Yesuq Gi, Mosheq Htoq Gyaú É Hkyô
3
Haû mù luî, mauhkûng mai wùt yù huî é, chyoiyúng é gu-mang wuì ê, lagyo eq hkyangjong mó nghû ngá-nhúng yín yu é Yesuq é hkyô lé rago myìt wú keq. 2 Mosheq, Garai Gasâng é yhûm gón má lhumzuî é su, Yesuq le, Yhang lé masàt yù sû Garai Gasâng chyáng lhumzui sû dùt bê nghut ri.a 3 Yhûm kut sû gi, yhûm htoq je gyaú é xânghpoq nge wó é su, Mosheq htoq, Yesuq gi, je gyaú é xânghpoq nge wó hkyô wó gíng é lé myang ri. 4 Hkâsu mù gâ le, yhûm hkangmó gi, rayùq yùq èq saî é chyat nghut ri. Nghut kôlhang, Garai Gasang gi, jung hkangmó lé saî é sû nghut lhê. 5 Mosheq gi, Garai Gasâng é yhûm gón má duìnhâng zoshâng rayùq dông lhumzui mù, Garai Gasang taí râ nghut é lé sàksé hkám bê nghut ri. 6 Nghut kôlhang, Hkrisidùq gi, lhumzuî é zo rayùq dông Garai Gasâng é yhûm lé ùp ri. Ngá-nhúng kúm gi, ngá-nhúng lé wám é myìt bò nhang é hkyô eq ngá-nhúng gabú myìt mai nghutbûn nyi é myòqbyù hkyô lé myhik zing nyi é nghut jáng, Yhâng é yhûm nghut nyî bê.A Lùmjíng Bang Lé Sidìq Byî É Hkyô
7 Haû mù luî, haû Chyoiyúng Sô taî é eq rajung za,
gumlau toq é hkûn núngmòq é îchyí îwâ pé kut kô é su, núngmòq é i‑myìt lé hkâ lhoqhtan to kó.
9 Núngmòq é îchyí îwâ pé gi, myi xê zàn yhang Ngò kut é múzó lé myàng kôle, yòso haú má Ngo lé chyam lìk bekô nghut ri.
10 Haû nghut é yánmai, Ngò gi, i-pyàt haû lé nhikjum yo mù,
‘Yhángmòq é myìt nhiklhum gi, hkâ-nhám le hkyô nghoq byùq akô;
yhángmòq gi, ngá é hkyô pé lé a sé kômù nghut ri.’ nghû taî é nghut lhê.
11 Haû mù, ‘Ngá é bánno jowò má yhángmòq hkâ-nhám le wó wâng kôrâ a nghut.’ nghû, Ngò, nhikjum yô é eq dakâm dang taí bê nghut lhê.”b
gâ ri.
12 Gu-mang wuì ê, núngmòq mâ é ó yùq le, haû rû dui nyi é Garai Gasâng chyáng mai, lhing taû ló byùq sê é, yubàk mara byíng é, a lùmjíng é i‑myìt a bò sháng gàq, sidìq nyì keq. 13 Núngmòq gi, ó yùq le, yubàk marâ é mhaú zô é hkyo èq i‑myìt lhoqhtan pyâm é a hui kó sháng gàq, “hkû-nyí” nghû ru wó taî nyì nyì gi, nyí wuî, rayùq eq rayùq myìt wum byî lhûm nyì keq. 14 Ngá-nhúng gi, sânghi mai wó to bê myìt lùm hkyô lé, ló htáng shoq zuî gîng nyi é nghut jáng, Hkrisidùq eq chôm zùm yàp nyi é bang dùt bê nghut ri. 15 Haû gi,
“Hkû-nyí, núngmòq, Yhâng é danghtê lé wó gyô é nghut jáng, gumlau toq é hkûn, núngmòq é îchyí îwâ pé kut kô é su, núngmòq é i‑myìt lé hkâ lhoqhtan to kó.”c
ga taî é eq rajung za nghut ri.
16 Wó gyô yù mù, gumlau toq é bang gi, ô pé nghut akô lhú? Haú bang bànshoq gi, Egutuq ming mai Mosheq èq shuî htoq lo é bang nghut bum lhê, a nghut kó lhú? 17 Myi xê zàn yhang Garai Gasang lé nhikjum yó nhang é bang gi, ô pé nghut akô lhú? Haú bang gi, mara kut shut mù, yòso má shi lèq byùq é bang nghut bum lhê, a nghut kó lhú? 18 Jì-no a gyô bùm kô é nghut jáng, Yhâng é bánno jowò má yhángmòq hkâ-nhám le wó wâng kôrâ a nghut ga, Garai Gasâng èq dâkam é bang gi, ô pé nghut akô lhú? 19 Haû mù, yhángmòq a lùmjíng kô é yánmai, a wó wâng kô é lé, ngá-nhúng myang é nghut lhê.