon mgo adyam to mabadlis no mgo nati. 9 No sikan ian, pigsalinan to Magboboot ka mgo adyam to amoy now, woy nabogadyan a rin.
10 “To sikan no buwan no ogpaobag ka mgo adyam nakatagoinop a, woy nakita ku dio to tagoinop ku no nig-abid ka mgo mabatok woy mabadlis no mgo lukosan no kambing dio to mgo boian. 11 Nigkagi ka diwata to Magboboot kanak dio to tagoinop ku to “Jacob,” no nigtabak a to “Soini a.” 12 No nigkagi pad ka diwata to “Pitow ka no ka tibo no nig-abid no mgo kambing ian ka mgo mabatok woy mgo mabadlis, su nakakita a to tibo no nohimu ni Laban kuna. 13 Kanak ka Magboboot no nakita nu dio to Bit-il, no pigpasasindogan nu to suwoy no batu no pigbus-ugan nu to lana, woy pigpangulibotan nu kanak. Kuntoon ogsuguon ku sikoikow to pog-ongkod to soini no tano woy to pog-uli dio to tano no nootowan nu.’”
14 No nigtabak si Rakil woy si Lia ki Jacob to “Bak, ko ogkabaaran koy rod to tugun-tugunon to amoy noy ko ogkamatoy sikandin? 15 Inat mgo dagpu koy on dio to sumsumanan din. Inbaligyo koy rin, woy noubus din on ka ingkabadyad nu kanami. 16 Sikanami woy ka mgo anak ta poron ka tagtuun to tibo no karatuan nu no insalin to Magboboot to amoy noy. No toora nu ro ko nokoy ka innangon to Magboboot koikow.”
17 No sikan ian inpountud ni Jacob ka mgo anak din woy ka mgo asawa rin dio to mgo kamil, 18 woy inpohipanow rin ka mgo adyam din no ogsinunduon din, duma to tibo no natagtuun din dio to Paddan Aram, woy nighipanow sikandin pohondio to amoy rin no si Isaak dio to Canaan.
19 To poghipanow ni Laban odyow to pogpanampod to mgo bulbul to mgo karniru rin, nigtakow si Rakil to mgo inotowotow puun to baoy to amoy rin. 20 Songo piggawadyan ni Jacob si Laban no matig Aram, su waro nignangon si Jacob no ogpanlaguy sikandin. 21 No nigpanlaguy si Jacob duma to tibo no duon to kandin, woy nigtalipag sikandin to Eupratis no woig no nighipanow sikandin pohondio to mgo bubungan to Gilaad.
22 To igkatou no allow, nakarinog si Laban no nigpanlaguy on si Jacob. 23 Pigparuma ni Laban ka mgo karumahan din no piggapon din si Jacob. To igkapitu no allow, nasaponan din si Jacob dio to mgo bubungan to Gilaad. 24 No nigpakita ka Magboboot ki Laban no matig Aram dio to tagoinop to maukilom no nignangon “Bantadyi nu ka igkanangon nu ki Jacob, agad marodyow woy ko maroot.”
25 Inpos-ok ni Jacob ka tukbung din dio to mgo bubungan to Gilaad to poglopow ni Laban, woy songo nigpos-ok to mgo tukbung dan si Laban woy ka mgo karumahan din. 26 Nig-inso si Laban ki Jacob to “Nokoy soini no pighimu nu? Piggawadyan a nu, woy pig-aap nu ka mgo anak ku iing to pig-agow nu sikandan to pogmangadyow. 27 Mainaan no nighooshoos ka to pogpanlaguy no piggawadyan a nu? Manio to waro ka nignangon kanak odyow no ogpohipanawon ku sikoikow poron duma to karago woy to uaging woy to mgo daging to mgo gimbal woy kuglung? 28 Woy nokoy pad, waro a nu paharoka to mgo apu ku woy mgo anak ku to poghipanow ran. Na-angol ka to poghimu nu to sikan. 29 Su duon kabogbogan ku to pog-ogot koikow; di ganna no maukilom pigtaoson a to Magboboot no igbudyag to amoy nu to “Bantadyi nu ka kinagian nu ki Jacob, agad ko marodyow woy ko maroot.” 30 No, nataga a no nakapanlaguy ka su nasampot ka to lunggunan to amoy nu, di manio no pigtakow nu ka mgo inotowotow ku?”
31 Nigtabak si Jacob to “Nahallok a su naan ku ko ogpogoson a nu to pogpo-ongkod to mgo anak nu. 32 Di, ko ogpakakita ka to otow kai no nigtakow to mgo inotowotow nu, oghimatadyan tad sikandin. Kai to tangkaan to mgo karumahan ta, pitow ka ko duon koikow no mgo kaaglagan kai, woy ko duon, puruta nu.” Kuntoon waro mataga si Jacob no pigtakow naan ni Rakil ka mgo inotowotow ni Laban.
