Yhûmsing Gùng Lé, Garai Gasâng Chyáng Ap To Râ Hkyô
4
Núngmòq má gyè dut lhûm é eq mabyòq jishûm gi, hká mai htoq lo é lhú? Núngmòq ahkaû má gùngsho ô nau é hkyô pé ngón hkyô hô mù, majan zân lhûm é yánmai, dùt htoq lo é a nghut kó lhú? 2 Núngmòq yùt yùt myìt ô nau nyì kôlhang, haî le a wó yû kó. Núngmòq sat nyi é eq mânon nyì kôlhang, a wó yû kó. Núngmòq byòq lhûm nyi é eq majan htoq lhûm nyì kôlhang, haî le a wó yû kó; hkâsu mù gâ le, núngmòq, Garai Gasang lé a dung kô é yánmai nghut ri. 3 Núngmòq dung kôlhang, a myang yù kó nghut ri; hkâsu mù gâ le, núngmòq é ngón kún hkyô má chung jaì langsâ pyám râ matú, shut é dông dûng nyì kô é yánmai nghut ri.4 Su-myi sulàng lú é bang su gidìq a gîng é bang ê, mingkan ô nau é hkyô lé buìnùm du é myìt gi, Garai lé a ngui é myìt nghut é hkyô lé, núngmòq a sé kó lhú? Haû mù luî, mingkan ô nau é hkyô eq buìnùm dù naù sû ó yùq nghut kôlhang, Garai Gasâng é gyè nghut nyi ri. 5 Dum ralhum, ngá-nhúng má Garai Gasang kat lhûng tô é sô gi, mânon é myìt lúng nyi ri ga luî, Chyúmdang má taî é gi, akôm nghut ri nghû, núngmòq myìt ngam nyi akô lhú? 6 Nghut kôlhang, Yhang gi, je kô é jeju ru byî nyi lhê. Haû eq rajung za, Chyúmdang má,
“Garai Gasang gi, nghutbûn é bang lé hkûm zing pyám kôlhang, myìt lhoqnyhum é bang lé jeju byî ri.”a
ga taî tô ri.
7 Haû mù, Garai ùphkang é a‑ô má rû nyi nyì keq; Nàt Tsádán lé hkûm tang pyám keq; haú hkûn, yhang núngmòq chyáng mai hpang byùq râ nghut lhê. 8 Garai Gasâng chyáng huî ê keq, haú hkûn, Yhang, núngmòq chyáng huî lé lô râ nghut lhê. Yubàk kut é bang ê, núngmòq é lòq pé lé chî san chî sêng pyám keq. Myìt koq xân é bang ê, núngmòq é myìt nhiklhum lé lhoqchyoi lhoqyúng to keq. Yudaq htûng dông lòq lé chî san chî sêng pyám keq gâ é lichyúm gi, i‑myìt, gùngdu lé lhoqsan lhoqsêng pyâm é lé gâ lhê. 9 Núngmòq gi, myìt yón é, iyon yôn é eq ngaùbyi ngaùnhap é kut nyî keq. Núngmòq é wui hâ é hkyô lé gi, iyon dông, núngmòq é gabú é hkyô lé gi, yón kuq é dông htaî pyám keq. 10 Haû Yhûmsîng Garaî é hí má i‑myìt lhoqnyhum nyì keq, haú hkûn, Yhang gi, núngmòq lé lhoqtoq râ nghut lhê.
11 Gu-mang wuì ê, núngmòq yhangchang a ge é dông hkâtaî hpoî lhum kó. Yhûmsing é yhang gu yhang mang lé a ge é dông taî hpoî nyi é sû, haû a nghut jáng, jéyáng é sû gi, haû târâ lé a ge é dông taî hpoî nyì mù luî, jéyáng é sû nghut nyi ri. Haû târâ lé nàng jéyáng nyi é nghut le gi, târâ lé châng é sû a nghut é za, târâ jéyáng sû nàng dùt nyi ri. 12 Garai Gasang za târâ byî tô é eq târâ dara sû, wó hkyi yu é sû eq, wó lhoqhtên é sû nghut nyi lhê. Hau é yánmai, náng é yhûmkyo hpó lé jéyáng é sû nàng gi, ó yùq wa nghut lhê lhú?
Gyáng Dang A Taí Râ Hkyô
13 “Ngá-mòq, hkû-nyí nàpmá ra-nyí nyí, wà rawà wà shut ê mù, haú má razàn kô ê nyî luî, wuìloq kut mù a-myàt wó myang yù râ.” ga taî nyi é bang ê, gyô wú keq. 14 Nàpmá haî dùt lô râ lé lháng, núngmòq gi, a sé kó. Núngmòq é chyungxe gi, haî nghut nyi lhê lhú? Haû gi, razùp rahtâng za htoq shit luî dum byùq byùq ló mu é, nghânsoq eq rajung za nghut nyi ri. 15 Haû mù luî, núngmòq haû su ga taî nyì râ malaî gi, “Yhûmsîng Garai dóng é nghut le gi, ngá-mòq le ru wó dui nyì mù, shî le, mhô le, wó kut râ nghut lhê.” nghû luî, wó taí râ nghut lhê. 16 Ahkuî kúm gi, núngmòq é gyáng é dang dông taî nghutbûn nyi akô; haû su taî nghutbûn é hkyô bànshoq gi, agè ashop é jung chyat nghut nyi ri. 17 Haû mù luî, ge é mû sê kut to luî, a kut é sû gi, mara kut sû dùt bê nghut ri.