24
Si Isaak Woy Si Ribika
1 No kuntoon budyag on si Abraham woy dakol on ka panuigon din, woy naboligan sikandin to Magboboot to tibo. 2 Nignangon si Abraham to igbudyag to mgo suguonon din no sinaligan din no otow to tibo no kandin, no kagi “Isabuk nu ka boad nu to diraom to bubun ku, 3 no ogpapanguliboton ku sikoikow pinabadyo to Magboboot no Igbudyag to langit woy to tano, no ogpangulibot ka no kono ka ogpurut to og-asawoon to anak ku ligkat to mgo kapunganan ni Canaan no kai to ugpaan ku, 4 di oghondio ka atag to pigligkatan ku no ugpaan, to longod to mgo karumahan ku, woy dio ka ogpurut to og-asawoon to anak ku no si Isaak.”
5 Nig-inso ka suguonon ki Abraham to “Monuon ku ko kono ogbabali ka boi to pogduma kanak to pog-uli kai to soini no tano? Og-aapon ku buwa ka anak nu dio to ugpaan no pigligkatan nu?”
6 Nigtabak si Abraham to “Ligdongi nu no kono nu og-aapon ka anak ku dio. 7 Ka Magboboot no Igbudyag to langit no nig-aap kanak ligkat to lunggunan to amoy ku woy ligkat to ugpaan ku to bato a pad ian ka nigkagi kanak no nangulibot no ‘Igbogoy ku ka soini no tano dio to mgo kapunganan nu.’ Sikandin ian ka ogpa-aap to diwata rin hun-a koikow odyow no ogpakapurut ka to boi no og-asawoon to anak ku dio. 8 Ko kono ogbabali ka boi to pogduma koikow ogpakalipuwas ka to soini no pangulibot nu kanak. Di doka ian og-aapa ka anak ku dio.”
9 No pigpasigpitan to suguonon ka boad din diraom to bubun to igbudyag din no si Abraham, woy nangulibot sikandin moitongod to sikan no innangon. 10 No nigpurut ka suguonon to sampuu to mgo no kamilani Abraham woy nighipanow sikandin no nig-aap to mgo maddodyow no mgo igkabogoy ligkat ki Abraham. Nighipanow sikandin pohondio to Aram-Naharaim woy nigparagas pohondio to ugpaan ni Nahor. 11 Inpaluud din ka mgo kamil dio to marani to sakuganan to libuwasan to lunsud. Magaan ogsaop ka allow to sikan; ian ka papanakoruoy to mgo boi. 12 No nigpanubad ka suguonon no kagi “Magboboot no Igbudyag to igbudyag ku no si Abraham, buligi a nu kuntoon odyow no ogpakatood a to tuud ku. Boligi nu ka igbudyag ku no si Abraham. 13 Pitow ka, no kai a nighasindog marani to soini no sobsob, woy oghongkai ka mgo anak no boi to mgo otow to lunsud odyow to pogsakug. 14 Oglopow porom no ko ognangon a to sagboka no boi no ‘Sakugi a odyow no ogpoko-inom a’ ogtabak sikandin no ‘Inom ka, woy songo ogpoinomon ku pad ka mgo kamilb nu’, no ogkohimu no sikandin ian ka in-aam nu to suguonon nu no si Isaak. Pinabadyo to sikan, ogkatagaan ku no naboligan nu ka igbudyag ku.”
15 To waro pad sikandin nakaponga to pogpanubad, niglibuwas si Ribika to lunsud no nigtiang to sakoru rin. Sikandin ian ka anak ni Bituil no anak no lukos ni Milka. Si Milka ian ka asawa to suod ni Abraham no si Nahor. 16 Marodyow lagboy pitawon ka boi, woy waro pad sikandin magon-goni to lukos. Nigtopak no nigsakug sikandin woy niggakap man do sikandin. 17 Nig-agpas nigtomu ka suguonon ni Abraham ki Ribika woy nignangon, “Bogadyi a nu bag to maintok no woig puun to sakoru nu.”
18 Nigtabak si Ribika to “Inom ka anggam” woy inlogsad din ka sakoru rin woy pigpoinom ka suguonon. 19 Takas to nigpoinom sikandin to suguonon, nignangon si Ribika to “Ogsakug a pad to woig no igpoinom to mgo kamil nu taman to ogkabuung sikandan.” 20 No nig-agpas sikandin nigbus-ug to sakoru rin dio to inomanan to mgo adyam, woy nigpallaguy sikandin niglibong dio to sobsob odyow to pogsakug, woy nigparagas sikandin taman to nabuung on ka mgo kamil.
21 To waro kagikagi, pigbantadyan lagboy to suguonon si Ribika odyow to pogpitow ko ogpaugutan to Magboboot no ogpakatood ka tuud din to poghipanow. 22 To nakaponga on nig-inom ka mgo kamil, nigbogoy ka suguonon ni Abraham to marodyow no bulawan no arikis to irong woy daruwa no maddodyow no binukul no bulawan ki Ribika. 23 No nig-inso ka suguonon ni Abraham to “Hontow ka amoy nu? Nangoni a nu ko duon ogkohibatan noy to baoy to amoy nu kuntoon no maukilom.”
