25
Ka Mgo Kapunganan Ni Abraham
1 No kuntoon, nighutuk nig-asawa si Abraham, no ka ngaran to boi ian si Kitura. 2 Naka-anak si Kitura pinabadyo ki Abraham to hon-om no lukos no si Simran, si Yoksan, si Midan, si Midian, si Isbak woy si Sua. 3 Si Yoksan ian ka amoy ni Siba woy ni Didan, woy ka mgo kapunganan ni Didan ian ka mgo otow to Assur, to Litus woy to Lium. 4 Ka mgo anak ni Midian ian si Ipa, si Ipir, si Hanok, si Abida woy si Ildaa. Tibo sikandan mgo kapunganan ni Kitura. 5 Nigpanugun-tugun si Abraham to tibo no kandin dio ki Isaak, 6 di tagood to noudyag pad si Abraham, duon mgo inbogoy rin dio to mgo anak to mgo as-asawa rin woy inpamariu din sikandan ligkat to anak din no si Isaak, pohondio to tano to ogsilaan. 7 To tibo noudyag si Abraham to 175 no tuid, 8 woy nabigtow on ka goinawa rin to manigoon on lagboy sikandin, ubanon on sikandin woy nig-agpot sikandin to mgo kaminunaan din. 9 Ka mgo anak din no si Isaak woy si Ismail ian ka niglobong ki Abraham dio to pilang to Makpila marani to Mamri dio to tano ni Ipron no anak ni Soar no otow to Hit, 10 ian ka tano no pigboli ni Abraham ligkat to mgo otow to Hit. Dio ian inlobong si Abraham dio to longod to piglobongan to asawa rin no si Sara. 11 Takas to pogkamatoy ni Abraham, naboligan si Isaak to Magboboot, woy nig-ugpo sikandin marani to Bir-Lahai-Roi.
12 Soini ka nangnangonon tongod to anak ni Abraham no si Ismail no pig-anak to suguonon ni Sara no si Hagar no matig Ehiptu. 13 Soini ka mgo ngaran to mgo anak no lukos ni Ismail ligkat to panganoy pohondio to kimud. Sikandan si Nibaiot, si Kidar, si Adbiil, si Mibsam, 14 si Misma, si Duma, si Massa, 15 si Hadad, si Tima, si Yitur, si Napis woy si Kidima. 16 Sikandan ian ka mgo anak no lukos ni Ismail, woy sikandan ian ka mgo datu to sampuu woy daruwa no mgo koot-otawan sumao to mgo ugpaan dan. 17 To tibo noudyag si Ismail to 137 no tuid. Nabigtow on ka goinawa rin, woy naka-agpot sikandin to mgo kaminunaan din. 18 Nig-ugpo ka mgo kapunganan ni Ismail to mgo tano ligkat to Havila pohondio to Sur marani to oatan to Ehiptu ko oghondio ka to Assur. Woy nig-ugpo sikandan to maroot no goinawa dio to tibo no mgo karumahan dan.
19 Soini ka nangnangonon tongod ki Isaak no anak ni Abraham. Si Abraham ian ka amoy ni Isaak, 20 woy kohop-atan on ka panuigon ni Isaak to nig-asawa sikandin ki Ribika no anak ni Bituil woy atoboi ni Laban no mgo otow to Aram no matig Paddan Aram.
21 Nigpanubad si Isaak dio to Magboboot tongod to asawa rin su waro anak dan. Woy pigtabak to Magboboot ka pogpanubad din woy naboros si Ribika. 22 Sosoping ka inkaboros din, woy inat nigpabu-buogoy ka mgo bato dio to sood to gotok din woy noinuinu si Ribika to “Manio no soini ka niglopow kanak?” Sikan ian nighondio sikandin odyow to pog-inso to Magboboot.
23 Nignangon ka Magboboot kandin to “Daruwa ka koot-otawan no duon to gotok nu, woy ogpokogsuwoy sikandan; sagboka no koot-otawan ogkohimu no mabogbog pad to dangob, woy ka kakoy ogpariraom to hari.” 24 To niglopow on ka allow to pogpanganak ni Ribika, sosoping no lukos ian ka mgo anak din. 25 Ka nokohun-a niglibuwas no bato no ogdoromdoman dan no kakoy malaab no bato no bulbuon ka tibon lawa rin; no sikan ian pighingaranan sikandin ki Esaua 26 Niglibuwas ka hari no piggon-gonan din ka tikintikin ni Esau; no sikan ian pighingaranan sikandin ki Jacob.b Kohon-oman on no tuid ian ka panuigon ni Isaak to pogpanganak ni Ribika kandan.
27 Nigtulin ka mgo bato, woy nohimu si Esau no matigdu to pogpanitingon; sagboka no otow sikandin no ogkoiniat to han-hanawan. Di nohimu si Jacob no mahagtong no otow no nig-ugpo to marani to mgo tukbung. 28 Si Esau ian ka indakoli to goinawa ni Isaak su ogkoiniat si Isaak to ogkoon to mgo magintaunan, di si Jacob ian ka indakoli to goinawa ni Ribika.
29 Songo allow to sikan, nigtutua si Jacob to sora, woy niglopow si Esau ligkat to han-hanawan no ogkabigtawan on to gutas. 30 Nignangon si Esau ki Jacob to “Agpas ka, bogadyi a to malaab no sora nu. Ogkabigtawan ad on to gutas!” (Sikan ian ka pugtian no songo pighingaranan si Esau ki Idom su ogpasabut sikan no malaab).
31 Di nigtabak si Jacob to “Woy on ko igbogoy nu koddi ka pogkakakoy nu.”
32 Nigtabak si Esau to “A! Ogkabigtawan ad. Nokoy ka puus to sikan no pogkakakoy ku?”