13
Nokogsuwoy Si Abram Woy Si Lot
1 Sikan ian nigligkat si Abram to Ehiptu pohondio to Nigib, duma to asawa rin woy to tibo no kandin, woy nigduma si Lot kandin. 2 Naratu lagboy si Abram to mgo adyam, to saapi woy to bulawan.
3 Ligkat to Nigib nighalinhalin si Abram taman to noko-uma sikandin to Bit-il, dio to longod to pigpos-okan din to tukbung din nokani dio to taliwaro to Bit-il woy to Ai, 4 no ian ka pighimuan din to tubaranan. Nighutuk sikandin nig-umow to ngaran to Magboboot dio.
5 No kuntoon, nigdumaruma si Lot ki Abram, woy songo duon mgo karniru woy mgo baka woy mgo tukbung din. 6 Di tongod su moon-ing lagboy ka mgo adyam dan, konad ogpakalitos ka lagut to tano kandan ko ogkatibo sikandan. 7 No sikan ian nokog-ogot-ogot ka mgo taagbantoy to mgo adyam ni Abram woy ka mgo taagbantoy to mgo adyam ni Lot. Songo duon pad ka mgo kapunganan ni Canaan woy ni Piris no nig-ugpo to sikan no tano dio.
8 Sikan ian nignangon si Abram ki Lot “Kono ki porom og-inogotay woy kono porom ogmokog-ogot-ogotoy ka mgo taagbantoy to mgo adyam ta, hoo su pataasuod ki. 9 No pigkita nu ka tibon tano to tangkaan nu. Marodyow ko ogpasulsuwadyoy ki. Ko oghondio ka to gibang, oghondio a to kawanan. Ko oghondio ka to kawanan, oghondio a to gibang.”
10 No nigpamantowpantow si Lot, woy pigkita rin no nawoigan to marodyow ka tibon tano to aug to Jordan pohondio to Soar, iing to taligobo to Magboboot, woy iing to tano to Ehiptu. (Soini ian ka waro pad awoa to Magboboot ka Sodoma woy ka Gomora.) 11 Sikan ian no pig-aam ni Lot ka tibon aug to Jordan woy nighipanow sikandin pohondio to ogsilaan. Nigpasul-suwadyoy sikandan daruwa: 12 nig-ugpo si Abram to tano to Canaan woy nig-ugpo si Lot marani to mgo dakol no ugpaan dio to aug woy nigpos-ok sikandin to mgo tukbung din marani to Sodoma. 13 No kuntoon maroot lagboy ka mgo otow to Sodoma woy dakol ka mgo sao dan duon to Magboboot.
14 Ka noongkoran on si Abram ni Lot, nignangon ka Magboboot kandin to “Linguta nu to pogpitow woy pamantowpantow ka ligkat to ogsilaan pohondio to ogsaopan woy dio pad to baabagan. 15 Igbogoy koikow ka tibon tano no ogkitoon nu woy dio to mgo kapunganan nu taman to katamanan. 16 Ogmoon-ingon ku ka mgo kapunganan nu odyow no ogko-unawa sikandan to atigbun to tano, odyow ko hontow ka ogpakasool to abug to tano, songo ogpakasool sikandin to mgo kapunganan nu. 17 Hipanow ka, woy louglouga nu ka tibo no tano, su igbogoy ku sikan koikow.”
18 Sikan ian no pighalin ni Abram ka mgo tukbung din woy nig-ugpo sikandin to longod to mgo dakol no kadyu ni Mamri to Hibron, woy nighimu sikandin to tubaranana to Magboboot dio.