19
Piglogparan Ka Sodoma Woy Ka Gomora
1 Niglopow ka daruwa no mgo diwata dio to Sodoma to maapun on, woy duon si Lot no nigpinnuu dio to longod to gomawan to lunsud. Pogkakita rin kandan, nighondutun sikandin odyow to pogtomu kandan woy nig-unduk sikandin taman to tano.
2 Nignangon sikandin to “Mgo anggam ku, ogsagpit kow pad porom to baoy ku su songo suguonon a now. Ogpakaluu kow to mgo paa now, woy oghibat kow woy kow on oghipanow to masoom.”
Nigtabak ka daruwa no diwata to “Kono koy. Kai koy ro oghibat to libuwasan.”
3 Di unguron oghinggata ni Lot ka mgo diwata taman to nigsood sikandan to baoy rin. Nigsugba sikandin to iglabung dan woy nighilutu sikandin to pan no waro igpatulin, no nigkoon sikandan. 4 To waro pad nighibat sikandan, niglopow ka tibon mgo lukos to tibon ugpaan to Sodoma; mgo budyag woy mgo baubato pad, woy piglingutan dan ka baoy ni Lot. 5 Nig-umow sikandan ki Lot no kagi “Hondoi ka mgo lukos no niglopow to baoy nu kuntoon? Aapa nu sikandan kai to libuwasan odyow no ogpokohilabot koy kandan.”
6 Niglibuwas si Lot odyow to pog-a-aukoy kandan, woy piglokoban din ka gomawan to baoy rin 7 woy nignangon sikandin to “Dokow, mgo suod ku. Dokow oghimu to soini no maroot. 8 Pitowa now, duon daruwa no anak ku no daaga pad no waro pad magon-goni to lukos. Og-aapon ku sikandan kai to kaniu woy ogpokohimu kow to ogkoiniatan now kandan, di dokow oghilabot to soini no mgo magaliug to baoy ku su ogkaasagan ku sikandan.”
9 Nigtabak ka mgo otow to “Awo ka. Pitowa now, nighongkai ka soini no otow no songo dagpu di kuntoon nigboboot sikandin kanta! Oghimu koy to maroot koikow, labow pad to maroot no oghimuon noy to mgo magaliug nu.”
No nigparagas nigsasamok sikandan ki Lot, woy nig-onsig sikandan odyow no ogguguson dan ka lokob to gomawan. 10 Di piggon-gonan si Lot to mgo otow no dio to sood woy pighusud dan sikandin dio to sood, woy piglokoban dan ka gomawan. 11 No pigpabuturan to mgo diwata ka mgo mata to mgo otow no duon to gomawan; mgo budyag woy mgo baubato pad, odyow no kono ogpakakita sikandan ko hondoi ka gomawan.
12 No nig-inso ka mgo otow ki Lot to “Duon pad mgo sakup nu buwa kai? Mgo makaamung nu, mgo anak nu, woy agad hontow pad no sakup nu? Palibuwasa nu sikandan kai 13 su og-awoon noy soini no ugpaan. Tongod to karakol to karootan to mgo otow no narinog to Magboboot, inpa-aap koy rin kai odyow to pog-awo to soini no ugpaan.”
14 Sikan ian niglibuwas si Lot woy nig-aaukuy sikandin to mgo makaamung din; ian ka nakapamungad on to mgo anak din no mgo daaga, woy nignangon si Lot kandan to “Agpas kow og-awo kow to soini no ugpaan su og-awoon to Magboboot ka soini no ugpaan ta.” Di naan to mgo makaamung din no nigliag do sikandin.
15 To magaan on ogsilo ka allow, nignangon ka mgo diwata ki Lot to “Agpas kow! Aapa nu ka asawa nu woy ka mgo anak nu, odyow no kono kow ogpakatagkos to logpad to soini no ugpaan.”
16 To nigliowliow si Lot, pigkitkit to mgo otow ka boad din woy ka mgo boad to asawa rin woy to mgo anak din woy pig-aap dan sikandan dio to libuwasan to ugpaan no waro nabadyaan dan no maroot su dakol ka koid-u to Magboboot kandan. 17 To nakalibuwas on sikandan nignangon ka sagboka no diwata to “Agpas kow, panlaguy kow odyow no kono kow ogkamatoy. Dokow oglingi woy dokow ogsagdok to kai kow pad to naapu. Panlaguy kow taman to mgo bubungan odyow to kono kow ogpakatagkos to logpad!”
