27
Pig-agow Ni Jacob Ka Igbolig Ni Isaak Ki Esau
1 To budyag on si Isaak no konad ogpakakita su piglaburan on ka mgo mata rin, pig-umow rin ka panganoy no anak din no si Esau, woy pignangonan din to “Anak.”
Nigtabak si Esau to “Soini a.”
2 Kagi ni Isaak to “Budyag ad on, woy waro a mataga ko nokoya no allow no ogkamatoy a. 3 Kuntoon, puruta nu ka mgo panganiban nu, ka busug woy ka sakuuban nu, woy oghondio ka to han-hanawan su ogpapanitingon ku sikoikow to mgo magintaunan. 4 Hilutui a nu to managomnom no sora no inkoiniat ku, woy aapi a nu odyow no ogkakoon ku, woy ogboligan ku sikoikow to kono a pad ogkamatoy.”
5 Kuntoon nigpamminog si Ribika to kinagian ni Isaak dio to anak din no si Esau. To nokohipanow on si Esau odyow to pogpanitingon to mgo magintaunan, 6 nignangon si Ribika dio to anak din no si Jacob to “Pitow ka, narinog ku ka amoy nu no nignangon to suod nu no si Esau to, 7 ‘Puruti a nu to mgo magintaunan woy hilutui a nu to managomnom no sora no ogkakoon ku, odyow no ogkaboligan ku sikoikow to tangkaan to Magboboot to kono a pad ogkamatoy.’”
8 “No kuntoon, anak, pamminog ka woy babalia nu ka ignangon ku kuna: 9 Hondio ka to mgo adyam ta, woy purut ka to daruwa no marodyow no mgo nati no kambing, odyow no ogkohilutuan ku ka amoy nu to managomnom no sora no inkoiniati rin. 10 No og-aapon nu sikan dio to amoy nu no ogkoon sikandin odyow no ogkaboligan ka to kono pad ogkabigtawan sikandin.”
11 Nigtabak si Jacob to inoy rin no si Ribika no kagi “Di ka suod ku no si Esau bulbuon no otow, di sikoddi kono. 12 Momonu a naan ko ogsamsamon a to amoy ku? Ogkataga sikandin no piggawadyan ku sikandin, woy ogtungadyawan a rin liwan to pogbolig.”
13 Kagi to inoy rin to “Anak ku, ko ogtungadyawan ka, kanak do ka ogtinawo to tungadyow. Di himua nu ro ka innangon ku koikow; puruta nu ka mgo kambing.”
14 No nigpurut si Jacob to mgo kambing, woy pig-aap din dio to inoy rin. Nighilutu si Ribika to managomnom no sora iing to inkoiniat to amoy ni Jacob. 15 No nigpurut si Ribika to dorodyawi no kinabo ni Esau no panganoy no anak din, no duon to ugpaan din, woy insau-ub din ki Jacob no igkaruwa no anak din. 16 Pigtol-oban din ka mgo boad woy ka tongol ni Jacob to laplap to kambing. 17 Pigbogadyan ni Ribika si Jacob no anak din to managomnom no sora woy ka pan no pighilutu din. 18 Nighondio si Jacob to amoy rin woy nignangon sikandin to “Amo.”
Nigtabak si Isaak to “Anak ku. Hontow ka naan?”
19 Nignangon si Jacob to amoy rin to “Kanak si Esau no panganoy nu. Nohimu kud ka innangon nu kanak. Onow ka no ogsandig ka odyow no ogpakakoon ka to soini no magintaunan woy ogkaboligan a nu.”
20 Nig-inso si Isaak to anak din to “Amana, utu, manio no magaan ka ro noko-utol?”
Nigtabak si Jacob to “Ka Magboboot no Igbudyag nu ian ka nigbulig kanak.”
21 No nigkagi si Isaak ki Jacob to “Dani ka anak, odyow no ogkasamsam ku sikoikow, woy ogkataga a ko maogot no si Esau ka.”
22 Nigdani si Jacob to amoy rin, woy pigsamsam sikandin. Nignangon si Isaak to “Ka lagong ian ka lagong ni Jacob, di ka mgo boad ian ka mgo boad ni Esau.” 23 Waro moko-ila si Isaak ki Jacob su bulbuon ka mgo boad din iing to mgo boad ni Esau, no pigboligan ni Isaak si Jacob. 24 Nig-inso pad si Isaak to “Koikow bua ian ka anak ku no si Esau?”
Nigtabak si Jacob to “Kanak ian.”
25 Nignangon pad si Isaak to “Anak ku, aapi a to pighilutu nu no magintaunan no ogkakoon ku odyow no ogkaboligan ku sikoikow.” Pig-aapan ni Jacob si Isaak to sora, woy nigkoon sikandin. Nig-aap pad si Jacob to inumon woy nig-inom si Isaak. 26 Nignangon pad si Isaak to “Kai ka anak. Haroki a nu.”
