17
Ka Kasabutan To Pogtuli
1 To 99 on ka panuigon ni Abram, nigpakita ka Magboboot kandin woy nignangon to “Sikoddi ian ka Magboboot no Mabogbog to Tibo; unug ka to goinawa ku woy ugpo ka to waro igkosawoy. 2 Oghogoton ku ka kasabutan ku koikow, woy ogpamarasigon ku lagboy ka mgo kapunganan nu.”
3 Nigluhud si Abram woy nig-unduk sikandin duon to tano, woy nignangon ka Magboboot kandin no 4 “Tongod koddi, soini ian ka kasabutan ku koikow no ogkohimu ka no amoy to marasig no mgo koot-otawan. 5 Kono kad on ogkohingaranan ki Abram; no ligkat kuntoon ka ngaran nu ian si Abrahama, su pighimu ku sikoikow no amoy to marasig no mgo koot-otawan. 6 Ogkabugal ka to marasig, woy mgo koot-otawan woy mgo datu ka ogligkat to lawa nu. 7 Oghogoton ku ka kasabutan ku kuna odyow no ogkohimu no kasabutan no waro katamanan dio to koikow woy to mgo kapunganan nu taman to katamanan. No, ogkohimu a no Magboboot nu woy Magboboot to mgo kapunganan nu. 8 Agad kono ka no tag-inugpo kai, igbogoy ku ka tibo to soini no tano no Canaan dio to koikow woy dio to mgo kapunganan nu taman to katamanan, woy ogkohimu a no Magboboot dan.”
9 Nigparagas nignangon ka Magboboot ki Abraham to “Tongod koikow songo ogtooron nu ka kasabutan ku; sikoikow woy ka mgo kapunganan nu taman to katamanan. 10 Soini ian ka kasabutan ku duon to koikow woy duon to mgo kapunganan nu no ogtooron now; igpatuli ka tibon mgo lukos now. 11 Ogkatuli kow, woy ogkohimu sikan no tuus to kasabutan ku kaniu. 12 taman to katamanan, ogkatuli ka kara lukos kaniu no wawau on no allow ligkat to pogkootow rin, lagkos ka mgo nootow to mgo lunggunan now, woy ka mgo naboli now no mgo uripon ligkat to loin no mgo otow, no konon mgo kapunganan now. 13 Ka mgo nootow to mgo lunggunan now, woy ka mgo naboli to saapi now, ogkatuli ian sikandan. Ka kasabutan ku no pigtuus duon to sapu now ogpalinggaat taman to katamanan. 14 Ka waro matuli no lukos ogkadogil to mgo koot-otawan din; hoo su waro nigbabali sikandin to kasabutan ku.”
15 Songo nignangon ka Magboboot ki Abraham to “Si Sarai no asawa nu, kono nud hingarani ki Sarai; ko konon si Sarabon. 16 Ogboligan ku sikandin, woy ogbogadyan ku sikoikow to anak no lukos pinabadyo kandin. Ogboligan ku sikandin odyow no ogkohimu sikandin no inoy to mgo koot-otawan, woy mgo datu to mgo koot-otawan ka ogligkat kandin.”
17 Nighutuk nig-unduk si Abraham duon to tano woy nigngisi sikandin no nigkagi dio to goinawa rin to “Duon buwa anak no lukos no ogligkat to otow no songo gatus on ka panuigon din? Ogpaka-anak buwa si Sara no kasiyaman on ka panuigon din?” 18 Woy nigkagi si Abraham to Magboboot to “Ogboligan nu ro porom si Ismail!”
19 No nignangon ka Magboboot to “Hoo ian, di ogkaboros to lukos ka asawa nu no si Sara, woy oghingaranan nu ka bato ki Isaakc. Oghogoton ku ka kasabutan ku dio to kandin woy dio to mgo kapunganan din taman to katamanan. 20 Narinog ku ka budyu nu tongod ki Ismail, woy ogboligan ku sikandin ian; og-anak sikandin to marasig woy ogmoon-ing ka mgo kapunganan din. Ogkohimu sikandin no amoy to sampuu woy daruwa no mgo igbudyag, woy ogkohimu sikandin no songo ligkatan to mabantug no koot-otawan. 21 Di, oghogotan ku ka kasabutan ku dio ki Isaak no ogkootow ki Sara ko ogligad on ka songo tuid ligkat kuntoon.”
22 Ka nigtakas on nig-aaukuy sikandin ki Abraham, nigkawoy ka Magboboot. 23 To sikan ian no allow, pigtuli ni Abraham ka anak din no si Ismail, woy ka mgo otow no nootow duon to lunggunan din woy ka mgo naboli rin no mgo uripon; ian natuli din ka tibo no mgo lukos no duon to lunggunan din sumao to innangon to Magboboot kandin. 24 Kasiyaman woy sasiyam ian ka panuigon ni Abraham woy natuli sikandin 25 woy sampuu woy tatou ka panuigon ni Ismail; 26 ian nokogdongan si Abraham woy si Ismail to pogtuli to sikan no allow. 27 Woy nokogdongan ki Abraham to pogtuli ka tibon mgo lukos to lunggunan ni Abraham, lagkos to mgo nootow to lunggunan din woy ka mgo naboli rin ligkat to loin no otow.