4
Nabou si Jonas to Magboboot
1 Di niglangot si Jonas tongod to sikan woy nabou sikandin. 2Nigpanabisabi sikandin to Magboboot no kagi, “Pitow ka Magboboot no Igbudyag, soini ian ka inkagi ku to dio a pad to kanami’n ugpaan. Sikan ian no nig-agpas a no nigpanlaguy to Tarsis su nataga a no moid-uon ka no Magboboot, mananoy ka ogkabou woy dakol ka goinawa nu no kono nu igparagas ka logpad nu. 3 No kuntoon, Igbudyag ku, hawia nud ka ukul ku su madmarodyow pad no ogkamatoy a woy to ogkoudyag a.”
4 Di nigtabak ka Magboboot to, “Manio to nabou ka? Litos bua no ogkabou ka?”
5 Niglibuwas si Jonas woy nigpinnuu sikandin dio to ogsilaan to lunsud. Nigtutukbung sikandin woy dio sikandin nigpinnuu no nigpohoung odyow to pogpitow ko ogkoomonu ka lunsud.
6 No duon pinamua no inpatubu to Magboboot to longod ni Jonas odyow no duon ogkohoungan din. Narago lagboy si Jonas to soini. 7Di to pogkapawo, nigpa-aap ka Magboboot to uod-uod no nigkoon to pinamua woy naanos soini. 8 To pogsilo to allow, nigpa-aap ka Magboboot to moinit lagboy no kaamag no nigligkat to ogsilaan. Narampil si Jonas to koinit to allow woy nigmautoy on sikandin. Nigkoiniat sikandin no ogkamatoy woy kagi rin to, “Madmarodyow pad no ogkamatoy a woy to ogkoudyag a.”
9 Di kagi to Magboboot ki Jonas to, “Litos bua no ogkabou ka tongod to sikan no pinamua?”
Nigtabak si Jonas to, “Hoo, litos ian! Nabou a lagboy woy ogkoiniat a no ogkamatoy.”
10 Di kagi to Magboboot to, “Nohimonow ka to sikan no pinamua di waro man inkoirapi nu to sikan woy kono’n sikoikow ka nigpatubu. Nigtubu do duon to songo kausiloman woy namatoy to songo kausiloman. 11 Di ka Ninibi, duon labow pad to 120,000 no otow no waro mataga ko nokoy ka marodyow woy ko nokoy ka maroot, woy songo moon-ing ka mgo adyam duon. Kono bua no litos no ogkohimonowan ku soi dakol no lunsud to Ninibi?”