Byî É Hkyô
8
Gu-mang wuì ê, ahkuî, ngá-mòq gi, Makedoni mau mâ é noqkuq hpûng pé lé Garai Gasang byî é jeju eq sêng é hkyô, núngmòq lé sé nhâng nau ri. 2 Yhángmòq gi, wuîhke jamjau hkyô myo myô èq chyam lìk é huî é nghut kôlhang, yhángmòq é a ung taí loshoq gabú é hkyô eq yhángmòq é gyai yhang myung é hkyô gi, agùn agó byí nau é myìt bò nhang ri. 3 Hkâsu mù gâ le, yhángmòq gi, yhángmòq wó dùt é myhó byi kô é htoq agó, yhángmòq é a-tsam lai shoq lháng byi kô é hkyô lé, ngò sàksé hkâm lhê. Yhángmòq gi, yhángmòq é myìt hkaû mai yhang haû su kut kô é nghut ri. 4 Yhángmòq gi, haû sân-yúng bang lé wó bo dójaú râ matú, ngá-mòq lé gyai yhang ahkáng dung kô é nghut ri. 5 Yhángmòq gi, ngá-mòq myìt ngam tô é htoq má lháng lai shoq, Garai Gasang ô nau é hkyô lé châng é dông, yhángmòq gùng lé hí haû Yhûmsîng lé àp byî pyám kômù, hau htâng shèq ngá-mòq lé àp kô é nghut ri. 6 Haû mù luî, Tituq yhang hí kut hi nyì bê nghut é yánmai, ngá-mòq gi, jeju haû lé núngmòq chyáng le shuî lhoqbyíng jùp byi râ matú, yhang lé wum byi bê nghut lhê. 7 Núngmòq gi, lùmjíng myìt má, dáng nyo é hkyô má le, sumsé hpàqchyî hkyô má le, myìt zùq hkyô bànshoq eq ngá-mòq lé núngmòq chyitdàp é hkyô má le, jung hkangmó má agùn agó dùt bekô eq rajung za, núngmòq gi, byí nau é jeju shî má le agùn agó dùt râ lé, bûn nyì keq.8 Ngò gi, núngmòq lé hkunmó hkyô é a nghut, nghut kôlhang, góbâng é myìt zùq é hkyô eq whuî wú é dông, núngmòq é chyitdàp myìt jèt é hkyô lé chyam wú naû luî shèq ru nghut lhê. 9 Hkâsu mù gâ le, núngmòq gi, ngá-nhûng é Yhûmsîng Yesuq Hkrisidùq é jeju lé sê akô nghut ri. Yhang gi, Yhâng é myùng hkyô dông mai núngmòq wó bang dùt kó sháng gàq ga, jung hkangmó wó sû nghut kôlhang, núngmòq é matú, myùng sû dùt bê nghut ri.
10 Shí hkyô eq sêng é má, núngmòq é matú ge dik é hkyô ngò hpàqchyî byi kôlé; Â‑nhik, núngmòq gi, sânghi, byî hî kô é za a nghut, haû su kut nau é myìt bo é bang le nghut akô. 11 Núngmòq wó dùt é eq rajung za, haû lé lhoqpân é dông núngmòq é gyai yhang kâm kut é myìt lé wó lhoqdìk ko sháng gàq, ahkuî, múzó haû lhoqpán keq. 12 Hkâsu mù gâ le, byí nau é myìt bo é nghut jáng, chyûnghuq haû gi, yhang a wó é má cháng luî a nghut é za, yhang wó é má cháng luî, hàp yù gíng é nghut lhê.
13 Núngmòq é matú gi, wòlai dùt, góbang gi, hkyâmsâ nyì râ lé, ngá-mòq ô nau é a nghut, rawuí za wó dùt kôrâ lé shèq ô nau é ru nghut lhê. 14 Núngmòq haî râ tô é lé, yhángmòq agùn agó wó é mâ é wó dum taû htuqbáng byi kó sháng gàq, ahkui lhê é ahkyíng má, yhángmòq haî râ tô é lé, núngmòq agùn agó wó é mâ é htuqbáng byi keq. Haû jáng shèq, wuí wuí za wó dùt kôrâ nghut lhê. 15 Haû gi, “Myo myo tsîng yu é sû gi, lûm myo shoq wó é a nghut, shau za tsîng yu é sû gi, lûm shau shoq wó é a nghut.”a ga kâ tô é eq rajung za nghut ri.
Tituq Lé Korinhtuq Wà Mó Shut Nhang Kat É Hkyô
16 Núngmòq é matú ngò myìt chiq byî é eq rajung zâ é myìt lé, Tituq é i‑myìt má kat byî é Garai Gasang lé, ngò jeju hkya-ôn lhê. 17 Hkâsu mù gâ le, Tituq gi, ngá-mòq dûng tôngbán é lé za lhom hàp yu é a nghut, gyai yhang myìt toq mù, yhânggùng yhang myìt hpyit yû luî, núngmòq chyáng lé lô gù za nghut ri. 18 Ngá-mòq gi, haû gabú danglù lé dójaú é má noqkuq hpûng pé bànshoq èq hkya-on huî é gu-mang hpó haû lé le, yhang eq rahá nhang kat lhê. 19 Hau htoq agó, ngá-mòq garúm râ myìt bo nyi é hkyô lé tûn shit mù, haû Yhûmsîng lé hkúngga râ matú ngá-mòq wú gôn nyì hkyô nghut é, alû lé ngá-mòq yu chung é hkûn, ngá-mòq é byìnzùm kut râ matú, noqkuq hpûng pê èq hkyin yu é sû le yhang nghut lhê. 20 Ngá-mòq gi, myìt lòm luî byî é chyûnghuq shî lé ngá-mòq wú gôn nyi é hkyô má, ó yùq èq le mara hô râ hkyô a htoq shoq sidìq nyi lhê. 21 Hkâsu mù gâ le, jô é hkyô kut râ matú ngá-mòq shi-kùt nyi é gi, haû Yhûmsing é myòq hí má za a nghut, byu pê é myòq hí má le nghut lhê.
22 Hau htoq agó, ngá-mòq gi, hkyô myo myo má shîrong é myìt bo é hkyô le a-num num ngá-mòq chyáng sàksé shit é sû, ngá-mòq é gótû gu-mang hpó lé le yhángnhik eq rahá nhang kat lhê. Yhang gi, ahkuî lháng, núngmòq lé gyai yhang myìt lum tô é yánmai, shirông myìt je riyhang bo nyi ri. 23 Tituq é hkyô ga jáng, yhang gi, ngá é zùm yàp luzúm eq ngò eq rahá núngmòq chyáng mû zui sû nghut ri. Ngá-nhûng é gu-mâng nhik é hkyô ga jáng, yhángnhik gi, noqkuq hpûng pê é gùnglik eq Hkrisidùq é xânghpoq nge wó hkyô nghut akô. 24 Haû mù luî, haû noqkuq hpûng pé wó myâng kó sháng gàq, núngmòq má ngá-mòq haî mù nghutbûn é hkyô eq núngmòq é chyitdàp myìt é sàksé lé, haú bang lé tûn shit keq.