29
Nig-asawa Si Jacob Ki Lia Woy Ki Rakil
1 Nigparagas nighipanow si Jacob, woy niglopow sikandin to tano to mgo otow dio to ogsilaan. 2 Nigkita sikandin to sakuganan dio to tano, woy duon tatou no puntuk to mgo karniru no nanbubuuku marani to sakuganan su nigpoinom ka mgo otow to mgo karniru ran puun to sikan no sakuganan. Dakol ka batu no insagpong dan to sakuganan. 3 To nalimud on ka tibon mgo puntuk to karniru, pigliid to mgo taagbantoy ka batu puun to bo-bo to sakuganan woy pigpoinom dan ka mgo karniru. To pogtakas on to pog-inom to mgo adyam, inlibong to mgo otow ka batu dio to bo-bo to sakuganan.
4 Nig-inso si Jacob to mgo taagbantoy to karniru to “Mgo suod, matig hondoi kow?”
“Matig Haran koy,” ian ka tabak dan.
5 Nig-inso pad si Jacob to “Noko-ila kow buwa ki Laban no apu ni Nahor?”
Nigtabak ka mgo taagbantoy to “Hoo, noilaan noy sikandin.”
6 Nig-inso pad si Jacob to “Manokal pad buwa sikandin?”
Nigtabak sikandan to “Hoo, manokal sikandin, woy pitow ka su oglopow on ka anak din no si Rakil duma to mgo karniru ran.”
7 Kagi ni Jacob to “Pitow kow ma-allow pad soini woy kono pad no litos no ogpunpunon now ka mgo karniru. Mainaan no kono now ogpoinomon sikandan woy pasabsaba now pa?”
8 Nigtabak sikandan to “Kono ogkohimu sikan su ogtagaran noy pad taman to ogkalimud on ka tibon mgo karniru woy og-awoon noy ka batu to sakuganan, woy koy ogpoinom to mgo karniru.”
9 Tagood to nig-aaukuy pad si Jacob kandan, nigdatong on si Rakil duma to mgo karniru to amoy rin, su taagbantoy to mgo karniru sikandin. 10 To pogkakita ni Jacob ki Rakil no anak ni Laban no anggam din, duma to mgo karniru ni Laban, nighondio sikandin to sakuganan, woy pigliid din ka batu puun to bo-bo to sakuganan woy pigpoinom din ka mgo karniru to anggam din. 11 No pigharokan ni Jacob si Rakil woy nigbunsud si Jacob to pogsinogow tongod to karago din.
12 Nigkagi si Jacob ki Rakil to “Anakon a to amoy nu, su anak a ni Ribika.” No nigpallaguy si Rakil odyow to pognangon dio to amoy rin.
13 To pogkarinog ni Laban to innangon tongod ki Jacob no anak to atoboi rin, nig-agpas sikandin nigtomu ki Jacob. Pigharokan ni Laban si Jacob, woy pig-aap din sikandin to pog-uli to baoy rin. Dio, nignangon-nangon si Jacob to tibo no nabadyaan din.
14 Nignangon si Laban ki Jacob to “Ti! Naan ta no mariu ka no otow di anakon ku naan sikoikow.”
Takas to nig-ugpo si Jacob dio to songo buwan on, 15 nignangon si Laban kandin to “Agad ko karumahan a nu, kono ka poron ogtarabau kanak no waro badyad. Nangoni a nu ro ko nokoy ka litos no igkabadyad ku koikow.”
16 No kuntoon daruwa ka mgo anak no boi ni Laban. Ka kakoy ian si Lia woy ka hari ian si Rakil. 17 Maotoy ka mgo mata ni Lia, di marodyow lagboy pitawon no boi si Rakil to lawa woy to langlanguan. 18 Dakol on so goinawa ni Jacob ki Rakil; nokoy naan no nigtabak sikandin ki Laban to “Ogtarabau a koikow to papitu no tuid ko ogpaka-asawa a to hari no anak nu no si Rakil.”
