35
Niglibong Si Jacob To Bit-il
1 No nignangon ka Magboboot ki Jacob to “Hondio ka no og-ugpo dio to Bit-il, woy himu ka to tubarananato Magboboot no nigpakita koikow to pogpanlaguy nu puun to kakoy nu no si Esau.”
2 No nignangon si Jacob to lunggunan din woy to tibo no nigduma kandin to “Idogpak now ka tibon mgo inotowotow no duon to kaniu. Parigus kow woy liwani now ka mgo kinabo now. 3 Ogmanhalin ki to Bit-il, woy oghimu a to tubaranan to Magboboot dio, su pigtabak a to pogpanubad ku to allow no no-ook-ook a, woy nigdumaruma ka Magboboot kanak to tibon mgo nahondiaan ku.”
4 Sikan ian inbogoy dan ka tibon mgo inotowotow ran dio ki Jacob, woy to tibon mgo arikisbpuun to mgo talinga ran, woy inlobong ni Jacob sikan dio to diraom to kadyu no alon dio to Sikim. 5 Nighipanow sikandan, woy pogpagoram to Magboboot to kahallok ka tibon mgo otow to mgo lunsud no nakalingut kandan odyow no waro oggapon kandan.
6 Niglopow si Jacob woy ka mgo duma rin dio to Lus (no songo pighingaranan no Bit-il) dio to tano to Canaan. 7 Nighimu sikandin to tubaranan dio, woy pighingaranan din ka sikan no longod no Il Bit-il. Hoo, su sikan ian ka longod no nigpakita ka Magboboot ki Jacob to nigpanlaguy sikandin puun to kakoy rin dongan.
8 Kuntoon namatoy si Dibora no taagtamong ni Ribika, woy inlobong sikandin diraom to kadyu no alon to saad to Bit-il. No pighingaranan ka kadyu no Alon Bakut, no to kanta pad kadyu to pogsinogow.
9 Takas to niglibong si Jacob puun to Paddan Aram, nighutuk nigpakita ka Magboboot kandin, woy pigboligan din si Jacob. 10 Nignangon ka Magboboot kandin to “Ka ngaran nu ian si Jacob, di konad no si Jacob ka ig-umow koikow; ko kono no si Israil on ka ngaran nu.” Sikan ian no si Israil on ka ngaran ni Jacob. 11 Nigkagi pad ka Magboboot to “Sikanak ka Magboboot no Mabogbog to Tibo. Ogmoon-ing ka. Songo koot-otawan woy puntuk to mgo koot-otawan ka ogligkat koikow. Mgo datu ka duma no mgo kapunganan nu. 12 Igbogoy ku koikow ka tano no inbogoy ku ki Abraham woy ki Isaak, woy songo igbogoy ku ka sikan no tano dio to mgo tipouri nu.”
13 No nigkawoy ka Magboboot to sikan no longod no in-aaukadyan dan. 14 Nigpahasindog si Jacob to suwoy no batu dio to in-aaukadyan din to Magboboot. Nigbus-ug si Jacob to binu no igpanubad dio to batu, woy songo pigbus-ugan din ka batu to lana. 15 Pighingaranan ni Jacob no Bit-ilcka sikan no longod no in-aaukadyan din to Magboboot.
16 No nighipanow sikandan puun to Bit-il. To madmariu pad sikandan to lunsud to Iprata, pighadyoran si Rakil, woy piglogonan sikandin. 17 To piglogonan sikandin to pog-anak nignangon ka nig-udyamu kandin to “Doka ogkahallok su naka-anak ka man do to lukos.” 18 To noopus on ka goinawa rin; hoo su natakin sikandin, pighingaranan ni Rakil ka anak din ki Bin-Oni. Di, pigbalbau to amoy rin ka ngaran to bato ki Binyamin.d 19 No, sikan ian namatoy woy inlobong si Rakil to daan pohondio to Iprata (no songo oghingaranan no Bitlihim). 20 Nigpos-ok si Jacob to suwoy no batu no tuus to piglobongan ni Rakil, woy duon dod taman kuntoon.
21 Nigparagas si Israil to poghipanow, woy nigpos-ok sikandin to tukbung din to kohuna-an to Migdal Idir. 22 Tagood to pog-ugpo ni Israil to sikan no tano, nigsood si Riubin woy pighuliran din si Bilha no as-asawa to amoy rin, woy nakarinog si Israil tongod to sikan.
To tibo, sampuu woy daruwa ka mgo anak no lukos ni Jacob; 23 ka mgo anak din pinabadyo ki Lia ian si Riubin (no panganoy ni Jacob), si Simion, si Livi, si Juda, si Isakar woy si Sibulun. 24 Ka mgo anak ni Rakil ian si Jose woy si Binyamin. 25 Ka mgo anak to suguonon ni Rakil no si Bilha ian si Dan woy si Naptali. 26 Ka mgo anak to suguonon ni Lia no si Silpa ian si Gad woy si Asir.
Sikandan ian ka mgo anak no lukos no nootow kandin to Paddan Aram.
27 Nig-uli si Jacob dio to amoy rin no si Isaak dio to Mamri no marani to Kiriat Arba (no songo oghingaranan to Hibron), dio ian to ugpaan ni Abraham woy ni Isaak dongan. 28 Songo gatus woy kawau-an no tuid ka ukul ni Isaak. 29 Nabigtow ka goinawa rin, woy namatoy sikandin no naka-agpot ka gimukud din to mgo kaminunaan din no budyag on sikandin. Ka mgo anak din no si Esau woy si Jacob ian ka niglobong kandin.