21
Pogkootow Ni Isaak
1 Kuntoon noid-uan to Magboboot si Sara, woy natood ka inpangulibot din kandin. 2 Naboros si Sara, woy naka-anak to lukos ki Abraham to budyag on si Abraham, to allow ian no innangon to Magboboot. 3 Pighingaranan ni Abraham ki Isaak ka anak dan ki Sara. 4 Pigtuli ni Abraham ka anak din no si Isaak to igkawau no allow, sumao to sugu to Magboboot kandin. 5 Songo gatus on ka panuigon ni Abraham to nootow si Isaak no anak din.
6 Nignangon si Sara to “Pigpangisi a to Magboboot, woy ogpakangisi duma koddi ka tibo no ogdinog to soini.”a 7 Nigtimul si Sara to pognangon “Hontow buwa ka nakaiman-iman ki Abraham no ‘Ogpakapasusu pad si Sara’? Di naka-anak a to lukos ki Abraham to budyag on sikandin.”
8 Nigtulin si Isaak taman to nalutas sikandin. To sikan no allow nighimu si Abraham to dakol no pagkoonan.
9 Di, nakakita si Sara no pigsuy-at si Isaak to anak ni Abraham no pinabadyo ki Hagar no matig Ehiptu, 10 woy nignangon sikandin ki Abraham to “Paawaa nu ka sikan no uripon woy ka anak din, su kono a ogbabali no ogkabaaran ka anak to sikan no uripon to mgo kaaglagan ta ko ogkamatoy ki, ko konon si Isaak do.”
11 No-ook-ook si Abraham to soini, su songo anak din si Ismail. 12 Di nignangon ka Magboboot kandin to “Doka ogkasasow moitongod to bato woy to uripon nu. pamminog ka to innangon ni Sara, su ogligkat ki Isaak ka mgo kapunganan nu no inpangulibot ku koikow. 13 Songo ogkohimu no koot-otawan ka mgo ogligkat ki Ismail no anak to uripon, hoo su songo anak nu sikandin.”
14 To pogkapawo to masoom, nigpurut si Abraham to koonon woy to woig no dio to sooranan no laplap, woy no inbogoy rin sikan ki Hagar. Pigtiang sikan ni Hagar woy pigpohipanow ni Abraham sikandan daruwa to bato. Nighipanow si Hagar woy niglougloug sikandin dio to han-hanawan to Birsiba.
15 To noubus on ka woig to sooranan, ingaat ni Hagar ka anak din dio to diraom to masagkop no kadyu. 16 No, nighipanow si Hagar to kariu-an to ogkoumaan to songo inpano no tunud ligkat to bato woy nigpinnuu sikandin, hoo su nigsumansuman sikandin to “Kono a ogpakatua-ay to pogpitow to kamatadyon to bato,” woy nigbunsud sikandin to pogsinogow.
17 Nakarinog ka Magboboot to bato no nigsinogow, woy nig-umow ka diwata to Magboboot ki Hagar ligkat to langit woy nignangon “Manio to nigsinogow ka? Doka ogkahallok, su nakarinog ka Magboboot to pogsinogow to bato no nighibat. 18 Pahasindoga nu ka bato, woy kitkita nu sikandin su oghimuon ku no mabantug no koot-otawan ka mgo kapunganan din.”
19 No pigpagimuat to Magboboot ka mgo mata ni Hagar woy nakakita sikandin to sakuganan no duon, woy nigsakug sikandin to sooranan din, woy pigpoinom din ka bato.
20 Pigbantadyan to Magboboot si Ismail tagood nigtulin sikandin. Nig-ugpo si Ismail to han-hanawan woy nohimu sikandin no matigdu to pogpano. 21 Tagood nig-ugpo si Ismail to Han-hanawan to Paran, nigpurut ka inoy rin to og-asawoon din no matig Ehiptu.
22 To sikan no mgo allow nighondio si Abimilik ki Abraham duma ki Pikol no igbudyag to mgo sundau ni Abimilik, woy nignangon sikandan ki Abraham to “Pigboligan to Magboboot ka tibo no pighimu nu. 23 No, kuntoon, panguliboti a nu kai to tangkaan to Magboboot no kono a nu ogluk-lukuan lagkos to mgo anak ku woy to mgo kapunganan ku. Sulii a nu woy ka soini no ugpaan no kono no ligkatan nu to karodyowan no inpakita ku koikow.”
24 Nigtabak si Abraham to “Ogpangulibot a to sikan.”
25 Nasawo si Abraham ki Abimilik moitongod to sagboka no sakuganan no pig-agow to mgo suguonon ni Abimilik. 26 Di nigtabak si Abimilik to “Waro a mataga ko hontow ka nighimu to sikan. Waro ka nignangon koddi, woy kuntoon a ro nakarinog to sikan.”
27 No nigbogoy si Abraham to mgo karniru woy mgo baka dio to ki Abimilik, woy nighimu sikandan daruwa to kasabutan.b
28 Niglunsud pad si Abraham to papitu no mgo boian no mgo nati no karniru ligkat to mgo adyam din, 29 woy nig-inso si Abimilik ki Abraham, “Nokoy naan ka soi no papitu no karniru no piglunsud nu?”
30 Nigtabak si Abraham to “Puruta nu soini no papitu no mgo karniru indanan no koddi ian ka nigkali to soini no sakuganan.”
31 No pighingaranan dan ka sikan no longod no Birsiba, su nigpapang-pangulibotoy sikandan daruwa rio.c
32 Takas to pogpapangpangulibotoy dio to Birsiba, nig-uli si Abimilik woy si Pikol no igbudyag to mgo sundau ni Abimilik dio to tano to mgo Filistihanon.