19 Nigtabak si Laban to “Marodyow pad ian ko koikow ka og-asawa kandin woy kono poron ogpokohondio sikandin to duma no lukos. Ugpo ka kai duma kanak.”
20 No, sikan ian nigtarabau si Jacob ki Laban to papitu no tuid odyow no ogpaka-asawa sikandin ki Rakil, di inat magaan do no mgo allow to pogdoromdom din tongod to dakol no goinawa rin ki Rakil.
21 No nignangon si Jacob ki Laban to “Ibogoy nud on kanak ka og-asawoon ku su napongaan kud on ka innangon ku no papitu no tuid, woy ogkoiniat a to poghulid kandin.”
22 No piglimud ni Laban ka tibon mgo otow to sikan no ugpaan, woy nighimu sikandin to pagkoonan. 23 Di to pogkamaukilom on, pigpurut ni Laban ka anak din no si Lia woy sikandin ka inbogoy rin ki Jacob, woy pighuliran ni Jacob si Lia. 24 Songo inbogoy ni Laban ka suguonon din no si Silpa odyow no oghimuon ni Lia no suguonon din.
25 To pogkapawo poggimuat on ni Jacob nakakita sikandin no si Lia naan ka nahuliran din! No, nignangon si Jacob ki Laban to “Nokoy soini no pighimu nu kanak? Waro a buwa nakatarabau koikow odyow no og-asawoon ku si Rakil? Manio no piggawadyan a nu?”
26 Nigtabak si Laban to “Waro kapunganan noy kai no ka hari ka ogpokohun-a to kakoy no og-asawa. 27 Hipongaa nu ro ka papitu no allow no igpangasawa to soini no anak ku, woy igbogoy ku koikow ka hari rin no og-asawoon nu ko ogtarabau ka to papitu pad no tuid kanak.”
28 No, nigbabali si Jacob. Naponga rin ka papitu no allow duma ki Lia, woy inbogoy ni Laban si Rakil odyow no og-asawoon ni Jacob. 29 Inbogoy ni Laban ka suguonon din no si Bilha ki Rakil no anak din odyow no oghimuon ni Rakil no suguonon din. 30 Songo nighulid si Jacob ki Rakil, woy dakol-dakol pad ka goinawa rin ki Rakil woy ki Lia. Nigtarabau pad si Jacob ki Laban to papitu no tuid.
Mgo Anak Ni Jacob
31 To pogkakita to Magboboot no waro dakol no goinawa ni Jacob ki Lia, pigpaanak din si Lia, di kono ogpaka-anak si Rakil. 32 Naboros si Lia, woy naka-anak sikandin to lukos. Pighingaranan sikandin ni Lia ki Riubin, no to kanta pad “nakitaan ka goinawa ku no masakit,” su nignangon si Lia to “Tongod to nakita to Magboboot ka masakit no goinawa ku, pigbogadyan a rin to anak. Kuntoon ogdakol ka goinawa to asawa ku kanak.”
33 Nighutuk naboros si Lia, woy to pogpanganak din to lukos nignangon sikandin to “Tongod to narinog to Magboboot no waro goinawa to asawa ku kanak, pigbogadyan a rin pad to soini no anak.” No, pighingaranan din ki Simion ka anak din, no to kanta pad “ka nakarinog.”
34 Nighutuk man do naboros si Lia, woy to pogpanganak din to lukos, nignangon sikandin to “Ogmarani on ka asawa ku kanak, su naka-anak ad on kandin to tatou no lukos.” No pighingaranan din ki Livi ka anak din, no to kanta pad “ogdani.”
35 Nighutuk naboros si Lia, woy to soini no pogpanganak din to lukos, nignangon sikandin to “Kuntoon ogsadyoon ku ka Magboboot.” No sikan ian pighingaranan din ki Juda ka anak din no to kanta pad “pogsadyo.” No nighagtong on nig-anak si Lia.