3
Nighondio si Jonas to Ninibi
1 Nighutuk man do niglopow ka kinagian to Magboboot ki Jonas no kagi, 2 “Hondio ka diot dakol no lunsud to Ninibi woy nangoni nu sikandan to igpanangon ku koikow.”
3 No nigbabali si Jonas to Magboboot woy nighondio sikandin to Ninibi. No kuntoon, mau-ag lagboy no lunsud ka Ninibi – tatou no allow ko oghip-hipanowan soi. 4To an-anadyan no allow, nigbunsud si Jonas to poghip-hipanow diot lunsud woy nignangon-nangon sikandin no kagi, “Kohop-atan no allow naan do woy oglogparan ka Ninibi.” 5 Nigtuu ka mgo matig Ninibi to Magboboot. Nighagtong sikandan tibo to pogkoon, agad ka nawaraan woy ka naruonan, nanginabo sikandan to saku to pogpapitow to pogsondit dan.
6 To nakarinog ka hari to Ninibi to sikan, nighasindog sikandin ligkat to trunu? rin, pigluung din ka kandin no marodyow no kinabo, woy nigsau-ub sikandin to saku woy nigpinnuu to atigbun. 7 No nigpa-aap sikandin to poitaga to tibo no duon to Ninibi no kagi,
“Soi ka sugu no ligkat to hari woy to mgo igbudyag no duma rin: Dokow pakoona ka tibo, agad otow woy ko adyam; waro agad hontow no ogkoon woy ko og-inum. 8Pasau-uba now atag to saku ka tibon otow woy adyam. Kara otow, po-umowa duon to Magboboot to tibon goinawa rin. Woy ongkori now ka mgo maroot no daan woy hinimuan now. 9Naugpa ogkohoid-uan ki to Magboboot woy ogkobalbaw ka kandin no kabou kanta odyow no kono ki ogkammatoy.”
10 To pogkakita to Magboboot to pighimu ran woy to pog-iniug dan to karootan dan; nohoy-u sikandin kandan woy waro din toora ka logpad no pigbabantaan din.