16
Si Abram Woy Si Hagar
1 No kuntoon, waro pad anak ni Sarai no asawa ni Abram, di duon uripon din no matig Ehiptu no pighingaranan ki Hagar. 2 No nignangon si Sarai ki Abram to “Pigponoran a to Magboboot no kono a ogpaka-anak. No, huliri nu ka uripon ku; naugpa ogkohimu no duon mgo anak ta pinabadyo kandin.” No nigbabali si Abram to innangon ni Sarai.
3 Nokoy naan to takas to pog-ugpo ni Abram to Canaan to sampuu no tuid, inbogoy ni Sarai si Hagar no uripon din no matig Ehiptu dio ki Abram odyow no og-asawoon din. 4 Nighulid si Abram ki Hagar, woy naboros si Hagar.
To nataga on si Hagar no naboros sikandin nigbunsud nigpoima-ima sikandin to igbudyag din no si Sarai. 5 No nignangon si Sarai ki Abram to “Koikow ka ogsonditan ku to soini no ingkabaybadyari ku. Inbogoy ku ka uripon ku dio to boad nu, woy kuntoon no nataga sikandin no naboros sikandin, nigpoima-ima sikandin koddi. Ka Magboboot on ka baagad to kanta no daruwa.”
6 Nigtabak si Abram to “Uripon nu ian sikandin. Koikow ka ogboot to litos no oghimuon nu kandin.” No pig-ul-uangan ni Sarai si Hagar woy nokoy naan no nigpanlaguy on si Hagar.
7 Nakakita ka diwata to Magboboot ki Hagar to marani to sagboka no sobsob to aw-awangan; ian ka sobsob no duon to ilis to daan pohondio to Sur. 8 Woy nignangon ka diwata to “Hagar, uripon ni Sarai, hondoi ka puun, woy hondoi ka ogdoog?”
Nigtabak si Hagar to “Nigpanlaguy a ligkat to igbudyag ku no si Sarai.”
9 No nignangon ka diwata to Magboboot kandin to “Uli ka dio to igbudyag nu, woy ogpariraom ka to kandin no pogboot.” 10 Nigparagas ka diwata to pogkagi to “Ogmarasigon ku ka mgo kapunganan nu taman to kono ogkasool sikandan.”
11 Woy songo nignangon ka diwata to Magboboot to “Kuntoon duon igkaboros nu, woy ogpaka-anak ka to lukos. Oghingaranan nu sikandin ki Ismail, su nakarinog ka Magboboot to pogpannanoy nu.a 12 Ogkohimu sikandin no iing to magintaunan no asnu, woy og-atuan din ka tibon mgo otow woy og-atu ka tibon mgo otow kandin, woy og-ugpo sikandin to maroot no goinawa duon to mgo suod din.”
13 Pighingaranan ni Hagar ka Magboboot to “Sikoikow ian ka Magboboot no ogpakakita koddi. Hoo su kuntoon nakita kud ka ogkita koddi.” 14 No sikan ian pighingaranan to mgo otow ka sakuganan dio to taliwaro to Kadis woy Barid no Bir-Lahai-Roi.b