23
Namatoy Si Sara
1 Noudyag si Sara to 127 no tuid, 2 woy namatoy sikandin dio to Kiriat Arba (no pighingaranan to Hibron kuntoon), dio to tano to Canaan. Nigdaugmatoy si Abraham tongod ki Sara woy nigpandaawit sikandin.
3 Pig-ongkoran pad ni Abraham ka namatoy no asawa rin, woy nigpog-aukoy pad sikandin to mgo koot-otawan to Hit, no kagi 4 “Kono a no lumad no nig-ugpo a kai. Nokoy naan duari a now to tano no lobonganan odyow no ogpakalobong a to asawa ku.”
5 Nigtabak ka mgo koot-otawan to Hit ki Abraham no kagi, 6 “Anggam pamminogi koy. Mabantug ka no otow kai to kanami. Ogpakalobong ka to minatoy nu dio to agad hondoi no marodyow lagboy no lobonganan noy. Waro sagboka kanami no ogbaabag koikow to poglobong to minatoy nu dio to lobonganan din.”
7 No nighasindog woy nig-unduk si Abraham to tangkaan to mgo koot-otawan to sikan no ugpaan no ian ka mgo kapunganan ni Hit.
8 Nignangon sikandin kandan to “Ko ogbabali kow no iglobong ku ka to minatoy ku, buligi a now to pogbudyu ki Ipron no anak ni Soar 9 odyow no ogduaron a rin to pilang to Makpila, no duon to koopusan to tano din. Budyui now sikandin to pogduad to sikan kanak to litos no badyad to songo lobonganan.”
10 Nigpinnuu si Ipron no otow to Hit dio to mgo koot-otawan din, woy nigtabak sikandin ki Abraham dio to tangkaan to tibon mgo koot-otawan to Hit no duon to gomawan to lunsud din, 11 no kagi “Kono, anggam. pamminogi a nu; igbogoy ku ka pilang no iglagkos ka tano duon. Igbogoy ku soini koikow kai to tangkaan to mgo koot-otawan ku. Ilobong nu ka minatoy nu.”
12 Nighutuk nig-unduk si Abraham to tangkaan to mgo otow to sikan no lunsud, 13 woy nignangon sikandin ki Ipron dio to tangkaan dan to “Pamminogi a, ko ogkoiniat kow. Ogbadyad a to litos no badyad to tano. Tinawaa nu ka igbadyad ku koikow odyow no ogpakalobong a to minatoy ku dio.”
14 Nigtabak si Ipron ki Abraham, no 15 “Pamminogi a nu, anggam; ka litos no badyad to sikan no tano ian hop-at no gatus no saapi di nokoy sikan to kanta? Ilobong nu ka minatoy nu.”
16 Nigbabali si Abraham to inbudyu ni Ipron, woy pigtimbang din ka innangon no badyad dio to tangkaan to mgo koot-otawan to Hit no ian 400 no saapia sumao to timbang no nagamit to mgo taagbaligyo dio. 17-18 No, dio to tangkaan to mgo koot-otawan to Hit no duon to gomawan to lunsud, ian on nakatagtuun si Abraham to tano ni Ipron marani to Mamri, lagkos to pilang to Makpila woy to mgo kadyu no duon to tano.
19 Takas to sikan, nakalobong si Abraham to asawa rin no si Sara dio to pilang to Makpila marani to Mamri no ian ka Hibron, dio to tano to Canaan.
20 No sikan ian no natagtuun ni Abraham ka tano woy ka pilang no iglobonganan din ligkat to mgo koot-otawan to Hit.