27 No nigdani si Jacob woy pigharokan din ka amoy rin. To pogngarog ni Isaak to mgo kinabo no insau-ub ni Jacob pigboligan din si Jacob no kagi
“A, ka ngarog to anak ku ian unawa to ngarog to kamot no inbolig to Magboboot. 28 Ogkabogadyan ka to Magboboot to domhug puun to langit, woy to karodyowan puun to tano; no ian ka dakol no abut to ani, woy iam no binu. 29 Ogpariraom koikow ka mgo koot-otawan woy ogluhud sikandan to tangkaan nu. Koikow ka ogboot to mgo karumahan nu, woy ogluhud ka mgo anak to inoy nu koikow. Ogkatungadyawan ka agad hontow no otow no ogtungadyow koikow, woy ogkaboligan ka agad hontow no otow no ogbolig kuna.”
30 No niglibuwas on si Jacob puun to tangkaan to amoy rin, woy to iam pad nigtakas nigbolig si Isaak ki Jacob niglopow on si Esau ligkat to nigpanitingon sikandin. 31 Songo nighilutu si Esau to managomnom no sora woy in-aap din dio to amoy rin. Nignangon si Esau ki Isaak to
“Amo, onow ka odyow no ogpakakoon ka woy ogkaboligan a nu.”
32 Nig-inso ka amoy rin ki Esau to “Hontow ka?”
Nigtabak si Esau to “Kanak ka panganoy no anak nu no si Esau.”
33 Nigpangolkol lagboy ka lawa ni Isaak no nigkagi sikandin to “Hontow naan ka nighondini no nigpanitingon no nig-aap to sora kanak? Iam a pad nigkoon to niglopow ka, woy naboligan ku sikandin woy ian ian ogkaboligan sikandin!”
34 To nakarinog si Esau to sikan no kagi to amoy rin, nigngangang sikandin to maagbot puun to masakit no goinawa woy nignangon sikandin dio to amoy rin to “Songo boligi a nu ro amo!”
35 Di nignangon si Isaak to “Nighondini ka hari nu pinabadyo to gawoy, woy pig-agow rin ka igbolig ku poron koikow.”
36 Nignangon si Esau to “Litos ian ka ngaran din no Jacob no ogpasabut gawoy. Igkaruwa on soini no nagawadyan a rin; pig-agow rin ka pogkakakoy ku, woy kuntoon na-agow rin ka igbolig nu kanak.” Nig-inso pad si Esau to “Waro nagaat nu no igbolig nu kanak?”
37 Nigtabak si Isaak ki Esau to “Pighimu kud sikandin no igbudyag nu, woy nohimu kud no mgo suguonon din ka tibon mgo karumahan din. Pigbogadyan ku sikandin to koudyagan pinabadyo to ani woy iam no binu. Nokoy pad naan ka igkabogoy ku kuna anak?”
38 Nig-inso si Esau to amoy rin to “Sagboka ro ka igbolig nu buwa amo? Songo boligi a nu ro amo.” No nigsinogow on si Esau to maagbot.
39 Nigtabak si Isaak ki Esau to
“Ka ugpaan nu ogkohimu no mariu to karatuan to tano, woy mariu to domhug puun to langit. 40 Og-ugpo ka pinabadyo to kampilan, woy ogbabali ka to hari nu. Di ko ogkapoa-an kad, itugdo nu ka mabogat no inpatiang ni Jacob koikow.”
41 Nigmaroot so goinawa ni Esau ki Jacob tongod to bolig no inkabogoy to amoy rin ki Jacob. Nignangon si Esau dio to goinawa rin to “Magaan on ogkabigtawan ka amoy ku; no ko ogdatong on ka sikan no allow, oghimatadyan ku ka hari ku no si Jacob.”
42 To nakarinog si Ribika to kagi ni Esau, inpo-umow rin ka hari no anak din no si Jacob, woy pignangonan din to “Pig-im-imuan ni Esau no kakoy nu ka goinawa rin su nigbabantak sikandin to poghimatoy koikow. 43 No kuntoon, anak, babalia nu ka ignangon ku koikow: panlaguy ka pohondio to ma-ama ku no si Laban no dio to Haran. 44 Dio ka ro og-ugpo duma to anggam nu taman to ogkabohow ka moinit no goinawa to kakoy nu koikow. 45 Ko konad ogkabou ka kakoy nu, woy ogkalingawan din on ka nohimu nu, ogpatugunan ku sikoikow to pog-uli kai ligkat dio. Manio to ogkaawaan a to kaniu daruwa to amoy nu to sagboka ro no allow?”
46 No nignangon si Ribika ki Isaak to “Noopus on ka goinawa ku to pog-ugpo duma to soini no mgo boi no mgo kapunganan ni Hit. Ko ogpaka-asawa si Jacob to boi to soini no longod to kapunganan ni Hit, marodyow pad nasi ko ogkamatoy ad on.”