18 Di nigbudyu si Lot kandan to “Kono porom, mgo anggam ku! 19 Marodyow on ka pogtagad now koddi no suguanon now, no pigpangabangan a now ligkat to kamatadyon, di kono a ogpaka-adyun to pogpallaguy dio to mgo bubungan; woy ad ogpoko-uma dio no ogkamatoy a to logpad no ogdatong. 20 Pitow kow to soodyo no maintok no ugpaan no marani ko ogpallagudyan ta; baagara a now to pogpallaguy dio, su maintok do sikan, no ogkalipuwas ka pogko-udyag ku.”
21 Nigtabak ka diwata kandin to “No, ogbabali a to sikan no pigbudyu nu. Kono ku oglogparan ka sikan no ugpaan no innangon nu. 22 Di agpas ka to pogpallaguy dio, su waro ogkohimu ku taman to ogpoko-uma ka rio.” No, tongod to innangon ni Lot no ‘Maintok sikan’ pighingaranan ka sikan no lunsud no Soar.a
23 To niglopow on si Lot to Soar, nigsilo on ka allow. 24 No pigpo-uranan to Magboboot ka Sodoma woy ka Gomora to niglogdog no mgo batu no asupri ligkat to langit. 25 No, sikan ian pig-awo to Magboboot ka sikan no mgo ugpaan woy ka tibon naapu lagkos to tibon mgo otow no nig-ugpo to mgo dagdakol no mgo ugpaan woy lagkos to tibo no nigtubu to tano.
26 Di niglingi ka asawa ni Lot woy nohimu sikandin no suwoy no asin.
27 To pogkapawo nigsoom-soom nig-onow si Abraham woy niglibong sikandin dio to longod to pigsasindogan dan daruwa to Magboboot. 28 Nigpantow sikandin pohondio to Sodoma woy Gomora woy to tibon naapu, woy nakakita sikandin to makopal no obol no nigligkat to tano, iing to obol to niglapug. 29 Sikan ian to poglogpad to Magboboot to dagdakol no mgo ugpaan to naapu pigdoromdom din si Abraham, woy pigpangabangan din si Lot ligkat to logpad to pig-ugpaan ni Lot.
Si Lot woy ka mgo Anak din no Daaga
30 Tongod su nahallok si Lot to pog-ugpo to Soar, nighalin sikandin duma to daruwa no anak din no daaga dio to mgo bubungan woy nig-ugpo sikandan dio to sagboka no pilang.
31 Songo allow to sikan, nignangon ka kakoy no anak ni Lot dio to hari rin to “Ogkabudyag on ka amoy ta, woy warad lukos kai no ogpokohulid kanta sumao to pighimu to duma no mgo otow to kalibutan. 32 No, oglasingon ta ka amoy ta odyow no ogpokohulid ki kandin, woy kono ogkatampod ka mgo kapunganan ta kai to kalibutan.”
33 To sikan no maukilom, pigpoinom dan ka amoy ran to ogpakalasing, woy nighulid ka kakoy no anak ni Lot to amoy rin, di waro mataga ka amoy ko nokoy ka nohimu rin, su nalasing sikandin.
34 To pogkapawo, nignangon ka kakoy dio to hari rin to “Ganna no maukilom nighulid a to amoy ta. Angkuwan to maukilom oglasingon ta man do sikandin, woy koikow man on ka oghulid kandin, odyow no ogpaka-anak ki pinabadyo to amoy ta.
35 Sikan ian to sikan no maukilom pighutuk dan po-inoma ka amoy ran to ogpakalasing, woy nighulid ka anak din no hari ki Lot, di songo waro mataga sikandin ko nokoy ka nohimu rin.
36 Sikan ian naboros ka daruwa no anak ni Lot pinabadyo to amoy ran. 37 Naka-anak ka kakoy to lukos woy pighingaranan din ki Moab no ian ka pigligkatan to mgo Moabihanon no mgo otow taman kuntoon. 38 Songo naka-anak ka hari to lukos woy pighingaranan din ki Bin-Ammi no ian ka pigligkatan to mgo Ammonihanon no mgo otow taman kuntoon.