33 No nighondio si Laban dio to tukbung ni Jacob, woy dio to tukbung ni Lia, woy dio to tukbung to daruwa no suguonon, di waro nakita rin. Takas to niglibuwas sikandin to tukbung ni Lia, nigsood sikandin duon to tukbung ni Rakil. 34 Di insabuk ni Rakil ka mgo inotowotow no inhoos din to diraom to hanig to kamil din, woy pigpinnuuan din sikan. Nigpamitow si Laban to tibo no duon to tukbung di waro nakita rin.
35 Nignangon si Rakil to amoy rin to “Dokag kabou kanak, amo, su kono a ogpakasasindog to tangkaan nu, su piglangosa a kuntoon no allow.” No nigpamangho si Laban di waro din makitoi ka mgo inotowotow rin.
36 Nabou si Jacob woy pig-ogotan din si Laban no kagi “Nokoy ka sao ku? Nokoy ka nohimu ku no piggapon a nu? 37 Kuntoon no nigpamitow ka to tibon mgo kaaglagan ku, nokoy ka nakita nu no puun to lunggunan nu? Isabuk nu kai to tangkaan to mgo karumahan ta, woy sikandan ka oghusoy kanta daruwa. 38 Nakatarabau a to kuna to kawaan on no tuid. Waro ma-awoi to anak ka mgo karniru woy mgo kambing nu, woy waro a nakakoon to mgo sapu to mgo adyam nu. 39 Waro ku aapa rio to koikow ka mgo adyam no pighimatadyan to mgo magintaunan; kanak do ka nigliwan to sikan. Woy pinabadyad a nu to agad nokoy no natakow, agad ko allow woy ko maukilom. 40 Soini ka nabadyaan ku: narampil a to moinit no allow, woy nahagsilan a to maukilom woy napuwow a ladyun. 41 Sikan ian ka nabadyaan ku to kawaan no tuid to pog-ugpo ku to lunggunan nu. Nigtarabau a kuna to sampuu woy hop-at no tuid tongod to mgo anak nu, woy nigtarabau a to hon-om no tuid tongod to mgo adyam nu, woy pighutuk nu ka igbadyad nu kanak to kasampuu. 42 Ko waro a buligi to Magboboot no Igbudyag ni Abraham woy Ingkahallok ni Isaak, to maogot ian pigpohipanow a nu poron to waro ogka-aap ku, di nakakita ka Magboboot to mabogat no tarabau ku, woy to koirapan ku, woy pigsaparan ka rin ganna no maukilom.”
43 Nigtabak si Laban ki Jacob to “Ka mgo boi ian mgo anak ku, woy ka mgo bato, mgo anak ku sikandan, woy songo kanak ka mgo adyam. Kanak ka tibo no nakita nu. Di, nokoy ka ogkohimu ku kuntoon tongod to soini no mgo anak ku, woy to mgo anak dan? 44 Ogpapangpangulibotoy ki ro no oghimu ki to saapo.”
45 No nigpurut si Jacob to dakol no batu, woy inpos-ok din sikan iing to suwoy no tuus. 46 Nignangon si Jacob to mgo karumahan din to “Pamurut kow to mgo batu.” No sikan ian, nigpamurut sikandan to mgo batu woy nalimud dan sikan dio to longod to suwoy, woy nangokoon sikandan dio to longod to mgo batu no nalimud.
47 Pighingaranan ni Laban ka piglimud no mgo batu to Yigar Sahaduta, woy pighingaranan ni Jacob sikan to Galiid no to kandan no mgo kinagian ogpasabut to ‘pamaogot no piglimud.’ 48 Hoo su nignangon si Laban to “Soini no piglimud no mgo batu ogkohimu no igpamaogot to pangulibot ta kuntoon.”
49 Songo pighingaranan sikan no longod to Mispa, no to kanta pad ‘Bantadyanan’, su nignangon si Laban to “Ka Magboboot ian ka ogbantoy poron koikow woy koddi to pogpasulsuwadyoy ta. 50 Ko ogpasakitan nu ka mgo anak ku, woy ko ogtimuan nu pad ka mgo asawa nu, agad ko waro otow no ogduma kanta, doromdomon nu no ka Magboboot ogbantoy kanta.”
51 Nigkagi pad si Laban ki Jacob to “Pitow ka to soini no mgo batu no piglimud, woy ka suwoy no inpos-ok taliwaro kanta. 52 Soini no mgo batu, woy soini no suwoy ogpamaogot no kono a ogligad to soini pohondio to koikow odyow to pog-ogot koikow, woy songo ogpamaogot soini no kono ka ogligad to soini pohongkai to kanak odyow to pog-ogot koddi. 53 Ka Magboboot no igbudyag ni Abraham woy ni Nahor woy to amoy ran ian ka oghusoy poron taliwaro kanta.” No nigpangulibot si Jacob pinabadyo to ngaran to Ingkahallok ni Isaak no amoy rin, no ian ka Magboboot. 54 Nigpanubad si Jacob to adyam pinabadyo to hapuy dio to mgo kabubunganan, woy pighinggat din ka mgo karumahan din to poglabung. Takas to nigkoon sikandan, nanhirogo sikandan dio. 55 Masoom pad to pogkapawo, pigpangharokan ni Laban ka mgo apu din woy ka mgo anak din, woy pigboligan din sikandan. No nighipanow si Laban no nig-uli.