24 Nigtabak si Ribika to “Anak a ni Bituil no anak ni Nahor woy ni Milka.” 25 Nigparagas sikandin to pognangon to “Duon hibatanan to baoy noy no litos kaniu woy songo duon dakol no igkasunggud nu to mgo adyam nu woy duon ogkohibatan dan no lagami.” 26 To sikan, nigluud ka suguonon ni Abraham woy pigsadyo din ka Magboboot, 27 no kagi “Sadyoon ku ka Magboboot no Igbudyag to igbudyag ku no si Abraham, su waro sikandin moghagtong to pogpakita to koid-u rin woy to pogkamatuarong din to igbudyag ku. Hoo, su pig-aap a to Magboboot to poghipanow ku kai to baoy to mgo karumahan to igbudyag ku.”
28 Nigpallaguy si Ribika no nig-uli to baoy to inoy rin, woy innangon din ka tibo no nabadyaan din.
29-30 Kuntoon duon ma-ama ni Ribika no ian si Laban woy nakakita sikandin to arikis no duon to irong woy to mgo binukul no duon to mgo boad to atoboi rin, woy nakarinog sikandin to innangon ni Ribika no inkagi kun to otow kandin. Sikan ian nig-agpas nighondio si Laban to otow, no duon nighasindog to longod to mgo kamil to marani to sobsob. 31 Nignangon si Laban to suguonon ni Abraham to “Paragas ka, no naboligan ka to Magboboot. Manio no nighasindog ka pad kai to libuwasan? Nohimpod kud panadya ka baoy woy ka ogpo-ugpaan to mgo kamil nu.”
32 Sikan ian nighondio ka otow to baoy, woy inpamanoug dan ka mgo in-untud to mgo kamil, woy pigsungguran ka mgo kamil woy pig-aapan ka suguonon ni Abraham woy ka mgo duma rin to woig odyow no ogpakapanluu sikandan to mgo paa ran. 33 Pig-aapan ka suguonon to koonon, di nignangon sikandin to “Kono a ogkoon ko kono a pad ogpakanangon to tuud ku kaniu kai.”
Nigtabak si Laban to “No, nangoni koy.”
34 No nignangon ka otow to “Suguonon a ni Abraham. 35 Naboligan lagboy to Magboboot ka igbudyag ku, woy nohimu sikandin no datu lagboy. Nabogadyan sikandin to Magboboot to mgo karniru woy mgo baka, mgo plata woy bulawan, mgo suguonon no mgo lukos woy mgo boi, woy mgo kamil woy mgo asnu. 36 Naka-anak si Sara no asawa to igbudyag ku to lukos to budyag on sikandin, woy inbogoy on ni Abraham ka tibo no kandin dio to anak din. 37 Woy pigpapangulibot a to igbudyag ku no ‘Kono ka ogpurut to og-asawoon to anak ku ligkat to mgo anak to mgo kapunganan ni Canaan no nig-ugpo to soini no tano no ugpaan ku, 38 di oghondio ka atag to mgo kapunganan to amoy ku dio to mgo karumahan ku, woy dio ka ogpurut to og-asawoon to anak ku.’ 39 No nig-inso a kandin no kagi ‘Monuon ku anggam ko kono ogbabali ka boi to pogduma koddi to pog-uli?’ 40 Nigtabak sikandin kanak no kagi ‘Ka Magboboot no narumahan ku ian ka ogpa-aap to diwata rin duma koikow odyow no ogkatood ka tuud nu to poghipanow, no ogpakapurut ka to og-asawoon to anak ku ligkat to karumahan ku no dio to kapunganan to amoy ku. 41 No ko oglopow ka to mgo karumahan ku, ko kono ogbabali sikandan no og-aapon nu ka boi ogpakalipuwas ka to pangulibot nu kanak.’ 42 No kuntoon to poglopow ku to sobsob ganna no maapun, nigpanubad a no kagi ‘Magboboot no Igbudyag to igbudyag ku no si Abraham, ko ogkoiniat ka patoora a nu to tuud ku to poghongkai. 43 Pitow ka no nighasindog a marani to soini no sobsob. Ko oglopow ka sagboka no daaga odyow to pogsakug woy ognangonan ku sikandin “Bogadyi a to woig no maintok no og-inumon ku ligkat to sakoru nu,” 44 woy ogtabak sikandin kanak to “Inom ka, woy songo ogpoinomon ku ka mgo kamil nu” ogkohimu porom no sikandin ian ka pig-aam nu no boi no litos to anak to igbudyag ku.’ 45 No to waro a pad nakaponga to pogpanubad kai to goinawa ku, niglopow on si Ribika no nigtiang to sakoru rin. Nigtopak sikandin odyow to pogsakug, woy nignangon a kandin no ‘Igi, po-inoma a nu.’ 46 No nig-agpas sikandin niglogsad to sakoru rin ligkat to pamanadyon din, woy nignangon kanak no ‘Inom ka anggam, woy songo ogpoinomon ku ka mgo kamil nu.’ No nig-inom a woy songo pigpoinom din ka mgo kamil ku. 47 Nig-inso a kandin no ‘Hontow ka amoy nu?’ woy nigtabak sikandin no ‘Anak a ni Bituil no anak ni Nahor woy ni Milka.’ No pigsabuk ku ka arikis duon to irong din, woy insau-ub ku ka mgo binukul duon to mgo kamomou rin, 48 woy nigluud a no nigsadyo a to Magboboot no Igbudyag to igbudyag ku no si Abraham, su pigtuon a rin to litos no daan odyow no ogpakapurut a to apu to suod to igbudyag ku no og-asawoon to anak din. 49 No kuntoon, ko ogpakita kow to koid-u woy pogkamatuarong dio to igbudyag ku, nangoni a now; woy ko kono kow, songo nangoni a now, odyow no ogkataga a to oghimuon ku.”
