Hkrisidùq É Lagyô Pé
4
Haû mù luî, byu pé gi, ngá-mòq lé, Hkrisidùq é duìnhâng zoshâng wuì dông eq Garai Gasâng é zaú tô é hkyô pé lé taî pyô râ matú àp byî tô é hui bang dông sôn yù râ lhê. 2 Haú dông nghut jáng, àp byî tô é hui bang gi, yhûmsîng lhumzui hkyô lé sàksé shit râ dùt lhê. 3 Núngmòq èq nghut nghut, waxâng zô wui é târâ rûng mai nghut nghut, ngo lé jéyáng kô le, ngá é matú a-tiq azo za nghut lhê; gè gè ga jáng, ngá gûng ngò lháng a jéyáng é nghut lhê. 4 Haî mù gâ le, ngá gûng ngò mara a bò bûn é nghut kôlhang, haû gi, ngo lé wó lhoq sân-yúng byî é a nghut. Ngo lé jéyáng é sû gi, haû Yhûmsîng nghut lhê. 5 Haû mù, masàt tô é ahkyíng a jé shi-má haî lé le a jéyáng é za, haû Yhûmsîng jé lé shoq, láng nyî keq. Yhang gi, mauchut hkaû má haq tô é pé lé byu-myàng nhâng mù, byu pê é myìt nhiklhum má lúng é hkyô lé lhoqhtoq shit râ nghut lhê. Haú hkûn, yùq hkangmó gi, ó le ó wó gíng é hkya-on hkyô lé, Garai Gasâng chyáng mai wó yù râ nghut lhê.6 Gu-mang wuì ê, ngò gi, “Kâ tô é gû mai hkâlai.” gâ é sânghkyâng é lichyúm lé, ngá-mòq chyáng mai núngmòq wó mhoq yû sháng gàq nghû, núngmòq é a-kyu é matú, ngò eq Apolo má haú pé lé yù mù dangtú kut é nghut lhê. Haú hkûn, núngmòq gi, nghutbûn é dông, rayùq lé gi, wú ko, góyùq lé gi, wú shóm, a kut kôrâ nghut lhê. 7 Ó yùq wá, nang lé, góyùq eq shaî shoq kut lhê lhú? Nàng hàp yu é a nghut le gi, wó râ lhú? Nàng, hàp yu é nghut le gi, a hàp yu é dông haî mù nghutbûn nyi lhê lhú?
8 Núngmòq gi, râ é lhúnglháng gúmjùp bang nghut bekô nhung! Núngmòq gi, wó bang dùt gù nghut bekô nhung! Ngá-mòq a lom é za, núngmòq gi, hkóhkam pé dùt bekô nhung! Ngá-mòq le, núngmòq eq rahá hkóhkam pé wó dùt sháng gàq, núngmòq gi, gè gè yhang hkóhkam pé dùt to bekô râ lé, ngò hkâ-í yhang ô nau nyi lhê ô! 9 Nghut kôlhang, sat râ matú dòqdan huî é shúm byu pé lé su, Garai Gasang gi, lagyô pé nghut é ngá-mòq lé de de kut htoq shit bê nghû, ngò wó myìt ri. Ngá-mòq gi, nyì mî-nyî, jòq mîjòq, maumang lagyô pé eq waxâng zô wui é hí má, wú kûn jung dông dùt nhang é huî nyì gù bê nghut lhê. 10 Ngá-mòq gi, Hkrisidùq é yánmai ngòk é bang dông sôn yu é hui kôlhang, núngmòq kúm gi, Hkrisidùq má hpàqchyî gyaí bo é bang dông dùt bekô nhung! Ngá-mòq gi, wum nyhôm é bang dông sôn yu é hui kôlhang, núngmòq kúm gi, wúm bo é bang dông dùt bekô nhung! Núngmòq gi, hkúnggâ é huî akô; ngá-mòq kúm gi, hkúnggâ é a hui nhung! 11 Shí hkyíng shí u jé shoq, ngá-mòq gi, zò-mut wuìshit huî é, mèbu ajèq a-myhâ dùt huî é, nhuq bàt huî é, yhûmsing é nyì jowò a wó é bang nghut nyi lhê. 12 Ngá-mòq gi, yhûmsing lòq èq yhang mû zui wum kat nyi lhê. Ngá-mòq gi, nhîng pyâm é hui jáng, shimân byi, zing-rî é hui jáng, jân pyám kut lhê. 13 Ngá-mòq gi, lùmù gànsang é hui jáng, dang ngón dang nguî tû nyo lhê. Ngá-mòq gi, ahkuî jé shoq, myìdàm htoq mâ é hpoqkyuq hpoqpyâng eq mingkân é a-pyâng pé dông sôn yu é huî nyi lhê.
14 Ngò gi, núngmòq lé hoq lhoqhpu râ matú haú pé lé kâ é a nghut, ngá é chyitdàp zo wuî lé dông lhoqpûn kying râ matú ru nghut lhê. 15 Núngmòq gi, Hkrisidùq má mhoqshit bang ra mun wó kô é nghut kôlhang, îwâ pé myo shoq wó kô é a nghut; hkâsu mù gâ lé, ngò gi, haû gabú danglù dông mai, Hkrisidùq Yesuq má núngmòq é îwa dùt é nghut lhê. 16 Haû mù luî, ngò kut é su cháng keq nghû, ngò, núngmòq lé lung kat lhê. 17 Hau é yánmai, ngò gi, haû Yhûmsîng má lhumzui sû nghut é, ngò chyitdàp é ngá zo dông nghut sû Timohti lé, núngmòq chyáng nhang kat é nghut lhê. Yhang gi, Hkrisidùq Yesuq mâ é ngá é chyungxe duì hkyô lé, jowò hkangmó mâ é noqkuq hpúng hkangmó lé ngò mhoq byî é eq rajung za, núngmòq lé lhoqpun byi râ nghut lhê.
18 Núngmòq mâ é ra-am gi, núngmòq chyáng ngò a dum jé lé râ su ngam pyám kômù, nghutbûn byùq bekô nghut ri. 19 Nghut kôlhang, haû Yhûmsîng gyô é nghut jáng, ngò gi, núngmòq chyáng hân za jé lé râ nghut lhê; haú hkûn, ngò gi, nghutbûn é byù haú bang haî taî é hkyô lé za a nghut, yhángmòq hai a-tsam wó é hkyô lé le gôn htoq râ nghut lhê. 20 Hkâsu mù gâ le, Garai Gasâng é mîngdán gi, taî é dang má bo é a nghut, a-tsam má shèq ru nghut lhê. 21 Núngmòq hká dông ô nau akô lhú? Ngò gi, núngmòq chyáng, nuìchûm hkat èq, a nghut jáng, chyitdàp é eq nú nhâm é myìt mai lé lô ra râ lhú?