26
Si Isaak Woy Si Abimilik
1 No kuntoon, duon nigdatong no bitil to sikan no ugpaan, dangob no bitil soini to nokohun-a no bitil to noudyag pad si Abraham. No nighondio si Isaak ki Abimilik no datu to mgo Filistihanon dio to Girar. 2 Nigpakita ka Magboboot ki Isaak no nignangon “Doka oghondio to Ehiptu. Ugpo ka ro ko hondoi ka ignangon ku koikow. 3 Ugpo ka ro kai to soini no tano tagtagood, woy ogdumaan ku sikoikow woy ogboligan ku sikoikow. Hoo su igbogoy ku kuna woy to mgo kapunganan nu ka tibo to soini no mgo tano, woy ogtooron ku ka inpangulibot ku ki Abraham no amoy nu. 4 Oghimuon ku no ka mgo kapunganan nu ogkounawa karasig to mgo bituon to langit, woy ogbogadyan ku sikandan to soini no mgo tano. Pinabadyo to mgo kapunganan nu, ogkaboligan ka tibon mgo koot-otawan to kalibutan, 5 hoo, su pigbabali ni Abraham ka mgo boot ku woy ka mgo sugu ku woy mgo udlin ku.”
6 No, sikan ian nig-ugpo si Isaak to Girar. 7 To pog-inso to mgo otow to sikan no ugpaan ki Isaak tongod to asawa rin, nignangon sikandin no ‘Atoboi ku sikandin’, su nahallok sikandin to pog-abin no ‘Asawa ku sikandin.’ Hoo su nigsumansuman si Isaak no ‘naugpa ko oghimatadyan a to mgo otow to soini no ugpaan tongod ki Ribika su marodyow pitawon no boi sikandin.’
8 To naugoylugoy on to pog-ugpo ni Isaak dio, to pogpantow ni Abimilik no datu to mgo Filistihanon puun to baoy rin nakita rin si Isaak no nigkopkop ki Ribika no asawa rin. 9 No pig-umow ni Abimilik si Isaak woy nignangon sikandin to “Asawa nu naan si Ribika! Manio atag to nignangon ka no atoboi nu sikandin?”
Nigtabak si Isaak to “Hoo su naan ku ko oghimatadyan a now tongod kandin.”
10 No nignangon si Abimilik to “Nokoy soini no nohimu nu kanami? Ko duon otow kai to kanami no nakahulid to asawa nu, koikow ka nig-aap to pogpakasao kai’t kanami.” 11 No nigsugu si Abimilik to mgo sakup din no kagi “Agad hontow no oghilabot to soini no otow woy to asawa rin ogkohimatadyan.”
12 No kuntoon, nigpamua si Isaak to sikan no ugpaan, woy to sikan do no tuid nakagaani sikandin to songo gatus no akob to noorok din, su naboligan sikandin to Magboboot. 13 Nigtulin pad ka igkaratui ni Isaak taman to naratu lagboy sikandin. 14 Nigmarasig ka mgo adyam din woy mgo uripon din woy noima ka mgo Filistihanon kandin. 15 Nokoy naan pigbunbunan to mgo Filistihanon to tano ka tibon mgo sakuganan no inkali to mgo suguonon ni Abraham nokani, no nasagpongan on ka mgo sakuganan. 16 No nignangon si Abimilik ki Isaak to “Halin ka to mariu, su mabogbog ka lagboy to kanami.”
17 No nigpamariu si Isaak kandan no nighalin sikandin to Aug to Girar, no nig-ugpo sikandin dio. 18 Pigpakali impohutuk ni Isaak ka mgo sakuganan no nakali to noudyag pad si Abraham no amoy rin. Pigbunbunan to mgo Filistihanon ka sikan no mgo sakuganan to namatoy on si Abraham. Pighingaranan ni Isaak ka mgo sakuganan to mgo ngaran no inbogoy to amoy rin. 19 Nigkali ka mgo suguonon ni Isaak to sakuganan dio to aug, woy nakitaan dan ka marodyow no woig dio. 20 Di nig-ogot ka mgo taagbantoy to mgo adyam to mgo otow to Girar dio to mgo taagbantoy to mgo adyam ni Isaak. Nig-abin sikandan no ‘Kanami soini no woig.’ No pighingaranan ni Isaak ka sakuganan no ‘Isik’ no to kanta pad ‘ogot’ su nig-ogot ka mgo otow kandin. 21 No nigpakali si Isaak to dangob no sakuganan, di nig-atu pad ka mgo otow kandin to sikan dod no sakuganan. No pighingaranan ni Isaak ka sakuganan to ‘Sitna’ no to kanta pad ‘nig-atu.’ 22 Nighalin man do si Isaak woy nigpakali to dangob do no sakuganan. Warad on nig-ogot kandin to sikan. No pighingaranan din ka sakuganan to ‘Rihobot’ no to kanta pad ‘maawang’ no kagi rin “Nabogadyan kid on to Magboboot to ka-awangan, woy ogpokohondio ki to karodyowan to soini no tano.” 23 Ligkat dio nighalin si Isaak dio to Birsiba. 24 To sikan no maukilom nigpakita ka Magboboot kandin woy nignangon to “Sikanak ka Magboboot no Igbudyag to amoy nu no si Abraham. Doka ogkahallok su nigduma a koikow. Ogboligan ku sikoikow woy ogmarasigon ku ka mgo kapunganan nu tongod to ki Abraham no suguonon ku.” 25 Nighimu si Isaak to tubarananadio, woy nig-umow sikandin to ngaran to Magboboot. Nigpos-ok sikandin to tukbung din dio, woy nigkali ka mgo suguonon din to sakuganan.
26 Kuntoon, nighondio si Abimilik ki Isaak puun to Girar, no duma ki Ahusat no taagtambag kandin, woy ki Pikol no igbudyag to mgo sundau rin. 27 Nig-inso si Isaak kandan to “Manio to nighondini kow kanak, no to nokohun-a pig-usig a now woy pigdogil a now?”
28 Nigtabak sikandan to “Nakakita koy no maogot no nigduma ka Magboboot koikow, no nigmanang-nangonoy koy no ‘Marodyow porom ko ogpangulibot ki kandin.’ No kuntoon oghimu koy porom to kasabutan koikow 29 no kono ka oghimu to maroot kanami, iing to waro koy nighimu to maroot koikow no pigtahud noy sikoikow ladyun woy pigpohipanow noy sikoikow to maawang no goinawa. No kuntoon naboligan ka to Magboboot.”
30 Nighimu si Isaak to dakol no pagkoonan tongod kandan, woy nangokoon woy nang-inom sikandan. 31 Masoom pad to pogkapawo, nigpapang-pangulibotoy sikandan tibo. No pigpohipanow ni Isaak sikandan no nigligkat sikandan to waro igkasasow ran. 32 To sikan no allow, niglopow ka mgo suguonon ni Isaak no nignangon kandin moitongod to sakuganan no nakali ran no kagi “Duon on woig!” 33 Pighingaranan ni Isaak ka sakuganan to Siba no to kanta pad ‘pangulibot’, woy taman kuntoon pighingaranan sikan no longod to Birsiba no to kanta pad ‘sakuganan to pangulibot.’