Dui É Hkungga Pé Dùt Râ Hkyô
12
Haû mù luî, gu-mang wuì ê, núngmòq é gùngdu pé lé, Garai Gasang myìt nguì ô nau é eq chyoiyúng é, dui é hkungga dông nhông byi keq nghû, Garai Gasâng é shogyo nhikmyin hkyô mai, ngò, núngmòq lé wum byî kat lhê. Haû gi, so é hkyô dông núngmòq noqkuq dójaú é hkyô nghut lhê. 2 Mingkan shí lhûm é sâmlai dông a cháng lô é za, myìt sik wó yû râ dông núngmòq é a-kyang lé htaî pyám byi nhâng keq. Haú hkûn shèq, Garai Gasâng é ge é, myìt nguì é eq gúmjùp é ô naù hkyô lé, núngmòq wó chyâm, wó sê gàm hkoq yû kôrâ nghut lhê.3 Hkâsu mù gâ le, ngo lé byî tô é jeju yánmai, núngmòq yùq hkangmó lé ngò taí kôlé: núngmòq gi, yhûmsing gùng lé lai shoq a nghutbûn é za, ó le ó lé, Garai Gasâng èq lùmjíng myìt tsing gàm byî to bê eq rajung za, myìt yù gíng é í za myìt yù keq. 4 Ngá-nhúng yùq hkangmó é gùngdu ralhum má gi, gùngdu showui showang pé myo myo bo é nghut luî, gùngdu showui showang haú pé bànshoq gi, chung jaì jang a pung é nghut lhê. 5 Haû eq rajung za, myo myo nghut é ngá-nhúng le, Hkrisidùq má gùngdu ralhum za dùt luî, yùq hkangmó gi, rayùq eq rayùq gùngsho sêng lhûm é bang chyat nghut lhê. 6 Ngá-nhúng lé byî tô é jeju yánmai, ngá-nhúng wó é chyûnghuq gi, gótû tû nghut lhê. Byù rayùq é chyûnghuq gi, myìqhtoi htoî é nghut jáng, yhâng é lùmjíng hkyô eq rajung za htoi sháng gàq; 7 dójaú é nghut jáng, dójaú sháng gàq; mhoq kyô é nghut jáng, mhoq kyo sháng gàq; 8 myìt wum byî é nghut jáng, myìt wum byi sháng gàq; ra châ é bang lé garúm byî é nghut jáng, a ha bûn é za byi sháng gàq; shuî u é nghut jáng, lùmlùq tung shuî u sháng gàq; shogyo nhikmyin hkyô shit é nghut jáng, gabú myìt èq kut sháng gàq.
Chyitdàp Myìt
9 Chyitdàp myìt má gègùn labyoq a ge bò. Agè ashop dùt é lé, nhik nòq pyám keq; ge é lé, myìt tuî nyì keq. 10 Rayùq eq rayùq, gu-mang chyitdàp myìt mai lhumzuî lhum keq. Rayùq eq rayùq, yhûmsing gùng htoq je hpautap lhum keq. 11 Myìt zùq hkyô má, hkâ-nhám le wum a lhoqshôm é za, núngmòq é so é hkyô má myìt toq nyî mù, haû Yhûmsîng lé dójaú nyî keq. 12 Myìt myòqbyù hkyô má gabú keq; wuîhke hkyô má hkam jan keq; kyûdung hkyô má lhumzui keq. 13 Ra châ tô é Garai Gasâng é byu pé lé gàm byi keq. Bíng hkûlum é lé rago kut keq.
14 Núngmòq lé zing-rî é bang lé shimân byi keq; shimân byi keq, hkâ-nhing kó. 15 Gabú é bang eq rahá bo gabú keq; yón é bang eq rahá bo yón keq. 16 Rayùq eq rayùq byìn hpyé góhut huî nyì keq. A nghutbûn é za, nyì yàp hkyô nyhûm bang eq zùm yàp keq. Hpàqchyî bo é sû su hkâ-myìt ngàm kó.
17 Ó yùq lé le, agè ashop é yánmai, agè ashop é dông lató hkâhpuq kó. Yùq hkangmó é myòq hí má ge é lé kut râ rago myìt keq. 18 Wó dùt é nghut jáng, núngmòq wó dùt é í, yùq hkangmó eq nguì ngón shoq nyì keq. 19 Ngá é buìnùm wuì ê, lató a hpuq é za, Garai Gasâng é nhikmó-yo hkyô lé shèq láng nyî keq. Hkâsu mù gâ le, “Ngò shèq lató hpuq râ sû nghut lhê; ngò lató hpuq râ.”a ga, haû Yhûmsîng taî ri ga kâ tô ri. 20 Haû mù,
“Núngmòq lé gyè kut sû zò-mut é nghut le gi, byi tso keq; yhang wuìshit é nghut le gi, rajung jung byi huq keq.
Haú dông kut jáng, nàng, yhâng é ulhum htoq má gyúng é myigye bum to byî é nghut lhê.”b