30
1 To pogkakita ni Rakil no kono ogpaka-anak sikandin ki Jacob, nigmaroot so goinawa rin ki Lia no kakoy rin. No nignangon sikandin ki Jacob to “Bogadyi a to mgo anak, ko kono, ogkamatoy a!”
2 No nabou si Jacob kandin no nignangon sikandin to “Bak ko kanak bag ka Magboboot no ogpakabogoy a koikow to anak?”
3 No nigtabak si Rakil to “Soini si Bilha no suguonon ku. Huliri nu sikandin odyow no ogpaka-anak sikandin liwan kanak, woy ogpoko-abin a to kapunganan pinabadyo kandin.”
4 No inbogoy ni Rakil ka suguonon din no si Bilha dio to ki Jacob odyow no og-asawoon din. No nighulid si Jacob ki Bilha 5 woy naboros si Bilha, woy naka-anak sikandin to lukos. 6 No nignangon si Rakil to “Nigbogoy ka Magboboot to katarongan to nohimu ku; nigpamminog sikandin to inbudyu ku, woy nabogadyan a rin to anak no lukos.” Tongod to soini, pighingaranan ni Rakil ka bato ki “Dan” no to kanta pad “Nigbogoy to katarongan.”
7 Nighutuk naboros si Bilha no suguonon ni Rakil, woy nighutuk nig-anak sikandin to lukos ki Jacob. 8 Nignangon si Rakil to “Nigpaat-atuoy koy to kakoy ku di nakaroog a.” No sikan ian pighingaranan din ka bato ki “Naptali” no to kanta pad “Ka pog-atu ku.”
9 To pogkakita ni Lia no nighagtong on nig-anak sikandin, inbogoy rin ka suguonon din no si Silpa ki Jacob odyow no og-asawoon din. 10 Nig-anak si Silpa ki Jacob to lukos. 11 Nignangon si Lia to “Ti! Naboligan a.” No pighingaranan din ka bato ki “Gad” no to kanta pad “naboligan.”
12 Nighutuk nig-anak to lukos ki Jacob ka suguonon ni Lia no si Silpa. 13 No nignangon si Lia to “Narago a lagboy. Ogkohingaranan a to mgo boi to ‘narago.’” No, pighingaranan din ka bato ki “Asir” no to kanta pad “Karago.”
14 To buwan to pog-ani ran to trigu, nighondio si Riubin to kamot woy nakapurut sikandin to mgo mandragora,a woy pig-aap din sikan dio to inoy rin no si Lia. Nignangon si Rakil ki Lia to “Bogadyi a kun to duma no mgo mandragora to anak nu.”
15 Di nigtabak si Lia to hari rin to “Kono pad buwa no litos koikow no pig-agow nu ka asawa ku? Ogpuruton nu pad man do ka mgo mandragora to anak ku?”
Nigtabak pad si Rakil to “Ko ogkabogadyan a nu to mgo mandragora to anak nu, ogpokohulid ka ki Jacob kuntoon no maukilom.”
16 Sikan ian, to pog-uli ni Jacob puun to kamot to sikan no maapun, pigtomu sikandin ni Lia woy nignangon si Lia to “Oghulid ka kanak kuntoon no maukilom su pigsaliuan ku sikoikow to mgo mandragora to anak ku.” No sikan ian nighulid si Lia ki Jacob to sikan no maukilom.
17 Nigpamminog ka Magboboot to inkoiniat ni Lia, woy naboros si Lia, woy naka-anak sikandin to igkalima no anak no lukos ki Jacob. 18 No nignangon si Lia to “Pigdassagan a to Magboboot su inbogoy ku ka suguonon ku dio to asawa ku.” No pighingaranan ni Lia ka anak din ki “Isakar” no to kanta pad “dassag” ko “insaliu.”
19 Nighutuk naboros si Lia, woy naka-anak pad to igkohon-om no lukos ki Jacob. 20 No nignangon si Lia to “Pigbogadyan a to Magboboot to mahal no inbogoy. Kuntoon ogtahuron a to asawa ku su naka-anak a to hon-om no lukos kandin.” No pighingaranan din ka anak din ki “Sibulun,” no to kanta pad “Tahud.”
21 To mouri nig-anak si Lia to boi no pighingaranan din ki “Dina” no to kanta pad “katarongan.”
22 No naroromdom to Magboboot si Rakil; nigtabak sikandin to mgo panubad din, woy pigpuasan din ka aanakan ni Rakil. 23 Naboros si Rakil, woy naka-anak sikandin to lukos woy nignangon sikandin to “Pig-awo to Magboboot ka igkasipod ku.” 24 Pighingaranan din ka anak din ki “Jose,” no to kanta pad “timul” su nignangon sikandin to “Ogkatimuan pad poron to Magboboot ka mgo anak ku to sagboka.”