50 Nigtabak si Laban woy si Bituil to “Ligkat to Magboboot soini, waro igkanangon noy. 51 Soini si Ribika, aapa nu sikandin woy ogkohimu sikandin no asawa to anak to igbudyag nu sumao to innangon to Magboboot.”
52 To pogkarinog to suguonon ni Abraham to intabak dan, nigluud sikandin dio to tano no nigsadyo to Magboboot. 53 No nigpurut ka suguonon ni Abraham to mgo bulawan woy plata no mgo kaaglagan woy mgo kinabo, woy inbogoy rin ki Ribika; songo pigbogadyan din ka ma-ama woy ka inoy ni Ribika to mgo mahalon no mgo igbogoy. 54 No niglabung woy nig-inom ka suguonon ni Abraham woy ka mgo duma rin, woy nokohibat sikandan dio. To pog-onow ran to pogkapawo, nignangon ka suguonon ni Abraham to “Pohipanawa a now no og-uli ad dio to igbudyag ku.”
55 Di nigtabak ka ma-ama woy ka inoy ni Ribika to “Po-ugpaa nu pa ka boi kai to kanami to mgo sampuu no allow; woy takas to sikan ogpokohipanow kow.”
56 Di nigtabak ka suguonon kandan to “Doka a now ogbaabagi to poghipanow no nakapatood on ka Magboboot to tuud ku to poghipanow. Pohipanawa a now on odyow no ogpoko-uli ad to igbudyag ku.”
57 No nignangon sikandan to, “Og-umawon ta ro ka boi woy og-insoon ta pad sikandin.”
58 No nig-umow sikandan ki Ribika, woy pig-inso dan sikandin to “Ogbabali ka to pogduma to soini no otow?”
Nigtabak si Ribika to “Ogduma a.”
59 No sikan ian inpohipanow ran ka atoboi ran no si Ribika duma to taagtamong din woy duma to suguonon ni Abraham woy to kandin no mgo otow. 60 Pigboligan dan si Ribika no kagi “Suod noy, ogmoon-ing porom no oglibu-libu ka mgo kapunganan nu, woy ogpaka-agow sikandan porom to mgo ugpaan to mgo usig dan.” 61 No nangaag-lag si Ribika woy ka mgo suguonon din woy nig-untud sikandan to mgo kamil dan woy nanghipanow duma to otow; no sikan ian pig-aap to suguonon ni Abraham si Ribika woy nigligkat sikandin.
62 No kuntoon, nakahalin si Isaak ligkat to Bir-Lahai-Roi, woy nig-ugpo on sikandin dio to Nigib. 63 Songo kaapunan to sikan, nighondio sikandin to libuwasan odyow to pogdoromdom. Nigtonggak sikandin woy nakakita sikandin to mgo kamil no nigdani kandin. 64 Songo nigtonggak si Ribika woy nakakita sikandin ki Isaak. Nigpamanoug sikandin to kamil din, 65 woy nig-inso sikandin to suguonon ni Abraham to “Hontow otowa ka soodyo to kamot no oghongkai no ogtomu kanta?”
Nigtabak ka suguonon to “Sikandin ka igbudyag ku.” Sikan ian nigpurut si Ribika to manggad din odyow to pog-atang to langlanguan din.
66 No nignangon-nangon ka suguonon ki Isaak to tibo no nabadyaan din. 67 Pig-aap ni Isaak si Ribika dio to tukbung to inoy rin no si Sara, woy pig-asawa rin si Ribika. No nohimu si Ribika no asawa ni Isaak, woy dakol ka goinawa ni Isaak kandin; sikan ian nigmaintok ka igmasakit to goinawa ni Isaak tongod to inoy rin no namatoy.