7
Chyitdàp é luzúm wuì ê, ngá-nhúng gi, danghtum htûm tô é haú pé lé wó tô é bang nghut é yánmai, gùngdu eq sô lé agòt a‑û dùt nhang é jung hkangmó mai, yhûmsing gùng yhûmsîng lhoq sân-yúng yû luî, Garai Gasang lé gyùq hkúnggâ é myìt èq chyoiyúng hkyô má lhoq gúmjùp yu nyì sháng.Poluq É Gabú Hkyô
2 Núngmòq é i‑myìt ûnghkaû má ngá-mòq lé jowò byi keq. Ngá-mòq gi, ó yùq lé le a shut wú, ó yùq lé le a lhoqhtên wú, ó yùq lé le a mhaú zô wú é nghut lhê. 3 Ngò gi, núngmòq lé mara byi râ matú haû su taî é a nghut. Ngá-mòq gi, chyungxe duì kôle, shî kôle, núngmòq eq rahá wó dùt shoq, núngmòq gi, ngá-mòq é i‑myìt ûnghkaû má lúng nyi é nghut lhê nghû, hí hkûn ngò taî wú bê nghut lhê. 4 Ngò gi, núngmòq lé, hkyak yhang myìt lum to bê nghut lhê. Ngò gi, núngmòq é yánmai gyai yhang nghutbûn nyi lhê. Ngò gi, myìt wum byî é gyai yhang huî ri; jamjau hkyô pé myo myo ngá-mòq hui kôlhang, ngò, gyai yhang gabú nyi lhê.
5 Hkâsu mù gâ le, ngá-mòq gi, Makedoni mau má jé é hkûn, ngá-mòq é gùngdu gi, zim za a myang nyi é htoq agó, hkyô hkangmó má ngá-mòq wuîhke jamjau hui zô é nghut lhê. Shinggan má gi, mabyòq htoq, ahkaû má gi, gyùq kyum nyi é nghut lhê. 6 Nghut kôlhang, nhik ngê bang lé nhiktîng é Garai Gasang gi, Tituq lé jé lé nhang é dông mai, ngá-mòq lé nhiktíng byi bê nghut ri. 7 Yhang jé lé é dông mai za a nghut, yhang lé núngmòq nhiktíng byî é hkyô dông mai le nghut lhê. Ngá é gabú hkyô gi, gó-nám lhê htoq má je myo sháng gàq ga, yhang gi, núngmòq ngo lé myìt tuî nyi é hkyô, núngmòq gyai yhang shut bûn é hkyô, ngá é matú núngmòq gyai myìt chiq byî é hkyô pé lé, ngá-mòq lé taî kyo bê nghut ri.
8 Ngá é laikâ èq, núngmòq lé yón nhang é nghut kôle, ngò gi, nùngngham wó é a nghut. Sânghi lé, ngò nùngngham wó é nghut kôlhang, ngá é laiká gi, núngmòq lé rayòq zo za lhoqyón nhang é lé, ngò sê lhê. 9 Nghut kôlhang, ngò gi, ahkuî gabú lhê; haû gi, núngmòq lé yón hui nhang é yánmai a nghut é za, núngmòq é yón hkyo èq, núngmòq lé myìt lhîng nhang é yánmai ru nghut lhê. Núngmòq gi, Garai Gasang ô nau é dông yón huî é bang dùt bekô nghut mù, núngmòq lé, ngá-mòq èq hai a-kyû le a lhoqyôm byî é nghut lhê. 10 Hkâsu mù gâ le, Garai o é dông yón kuq huî é hkyô gi, nùngngham wó hkyô a bo é za, hkyi yù hkyô wó shoq, myìt lhîng nhang é nghut ri. Nghut kôlhang, mingkân é yón kuq hkyô gi, shi é hkyô lhoqhtoq é nghut ri. 11 Garai o é dông, núngmòq chyáng a-kyû lhoqhtoq byî é yón kuq hkyô lé wú wú keq! Haû gi, gyai yhang myìt zùq é hkyô, yhûmsing gùng mara a bo é lé tûn shit râ lé myìt ngui é hkyô, nhikmó-yô é hkyô, gyùq dan é hkyô, myìt ô nau nyi é hkyô, myìt chiq byî é hkyô, tengmán hkyô kut râ rì rì nghut é hkyô pé nghut lhê. Núngmòq gi, haú hkyô má mara a bo é lé hkyô hkat hkangmó má sàksé tûn shit bekô nghut ri. 12 Haû mù luî, ngò, núngmòq lé kâ kat é nghut kôlhang, kut shut su é yánmai le a nghut, kut shut é hui zo su é yánmai le a nghut é za, ngá-mòq lé núngmòq hkâ-í àp nhông byî é hkyô lé, Garai Gasâng hí má núngmòq gùng núngmòq wó myâng râ matú kâ kat é shèq ru nghut lhê. 13 Haú pé bànshoq dông mai, ngá-mòq gi, myìt wum byî é huî ri.
Ngá-mòq myìt wum byi huî é htoq agó, Tituq hkâ-í yhang gabú é lé myàng mù, ngá-mòq gi, je riyhang myìt gabú é nghut lhê. Haî mù yhang gabú é gâ le, núngmòq bànshoq bâng èq yhâng é myìt lé lhoq nguî ngón byi kô é yánmai nghut ri. 14 Ngò gi, núngmòq eq sêng é hkyô, yhang lé taî nghutbûn kyô é nghut kôle, núngmòq é yánmai hoq a hpû é nghut lhê. Núngmòq lé ngá-mòq taî é lhúnglháng gi, têng é eq rajung za, Tituq hí má, núngmòq é hkyô lé ngá-mòq taî nghutbûn é le têng lhê. 15 Núngmòq bànshoq bang jì-no gyo kômù, gyùq nán é myìt mai yhang lé lhom hàp yù kô é lé, yhang myìtbûn é hkûn, yhang núngmòq lé chyitdàp é myìt gi, je riyhang kô dik nyi ri. 16 Ngò gi, núngmòq lé bànshoq wó lum to bê lé sê é yánmai, gabú nyi lhê.