20
Si Abraham Woy Si Abimilik
1 No kuntoon nighalin si Abraham pohondio to Nigib, woy nig-ugpo sikandin dio to taliwaro to Kadis woy to Sur. No nig-ugpo sikandin dio to Girar, 2 woy to dio sikandan, nignangon si Abraham to mgo otow no atoboi rin ka asawa rin no si Sara. No inpapurut ni Abimilik no datu to Girar si Sara odyow no og-asawoon din porom.
3 Di nigpakita ka Magboboot ki Abimilik pinabadyo to tagoinop woy pignangonan din to “Ogkamatoy ka su nigpurut ka to boi no duon on asawa.”
4 Di waro pad nakadani si Abimilik ki Sara, no nignangon sikandin to Magboboot to “Magboboot, og-awoon nu buwa soini no koot-otawan ku no waro sao? 5 Bak ko waro nignangon sikandan daruwa no pataasuod sikandan? Nohimu ku soini to waro maroot no tuud ku.”
6 Dio pad to tagoinop nigtabak ka Magboboot kandin to “Hoo, nataga a no waro maroot no goinawa nu to poghimu to soini, no sikan ian no waro a nigbabali no ogpakasao ka koddi pinabadyo to pog-gon-gon nu kandin. 7 Kuntoon iuli nu ki Abraham ka asawa rin, su taagtagna sikandin, woy ogpanubad sikandin tongod kuna odyow kono ka ogkamatoy. Di ko kono nu iuli ka boi, maogot ian ogkamatoy ka duma to tibon mgo karumahan nu.”
8 Pogkapawo to masoom, pig-umow ni Abimilik ka mgo hibatoon din woy pignangonan din sikandan to tibo no natagoinop din, no nahallok sikandan.
9 No pigpo-umow ni Abimilik si Abraham woy pignangonan din sikandin to “Nokoy soini no pighimu nu kanami? Nokoy buwa ka sao ku kuna no pig-aap nu soini no dakol no karootan koddi woy to pandatuan ku? Waro ka porom nighimu to soini.”
10 Nig-inso pad si Abimilik ki Abraham, “Manio to pighimu nu soini?”
11 Nigtabak si Abraham to “Nigsumansuman a no ‘Kono ogkahallok to Magboboot ka mgo otow kai, no oghimatadyan a ran odyow no og-agowon dan ka asawa ku.’ 12 Woy to maogot atoboi ku sikandin su unawaro ka amoy noy di konon unawa ka inoy noy. No na-asawa kud sikandin. 13 To pigpohipanowan a to Magboboot ligkat to lunggunan to amoy ku nokani, nignangon a to asawa ku no ‘Agad hondoi ki ogdoog nangoni nu ka mgo otow to “ma-ama ku si Abraham,” odyow to pogpapitow to dakol no goinawa nu kanak.’”
14 No in-uli ni Abimilik si Sara dio to ki Abraham, woy songo pigbogadyan din si Abraham to mgo karniru woy mgo baka woy mgo uripon no mgo lukos woy mgo boi. 15 Nignangon si Abimilik to “Pitowa nu soini tano ku. Ogpoko-ugpo ka to agad hondoi ka ogkoiniatan nu.”
16 Nignangon sikandin ki Sara to “Ogbogadyan ku ka ma-ama nu to songo libu no saapi. Ogpoitaga sikan to mgo otow no waro ka mahilaboti woy no waro ka nakasao to soini.”
17 No nigpanubad si Abraham to Magboboot, woy pigdorodyow to Magboboot ka lawa ni Abimilik woy to asawa rin woy mgo uripon din no mgo boi odyow no ogpaka-anak man do sikandan. 18 Hoo su pigsagpongan to Magboboot ka mgo aanakan to mgo boi dio to lunggunan ni Abimilik tongod to asawa ni Abraham no si Sara.