14
Pigpangabangan Ni Abram Si Lot
1-2 No to sikan no mgo allow nigmangadyow si Amrapil no datu to Sinar woy si Ariok no datu to Ilasar woy si Kidarlaomir no datu to Ilam woy si Tidal no datu to Goim, ki Bira no datu to Sodoma woy ki Birsa no datu to Gomora woy ki Sinab no datu to Adma, woy ki Simibir no datu to Siboim woy dio to datu to Bila no songo oghingaranan no Soar. 3 Soini no namourian no lalima no mgo datu nasagboka ka dadyagang dan dio to aug to Siddim no ian ka mapoit no dagat. 4 Sood to sampuu woy daruwa no tuid nadiraom sikandan to sugu ni Kidarlaomir, di to igkasampuu woy tatou no tuid nig-atu sikandan.
5 To igkasampuu woy hop-at no tuid nighipanow si Kidarlaomir duma to mgo datu no nasagboka to dadyagang dan kandin woy naroog dan ka mgo kapunganan ni Ripa to Astirot Karnaim woy ka mgo kapunganan ni Sus to Ham, woy ka mgo kapunganan ni Im to Sabi Kiriataim 6 woy ka mgo kapunganan ni Hor dio to kabubunganan to Siir taman to Il Paran no marani to han-hanawan. 7 No nigtiku sikandan woy nighondio sikandan to In-Mispat (no ian ka Kadis) woy pig-agow ran ka tibon tano to mgo kapunganan ni Amalik duma to tano to mgo kapunganan ni Amor no nig-ugpo dio to Hasason Tamar.
8 No niglimud-limud ka datu to Sodoma woy ka datu to Gomora woy ka datu to Adma woy ka datu to Siboim woy ka datu to Bila (no ian ka Soar) woy nighipanow sikandan no nigmangadyow dio to aug to Siddim 9 dio ki Kidarlaomir no datu to Ilam, woy ki Tidal no datu to Goim woy ki Amrapil no datu to Sinar woy ki Ariok no datu to Ilasar; hop-at no datu no nig-atu to lalima no datu. 10 No marasig ka mgo lungag to alkitranadio to aug to Siddim, woy to pogpanlaguy to mgo datu to Sodoma woy Gomora nono-uug ka duma no mgo sakup dan dio to mgo lungag, di ka ruma no mgo otow nakapanlaguy pohondio to mgo bubungan. 11 Pig-agow to hop-at no datu ka tibon mgo kaaglagan to Sodoma woy Gomora woy to tibo no pogkoon dan, woy nanhipanow sikandan. 12 Songo narakop dan woy pig-aap ka anakon ni Abram no si Lot duma to mgo kaaglagan din su dio nig-ugpo sikandin to Sodoma.
13 No, duon sagboka no otow no nakapanlaguy woy nighondio sikandin no nignangon to sikan ki Abram no Hibriu. Nig-ugpo si Abram to longod to mgo dakol no kadyu ni Mamri no suod ni Iskol woy ni Anir no mgo kapunganan ni Amor no tibo sikandan nasagboka ki Abram. 14 To pogkarinog ni Abram no narakop ka anakon din, piglimud din ka 318 no mgo in-anad no sakup din no nootow to kalunggunan din, woy piggapon din ka mgo nig-agow ki Lot taman dio to Dan. 15 No to maukilom pigbaad ni Abram ka mgo sakup din odyow to poglusud to mgo datu woy nakaroog si Abram woy piggapon dan sikandan taman to Hoba dio to baabagan to Damasku. 16 Nahawi ni Abram ka tibon mgo kaaglagan woy ka anakon din no si Lot duma to mgo boi woy ka duma no mgo otow no na-agow.
17 Takas to poglibong ni Abram to naroog din on si Kidarlaomir woy ka mgo datu no nasagboka kandin, niglibuwas ka datu to Sodoma odyow to pogtomu kandin dio to aug to Sabi (no songo oghingaranan no aug to mgo datu).
18 No, nig-aap si Malkisidik no datu to Salim to pan woy binu. Sikandin ian ka taagpanubad to Magboboot no Babantugi, 19 woy pigboligan din si Abram no nignangon “Ogkaboligan poron si Abram to Magboboot no Babantugi, no nighimu to langit woy to tano. 20 Woy ogkasadyobporon ka Magboboot no Babantugi su pigbogadyan ka rin to pogpakaroog dio to mgo usig nu.” Woy pigbogadyan ni Abram si Malkisidik to igkasampuu no baad to tibo no mgo kaaglagan din.
21 Nignangon ka datu to Sodoma ki Abram to “Iuli nu koddi ka mgo otow no pigpangabangan nu woy koikow on ka tagtuun to tibon mgo kaaglagan.”
22 Di nignangon si Abram to datu to Sodoma no kagi “Nangulibot a rio to Magboboot no Babantugi no nighimu to langit woy to tano, 23 no kono a ogpurut to agad nokoy no koikow, agad taman to songo badbad to sinulid ko songo sol-oy to sinilas nu, odyow kono ka ogpakanangon no ‘Naratu si Abram pinabadyo koddi.’ 24 Kono a ogpurut to agad nokoy ko konon ka nakoon to mgo sakup ku woy ka taadcto mgo duma ku no si Anir, si Iskol woy si Mamri. Taari nu sikandan to dassag dan.”