18
Ka Tatou No Magaliug Ni Abraham
1 Nigpakita ka Magboboot ki Abraham dio to marani to dagdakol no mgo kadyu ni Mamri no nigpinnuu si Abraham to gomawan to tukbung din to moinit to allow. 2 Nigtonggak si Abraham, woy duon nakita rin no tatou no mgo otow no nighasindog to marani rin. To nakita rin sikandan, nig-agpas nighondio sikandin ligkat to gomawan to tukbung din odyow to pogtomu kandan, woy nig-unduk sikandin duon to tano.
3 Nignangon sikandin to “Ko narago ka koddi, anggam, kono now ogligaran ka soini sagboka no suguonon now. 4 Og-aapan ku sikaniu to maintok no woig odyow no ogpakapanluu kow to mgo paa now woy ogpokohimooy kow to diraom to soini no kadyu no mohoung. 5 Ogpurut a to ogkakoon now, odyow no oglibong ka dadyagang now woy kow on ogparagas to poghipanow now; hoo su niglopow kow kai to sagboka no suguonon now.”
Nigtabak sikandan to “No. Paragasa nu ka innangon nu.”
6 Sikan ian nig-agpas si Abraham to pog-uli to tukbung din, woy nignangon ki Sara to “Agpas ka. Purut ka to tatou no gantang no harina no marodyow woy himua nu no pan.” 7 No nigpallaguy si Abraham dio to mgo adyam din, woy pig-aam din ka sagboka no marodyow no nati no baka woy inbogoy rin sikan dio to sagboka no uripon din no nig-agpas nigtutua to sikan.
8 No nig-aap si Abraham to gatas woy songo igsoro no nohimu to gatas duma to no-iow no baka no nautu on, woy insabuk din ka tibo duon to tangkaan to mgo magaliug din. Tagood nigkoon sikandan, nighasindog si Abraham to marani diraom to songo kadyu.
9 Nig-inso ka mgo magaliug to “Hondoi ka asawa nu no si Sara?”
Nigtabak si Abraham “Dutun to tukbung.”
10 No nignangon ka sagboka no magaliug ki Abraham to “Oglibongan ku sikoikow ko ogligad on ka sagboka no tuid, woy to poglibong ku duon on anak no lukos ni Sara no asawa nu.” No, nigpamminog naan si Sara dio to gomawan to tukbung, dio to poka ni Abraham. 11 Manigoon on sikandan daruwa si Abraham woy si Sara, woy konad porom ogpaka-anak si Sara su nigtangkod on sikandin. 12 Nokoy naan nigngisi si Sara to goinawa rin no nigsumansuman “Kuntoon no nabooy on ka lawa ku, woy manigoon on ka asawa ku, ogkohimu pad buwa soini no igkarago ku?”
13 No nig-inso ka Magboboot ki Abraham to “Manio to nigngisi si Sara no nignangon ‘Ogpaka-anak a pad buwa no budyag ad on?’ 14 Duon buwa kono ogkohimu to Magboboot? Oglibong a kai to songo tuid kuntoon unawa to innangon ku, woy to poglopow ku duon on anak no lukos ni Sara.”
15 Nahallok si Sara, woy sikan ian nig-ubat sikandin no nignangon “Waro a mogngisi.”
Di nignangon ka Magboboot to “Doka! Nigngisi ka ian.”
16 To poghasindog to mgo otow odyow to poghipanow, nig-aagad si Abraham kandan, woy nigpantow sikandan tibo pohondio to Sodoma.
17 No nignangon ka Magboboot to goinawa rin to “Kono ku buwa ighoos ki Abraham ka oghimuon ku? 18 Ogkohimu si Abraham no amoy to sagboka no mabogbog woy mabantug no koot-otawan, woy ogkaboligan ka tibon mgo koot-otawan to kalibutan pinabadyo kandin. 19 Hoo su pig-aam ku sikandin odyow to pogpanuu to mgo anak din woy to mgo kapunganan din to daan to Magboboot no oghimu sikandan to marodyow woy to matuarong, odyow no ogkatood ka inpangulibot ku kandin.”
20 No nignangon ka Magboboot ki Abraham to “Dakol lagboy ka igkasawoy to Sodoma woy to Gomora woy dakol ka mgo sao dan. 21 No ogpamanoug a rio odyow to pogpitow ko maogot ka innangon no narinog ku moitongod to karootan dan. Ko konon maogot songo ogkataga a.”
22 Nighipanow on ka daruwa no otow pohondio to Sodoma, di nigpalinggaat si Abraham duma to Magboboot.
23 No nigdani si Abraham to Magboboot woy nig-inso to “Og-awoon nu buwa ka mgo matuarong no mgo otow duma to mgo maroot? 24 Ko duon kalimmaan no mgo otow no matuarong dio to sikan no ugpaan; oglogparan nu buwa ka tibo no nig-ugpo dio no kono ka ogkoid-u to kalimmaan no mgo otow no matuarong? 25 Kono ogkohimu sikan no oghimatadyan nu ka mgo matuarong no mgo otow duma to mgo maroot, no ogkohimu sikandan no u-unawa to pogpitow nu. Kono nu ogkohimu sikan su taaghusoy ka to kalibutan, woy kono ka ogpakahimu to maroot.”
26 Nigtabak ka Magboboot to “Ko ogpakakita a to kalimmaan no mgo otow no matuarong dio to Sodoma, kono ku oglogparan ka sikan no ugpaan tongod kandan.”
27 No nighutuk nigkagi si Abraham to “Kuntoon no na-awo ka kasipod ku no nigbunsud a to pogkagi dio to Magboboot agad no atigbun woy alibu a ro, 28 monua ko ogkasalinan ka mgo matuarong no mgo otow to lalima no otow to kalimmaan? Og-awoon nu buwa ka tibon ugpaan tongod to lalima no otow?”
Nigtabak ka Magboboot to “Ko kohop-atan woy lalima no matuarong no mgo otow ro ka ogkakita ku, kono ku og-awoon ka ugpaan.”
29 No nighutuk nigkagi si Abraham to “Monua ko kohop-atan do ka ogkakita nu dio?”
Nigtabak ka Magboboot to “Ko duon kohop-atan, kono ku oghimuon.”
30 No nigkagi pad si Abraham to “Kono ka porom ogkabou kanak Magboboot, no og-inso a pad, di monua ko katouan do ka ogkakita nu dio?”
No nigtabak ka Magboboot to “Kono ku oghimuon sikan ko ogpakakita a to katouan no otow no matuarong.”
31 Nignangon si Abraham to “Kuntoon no na-awo ka kasipod ku no nakakagi ad on dio to Magboboot og-inso a pad, monua ko kawaan do ka ogkakita nu?”
Nigtabak ka Magboboot to “Kono ku og-awoon ka ugpaan ko ogpakakita a to kawaan no matuarong no mgo otow dio.”
32 Nignangon pad si Abraham to “Kono ka porom ogkabou koddi Magboboot, di ogkagi a pad to kasagboka, monua ko sampuu do ka ogkakita nu dio?”
No nigtabak ka Magboboot to “Ko duon sampuu kono ku og-awoon ka ugpaan.”
33 To nigtakas nig-aaukuy ka Magboboot ki Abraham, nighipanow sikandin, woy nig-uli si Abraham.