15
Ka Kasabutan To Magboboot Ki Abram
1 Takas to sikan, nigkagi ka Magboboot ki Abram pinabadyo to kitoonon no kagi “Dokag kasasow Abram su sikoddi ian ka kaasaganu woy ka dakol no dassag nu.”
2 Di nigtabak si Abram no kagi “Magboboot no Igbudyag, nokoy ka igkabogoy nu koddi no waro anak ku woy ka ogpaka-abin to tugun-tugunon ku ian si Iliisir no matig Damasku? 3 Waro ka nigbogoy koddi to anak; nokoy naan no songo uripon to lunggunan ku ian ka ogpaka-abin to mgo kaaglagan ku.”
4 No narinog man do ni Abram ka kinagian to Magboboot no kagi “Konon sikan no otow ka ogpaka-abin to kaaglagan nu, ko konon anak no lukos no ogligkat to lawa nu.” 5 No pig-aap to Magboboot si Abram dio to libuwasan no nignangon to “Longhag ka to langit woy soola nu ka mgo bituon ko ogkohimu.” Woy nigparagas sikandin to pognangon no kagi “Iing to sikan koon-ing ka mgo kapunganan nu.”
6 Nigtuu si Abram to innangon to Magboboot woy tongod to pogtuu rin insumansuman sikandin to Magboboot no matuarong.
7 Songo nignangon ka Magboboot no, “Sikoddi ian ka Magboboot no nig-aap koikow ligkat to Ur dio to Kaldiu odyow to pogbogoy to soini no tano kuna.”
8 Di nignangon si Abram to “Magboboot no Igbudyag, monuon ku no ogkataga a no ogkatinawo ku ian ka soini no tano?”
9 No nignangon ka Magboboot kandin to “Aapi a nu to nati no baka no boian woy to kambing woy to lukosan no karniru no olin tatou on no tuid ka kabudyagi ran, woy songo aap ka to tukmu woy to pispis no salapati.”
10 No pig-aap ni Abram ka soini tibo dio to tangkaan to Magboboot, woy pigpori rin ka mgo lawa ran woy pinogtangko-tangko din ka mgo pori; di waro din poria ka mgo manuk-manuk. 11 Nanlatun dio to mgo pinamori no mgo adyam ka mgo manuk-manuk no taagkoon to nammatoy, di pig-au sikandan ni Abram.
12 To magaan on ogkatangkob ka allow, nalinoknok si Abram woy duon makahahallokoy no dooman no nigdatong kandin. 13 No nignangon ka Magboboot kandin to “To maogot ian, ka mgo kapunganan nu og-ugpo to songo ugpaan no kono no kandan, woy ogkouripon woy oglo-loigon sikandan taman to hop-at no gatus no tuid. 14 Di oglogparan ku ka koot-otawan no og-uripon kandan, woy takas to sikan ogpakalibuwas sikandan to sikan no tano no ogpaka-aap sikandan to marasig no kaaglagan. 15 Di sikoikow, ogpaka-agpot ka to mgo kaminunaan nu to maawang no goinawa, woy ogkalobong ka no manigoon ka lagboy. 16 To igkohop-at no kapunganan, oglibong kai ka mgo kapunganan nu, su waro pad nataman to katamanan ka mgo sao to mgo kapunganan ni Amor.”
17 To nigsaop on ka allow woy maukilom on, niglopow no duon sabukan to hapuy no nig-oobol woy songo duon niglogdog no pupud no nigbadyo to taliwaro to mgo pinamori no mgo adyam. 18 To sikan no allow nighimu ka Magboboot to kasabutan dio ki Abram no nignangon “Igbogoy ku rio to mgo kapunganan nu ka soini no tano ligkat to woig to Ehiptu taman to dakol no woig no Eupratis, 19 no igkalagkos ku ka tano to mgo kapunganan ni Kin, ni Kinis, ni Kadmon, 20 ni Hit, ni Piris, ni Ripa, 21 ni Amor, ni Canaan, ni Girgas woy ni Yibus.”