Mhé Wuî É Shô
3
Ngá é gu-mang wuì ê, byù myo myo sará hkâkut naû kó. Hkâsu mù gâ le, ngá-mòq sê é eq rajung za, sará pé gi, je riyhang htan é dông jéyáng dòqdân é hui zo râ nghut lhê. 2 Ngá-nhúng bànshoq bang gi, hkyô myo myo má myìt lingbàt é bang chyat nghut ri. Byù rayùq yùq dâng èq a lingbàt é nghut le gi, yhang gi, jùp byíng sû eq yhûmsing é gùng lé wó hkang é sû nghut ri.3 Ngá-nhúng myang lé nhutkyáng kyáng byi jáng, myang hau é gùngdu gón lé, ngá-nhúng ô nau é dông wó cháng nhang lhê. 4 Haû mai gótû, wuìsanghpo pé lé wú wú keq, haû í kô é sanghpo lé htan é laìdûn èq mùt é hui kôlhang, sanghpo hkâng sû gi, gyai tiq é sanghpo shap èq za, yhang ô nau é dông, haú pé lé wó hkang yu ri. 5 Haû eq rajung za, shô gi, tiq é gùngsho za nghut kôlhang, gyai yhang taî nghutbûn nyi ri; wú keq, tiq dik é myizik zo gi, yòso mhanpúng mó lé wó nyé gyó nhang rî-nhung. 6 Shô haû gi, myi eq wuí nyi ri. Ngá-nhûng é gùngsho má, shô haû gi, agè ashop é mingkan dùt lò mù, ngá-nhûng é gùngsho chyungxe lé achaq achyut dùt nhâng luî, gùngsho chyungxe lé nyhê tuq kat ri. Haû gi, ngaraî myî èq nyhê tuq kat é nghut bê.
7 Gaunyhaú ajung jung, nghoq ahú hú, myì má yê é jung eq wuì hkaû má nyi jung bànshoq gi, wó mhê yu é jung chyat nghut mù, byu pé gi, haú pé lé mhê yu nyi akô. 8 Nghut kôlhang, shô lé kúm gi, byù ó le a wó mhê yù kó nghut ri. Haû gi, a-pyî abàt, agè ashop, ùphkâng a wó é eq shi é jung dùq èq byíng tô é jung nghut nyi ri.
9 Ngá-nhúng gi, shô hau èq ngá-nhûng é Yhûmsîng eq Îwa Garai lé hkya-ôn nyi lhê; hau èq za, Garai Gasâng é gùnglhô dông hpan tô é waxâng zo wuî lé le nhîng pyâm nyi ri. 10 Nhut ralhum za mai, hkya-ôn é dang eq nhîng é dang htoq lo ri. Ngá é gu-mang wuì ê, haû su kut é gi, a gè. 11 Wuìbúm radong za mai, chuî nghâm é wuì eq hkô é wuì wó htoq râ lhú? 12 Ngá gu-mang wuì ê, hkohúm gâm mai tsanlun shi, tsibyiq nuî mai hkohúm-shi, wó zui râ lhú? Haû eq rajung za, xô ngam é wuì gi, chuî nghâm é wuì lé wó lhoqhtoq byi râ a nghut.
Ahtoq Mai Lo É Hpàqchyî
13 Núngmòq má, hpàqchyî byéng-yá bo é sû eq sê é dàt é sû, ó nghut lhê lhú? Haú yùq gi, yhang hpàqchyî bo é hkyô lé, hpàqchyî mai wó yu é, myìt lhoqnyhum é hkyo èq, yhûmsîng zui saî é ge é múzó dông tûn shit nyî sháng gàq. 14 Nghut kôlhang, núngmòq é myìt má ladu laî é mânon é i‑myìt eq lú lhum bàt zìk é i‑myìt bo é nghut le gi, hkâ nghutbun kó, haû tengmán hkyô lé le hkâ-mhaû pyám kó. 15 Haû sû é hpàqchyî byéng-yá kúm gi, mauhkûng htoq mai gyó lo é hpàqchyî byéng-yá a nghut; haû gi, myigùng htoq mâ é, gùngsho ô nau é eq nàt é hpàqchyî byéng-yá chyat nghut nyi ri. 16 Hkâsu mù gâ le, mânon é eq lú lhum bàt zìk é dùt nyi le gi, rùk rùk ràk ràk é hkyô eq agè ashop é mû ajung jung jùp hkûm nyi ri.
17 Mauhkûng htoq mâ é hpàqchyî byéng-yá kúm gi, sânghi awang má sansêng nyi ri; hau htâng má gi, nguì ngón hkyô lé ô nau é, myìt nûm é, jì-no gyô é, shogyo nhikmyin sê é eq ge é ashi zuî nyì mù luî, gamhkui a bò, ahpuq alik a dùt é eq kut mhaú a sê é hpàqchyî byéng-yá nghut nyi ri. 18 Hau htoq agó, nguì ngón é hkyô dàt sô xoq é bang gi, nguì ngón é shijí lé sân kat é bang nghut mù, ge é ashi wó yû kôrâ nghut lhê.