12
Pig-umow Si Abram To Magboboot
1 No, nignangon ka Magboboot ki Abram no, “Ongkori nu ka ugpaan nu, ka mgo karumahan nu woy ka lunggunan to amoy nu, woy oghondio ka to longod no igpapitow ku koikow. 2 Oghimuon ku ka mgo kapunganan nu no mabantug no koot-otawan, woy ogboligan ku sikoikow. Oghimuon ku no mabantug ka ngaran nu, woy ogkohimu ka no sagboka no igbolig. 3 Ogboligan ku ka agad hontow no ogbolig koikow, woy songo ogtungadyawan ku ka agad hontow no ogtungadyow koikow; woy ogkaboligan ka tibon mgo koot-otawan to kalibutan pinabadyo koikow.”
4 Sikan ian no nighipanow si Abram sumao to innangon to Magboboot kandin; woy nigduma si Lot. 75 on ka panuigon ni Abram pogligkat din to Haran. 5 Pig-aap ni Abram ka asawa rin no si Sarai, woy ka anakon din no si Lot, woy songo pig-aap din ka tibon mgo kaaglagan no nalimud dan woy ka mgo otow no nasakup dan tagood to dio sikandan to Haran, woy nighipanow sikandan pohondio to tano to Canaan woy niglopow sikandan dio.
6 Nigparagas si Abram to poghipanow taman to noko-uma sikandin to dakol no kadyu to Mori dio to Sikim. To sikan no mgo tuid duon dod ka mgo kapunganan ni Canaan no nig-ugpo to sikan no tano. 7 No, nigpakita ka Magboboot ki Abram woy nignangon ka Magboboot kandin to “Igbogoy ku ka soini no tano dio to mgo kapunganan nu.” No sikan ian nighimu si Abram to tubarananato Magboboot no nigpakita kandin.
8 Ligkat dio, nigparagas si Abram pohondio to mgo bubungan to ogsilaan to Bit-il woy nigpos-ok sikandin to tukbung din dio to taliwaro to Ai woy to Bit-il. Songo nighimu sikandin to tubaranan dio woy pig-umow rin ka ngaran to Magboboot. 9 No nighipanow man do si Abram woy nigparagas sikandin pohondio to tano to Nigib.
10 No kuntoon nigdatong no duon bitil to ugpaan dan, woy nighondio si Abram to Ehiptu odyow to pog-ugpo dio tagtagood, su dakol ka bitil. 11 To marani on sikandin to Ehiptu, nignangon si Abram to asawa rin no si Sarai no kagi “Nataga a no marodyow ka lagboy no boi ko ogpitawon. 12 Ko ogpakakita koikow ka mgo matig Ehiptu, ognangon sikandan no ‘Sikan ian ka asawa rin.’ No oghimatadyan a ran, di sikoikow, og-udyagon ka ran. 13 No, nangoni nu sikandan no atoboi ku sikoikow, odyow no marodyow ka pog-otow-otow ran koddi tongod koikow, woy ogpalinggaat a no manokal tongod to pognangon nu.”
14 To poglopow ni Abram dio to Ehiptu, nakakita ka mgo matig Ehiptu no marodyow lagboy no boi si Sarai pitawon 15 woy to pogkakita to mgo hibatoon ni Paraobkandin, nignangon sikandan to marodyow moitongod kandin dio ki Parao, woy pig-aap si Sarai dio to dakol no baoy ni Parao. 16 Marodyow ka pog-otow-otow ran ki Abram tongod ki Sarai, woy pigbogadyan si Abram to mgo karniru woy mgo baka, woy mgo asnu no lukosan woy boian, woy mgo uripon no mgo lukos woy mgo boi woy mgo kamil.c
17 Di nigpa-aap ka Magboboot to mgo makahahallokoy no mgo dau dio ki Parao woy dio to kalunggunan din tongod ki Sarai no asawa ni Abram. 18 No inpo-umow ni Parao si Abram woy nig-inso to “Nokoy soini no pighimu nu koddi? Manio to waro a nu nangoni no asawa nu sikandin? 19 Manio to nignangon ka no atoboi nu sikandin taman to napurut ku sikandin odyow no og-asawoon ku porom? Soini ka asawa nu. Kuaa nu woy awo kad!” 20 No sikan ian nigsugu si Parao to mgo sakup din moitongod ki Abram, woy inpo-awo dan si Abram duma to asawa rin woy to tibo no duon to kandin.