22
Pig-ol-oogan Si Abraham
1 Takas to soini, pig-ol-oogan si Abraham to Magboboot. Nig-umow ka Magboboot kandin to “Abraham!” woy nigtabak si Abraham to “Soini a.”
2 Nigkagi pad ka Magboboot to “Aapa nu ka anak nu, ka sagsagboka no anak nu no si Isaak no indakoli nu to goinawa nu, woy oghondio kow to Moria. Ipanubad nu sikandin dio pinabadyo to hapuy dio to sagboka no bubungan no ignangon ku koikow.”
3 Masoom pad to pogkapawo, nig-onow si Abraham woy nangadyu sikandin to igtomog to panubad, woy in-untud din to asnu rin, woy nighipanow sikandin duma ki Isaak woy daruwa no suguonon din pohondio to longod no innangon to Magboboot kandin.
4 To igkatou no allow to poghipanow ran, nigtonggak si Abraham woy nakita rin ka ogdoogan dan dio to mariu. 5 No nignangon si Abraham to mgo suguonon din to “Kai kow ro duma to asnu, tagood no oghondio a dutun duma to bato. Ogsadyo koy woy oglibong koy kai to kaniu.”
6 Inpatiang ni Abraham ka igtomog no kadyu dio to anak din no si Isaak, woy sikandin ka nig-aap to moirob woy to hapuy. Tagood to nighipanow sikandan, 7 nig-inso si Isaak to amoy rin no si Abraham no kagi “Amo?”
Nigtabak si Abraham to “Nokoy utu?”
Nig-inso si Isaak to “Duon ka kadyu woy ka hapuy, di hondoi ka karniru no igpanubad ta?”
8 Nigtabak si Abraham to “Utu, ka Magboboot do ian ka ogbogoy to igpanubad ta no karniru.” Woy nigparagas sikandan daruwa to poghipanow.
9 To noko-uma on sikandan to bubungan no innangon to Magboboot kandin, nighimu si Abraham to tubarananano mgo batu, woy pigsabuk din ka igtomog dio to ampow. Pigbaku ni Abraham ka anak din no si Isaak woy inpohibat din sikandin dio to tubaranan ampow to kadyu. 10 No pighuabut ni Abraham ka moirob din odyow to poghimatoy poron ki Isaak. 11 Di nig-umow ka diwata to Magboboot kandin ligkat to langit to “Abraham! Abraham!”
Nigtabak sikandin to “Soini a.”
12 Nignangon ka diwata to “Doka ogmonua ka bato. Doka oghimatadyi sikandin. Kuntoon nataga a no duon kahallok nu to Magboboot, su waro nu ingkannugun ka anak nu no sagsagboka.”
13 Nigtonggak si Abraham woy nakita rin no duon lukosan no karniru no nakasanggat ka sungay rin dio to maapung no lagut. Nighondio si Abraham woy pigpurut din ka karniru woy inpanubad din sikan pinabadyo to hapuy liwan to anak din. 14 No pighingaranan ni Abraham ka sikan no longod no ‘Ka Magboboot ogbogoy’, woy taman kuntoon ognangon ka mgo otow to “Dio to bubungan to Magboboot, igkabogoy ka og-awoson nu.”
15 Nighutuk nig-umow ka diwata to Magboboot ki Abraham ligkat to langit 16 no nignangon “Nigkagi ka Magboboot no ‘Igpangulibot ku koikow pinabadyo to ngaran ku no tongod su soini ka nohimu nu no waro ka mogkannugun to sagsagboka no anak nu, 17 ogboligan ku lagboy sikoikow, woy ogmarasigon ku ka mgo kapunganan nu iing to karasigan to mgo bituon woy iing to karasigan to badyokbok to ilis to dagat. Ogkaagow to mgo kapunganan nu ka mgo ugpaan to mgo usig dan, 18 woy pinabadyo to mgo kapunganan nu ogkaboligan ka tibon mgo koot-otawan to kalibutan, su nigtood ka to innangon ku.’”
19 No, niglibong si Abraham dio to mgo suguonon din, woy nang-uli sikandan to Birsiba, woy nig-ugpo si Abraham dio to Birsiba.
Mgo Anak ni Nahor
20 To songo allow sikan nakarinog si Abraham no duon on mgo anak ni Milka no asawa to suod din no si Nahor. 21-23 Wawau ka mgo anak no lukos ni Nahor woy to asawa rin no si Milka. Si Us ian ka panganoy, si Bus ka igkarangob. Sunud si Kimuil no amoy ni Aram, sunud si Kisid, si Haso, si Pildas, si Yidlap woy si Bituil. Si Bituil ian ka amoy ni Ribika. 24 Songo duon as-asawa ni Nahor no si Riuma, woy songo duon mgo anak dan no lukos no ian si Tiba, si Gaham, si Tahas woy si Maaca.