Nigtarabau si Jacob duon to mgo Adyam ni Laban
25 Takas to nig-anak on si Rakil ki Jose, nignangon si Jacob ki Laban to “Pohipanawa ad, odyow no ogpoko-uli a rio to pigpuunan ku no tano. 26 Ibogoy nud kanak ka mgo asawa ku woy mgo anak ku, su nigtarabau a kuna tongod kandan, woy oghipanow a ro. Nataga ka ko monu karakol ka tarabau ku koikow.”
27 Di nigtabak si Laban kandin to “Ko narago ka kanak, ugpo ka ro kai. Nataga a pinabadyo to pogtimao no naboligan a to Magboboot tongod kuna.”
28 Nigtimul pad si Laban to “Nangoni a nu ro ko nokoy ka igkabadyad ku kuna, woy ogbadyaran ku sikoikow.”
29 Nignangon si Jacob kandin to “Nataga ka to tarabau ku kuna, woy ko nokoy ka pog-ugpo to mgo adyam nu no nabantadyan ku. 30 Ka maintok no duon to koikow to waro a pad niglopow nohimu no marasig, woy naboligan ka to Magboboot ko agad hondoi no nahondiaan ku. Di kuntoon, kon-u a pad ogpakatarabau to kanak no lunggunan?”
31 Nig-inso si Laban to “Nokoy ka igkabogoy ku kuna?”
Nigtabak si Jacob to “Kono a nu ogbogadyi to agad nokoy, di babalia nu ro ka ogbudyuon ku. Ogparagas a to pogbantoy to mgo adyam nu: 32 di kuntoon baagara a nu to poghondio to mgo adyam nu woy to poglunsud to tibon mgo mabatok woy mabadlis no mgo karniru woy kambing woy mgo moitom no nati no karniru. Ogkohimu sikandan no igkabadyad nu koddi. 33 Uromo ogkatagaan a nu ko ogpanluku a su ko ogpakakita ka to adyam no kono no mabatok ko mabadlis dio to mgo adyam ku, ogkadoromdom nu sikan no pigtakow ku.”
34 “Marodyow” nigkagi si Laban. “Sikan ian ka oghimuon ta.”
35 Dokad di to sikan ian no allow piglunsud ni Laban ka tibo no mgo mabatok woy mabadlis no mgo adyam no mgo lukos woy boi (ian ka tibo no duon maputi to laplap dan), woy ka mgo moitom no mgo nati no karniru woy inbogoy rin sikandan dio to mgo anak din no lukos odyow no ogkabantadyan dan. 36 No nighipanow si Laban to kariu-an to tatou no allow to poghipanow puun ki Jacob, tagood nigparagas si Jacob to pogbantoy to nagaat no mgo adyam ni Laban.
37 Di, nigpurut si Jacob to mgo moilow no sugpang to mgo kadyu no alamo, almindras woy platano, woy piglugtian din to maintok odyow no mabatok pitawon, su ogkitoon ka kadyu no maputi dio to diraom to lugtion no moitom-itom. 38 Insabuk din ka mgo mabatok no sugpang dio to inomanan to mgo adyam odyow no ogkitoon to mgo adyam ko og-inom sikandan. To pog-inom dan 39 nigmaab-abiroy sikandan dio to tangkaan to mgo sugpang, woy naka-anak sikandan to mgo mabatok woy mabadlis no mgo nati. 40 Piglunsud ni Jacob ka mgo nati woy inpaabid din ka mgo mabatok woy moitom-itom no mgo adyam no nagaat ni Laban woy sikan ian piglunsud din ka mgo adyam din woy ka mgo adyam ni Laban.
41 Nokoy pad, ko nigpaobag ka mgo maambog no mgo boian, insabuk ni Jacob ka mgo sugpang dio to inomanan dan, 42 di ko nigpaobag ka mgo maotoy no mgo adyam, waro insabuk ni Jacob ka mgo sugpang. Sikan ian no ka mallotoy no adyam ian tagtuun si Laban, woy ka mallambog ian tagtuun si Jacob. 43 To sikan ian, naratu lagboy si Jacob taman to nakatagtuun sikandin to marasig no mgo karniru woy kambing, mgo suguonon no mgo lukos woy mgo boi, woy mgo kamil woy mgo asnu.