28
Nigpanlaguy Si Jacob Pohondio To Ki Laban
1 No nig-umow si Isaak ki Jacob woy naboligan din woy pignangonan din si Jacob to “Dokag asawa to boi no matig Canaan. 2 Agpas ka no oghondio ka to Paddan Aram, dio to ugpaan ni Bituil no amoy to inoy nu. Pamangho ka to og-asawoon nu dio to mgo anak no boi ni Laban no ma-ama to inoy nu. 3 Ogkaboligan ka poron to Magboboot no Mabogbog to Tibo, woy ogkabogadyan ka to moon-ing no mgo kapunganan odyow no ogkohimu kow no moon-ing no koot-otawan no ogkalibuung. 4 Ogbogadyan ka rin poron woy ka mgo kapunganan nu to bolig no inbogoy rin ki Abraham, odyow no ogpakatagtuun kow to soini no tano no pig-ugpaan nu kuntoon no unawa’t dagpu, ian ka tano no inbogoy to Magboboot ki Abraham.”
5 No pigpohipanow ni Isaak si Jacob, woy nigligkat si Jacob pohondio to Paddan Aram, dio to ki Laban no anak ni Bituil no matig Aram, ian ka ma-ama ni Ribika no inoy ran daruwa ki Esau.
6 No kuntoon, nigdinog si Esau no pigboligan ni Isaak si Jacob woy no pigpohipanow ni Isaak si Jacob pohondio to Paddan Aram odyow to pogpamangho to og-asawoon din dio. Songo nigdinog si Esau no to pogbolig ni Isaak ki Jacob nigsugu sikandin to “Doka og-asawa to boi no matig Canaan,” 7 woy narinog din no nigbabali si Jacob to insugu to amoy woy inoy rin no nighipanow sikandin pohondio to Paddan Aram. 8 Sikan ian nakasabut si Esau no ka mgo boi no matig Canaan nakabogoy to igmasakit to goinawa ni Isaak no amoy rin; 9 no sikan ian nighondio si Esau ki Ismail woy nig-asawa sikandin ki Mahalat no atoboi ni Nibaiot no mgo anak ni Ismail no anak ni Abraham. Timul pad soini to mgo asawa no duon on to kandin.
10 Nigligkat si Jacob to Birsiba no nighipanow sikandin pohondio to Haran. 11 To poglopow rin to sagboka no ugpaan, nigsagdok sikandin to poghipanow su nigsaop on ka allow. Nigpurut sikandin to batu no dio, woy pighimu rin no uunan, woy nighibat sikandin. 12 Nakatagoinop si Jacob no nakakita sikandin to hagoran no inpabunsud dio to tano no nakatukos to langit, woy duon mgo diwata to Magboboot no nigpamanoug woy nigpamanoik to sikan. 13 Dio to ampow to hagoran nighasindog ka Magboboot, woy nignangon sikandin to “Sikanak ka Magboboot no pigdumaan ni Abraham no amoy nu, woy ni Isaak. Igbogoy ku koikow woy to mgo kapunganan nu ka soini no tano no pighibatan nu. 14 Ka mgo kapunganan nu ogkounawa to atigbun to tano, woy ogpakatangkap kow to ogsilaan woy to ogsaopan, woy dio to ogbaabagan pad. Ogkaboligan ka tibon mgo koot-otawan to kalibutan pinabadyo koikow woy to mgo kapunganan nu. 15 Pigdumaan ku sikoikow, woy ogbantadyan ku sikoikow to agad hondoi no oghondioan nu, woy kanak ka og-aap kuna to poglibong to soini no tano. Kono ku og-ongkoran sikoikow taman to ogkatood on soini no inpangulibot ku koikow.”
16 To nakaghimata on si Jacob, nigdoromdom sikandin to “Kai naan ian ka Magboboot, di waro ku matagoi.” 17 Nahallok sikandin woy nignangon sikandin to “Mokohinhinaat no longod soini! Soini ian ka baoy to Magboboot; soini ka gomawan to langit.”
18 Masoom pad to pogkapawo, pigpurut ni Jacob ka batu no pig-uunan din, woy inpahasindog din sikan iing to suwoy, woy pigbus-ugan din ka batu to lana. 19 Pighingaranan din ka sikan no ugpaan to Bit-il no to kanta pad, Baoy to Magboboot, agad no Lus ian ka taan no ngaran to lunsud dio. 20 No, nangulibot si Jacob to Magboboot no kagi “Ko ogdumaan a nu, Magboboot, woy ko ogbantadyan a nu to soini no poghipanow ku, woy ko ogkabogadyan a nu to mgo koonon ku, woy mgo kinabo 21 odyow no ogpoko-uli a to baoy to amoy ku to waro ogkabadyaan ku no maroot, ogkohimu no sikoikow ian ka Igbudyag ku, Magboboot. 22 Ogkohimu no baoy nu Magboboot ka soini no batu no inpahasindog ku iing to suwoy, woy igbogoy ku koikow ka igkasampuu no baad to tibo no igbogoy nu kanak.”