Isira-elaq Byu Pé Lé A He-ngìk Pyám
11
Haû mù luî, ngò myi kó lé, Garai Gasang gi, Yhâng é byu pé lé he-ngìk pyám bê nghut lhê lhú? Ra-tsuí lháng a nghut! Ngò yhang le, Isira-elaq byù myû nghut luî, Abraham é awùt ashín eq Ben-yamin hú mâ é sû nghut lhê. 2 Garai Gasang gi, Yhang te sê to gû nghut é, Yhâng é byu pé lé a he-ngìk pyâm é nghut lhê. Eliya eq sêng é hkyô Chyúmdang má bo tô é lé, núngmòq a sé kó lhú? Garai Gasâng é hí má, yhang, Isira-elaq byu pé lé mara hun é gi, 3 “Yhûmsîng ê, yhángmòq gi, Náng é myìqhtoî pé lé sat pyám kô é eq Náng é hkungga gyàp pé lé tu lhêng pyâm akô nghut ri; ngò rayùq za myìt gyó tô é nghut luî, ngo lé sat râ matú le yhángmòq ho nyi akô nghut ri.”a gâ ri. 4 Garai Gasang gi, yhang lé, hkâsu ga tû taî é nghut lhê lhú? Haû gi, “Balaq hpara é hí má hkyîhput a htuq shî é byù nyhit hkyîng lé, Ngá é matú myhit tô lhê.”b gâ é nghut lhê. 5 Haû eq rajung za, ahkuî gi, jeju yánmai hkyin yù huî é bang za myìt gyó tô é nghut lhê. 6 Jeju yánmai nghut é nghut le gi, múzó é yánmai a nghut lo; múzó dông ru nghut le gi, jeju gi, jeju a nghut lo.7 Haû nghut jáng, hkâsu lhú? Isira-elaq byu pé gyai ho shi-kùt kôlhang, a wó kô é lé, hkyin htoq yû huî é bang kúm gi, wó bekô nghut ri. Góbang gi, myìt lhoqhtân byî é huî akô nghut ri; 8 haû gi,
“Garai Gasang gi, hkû-nyí jé shoq, yhángmòq lé nhikshi jìt é sô lé le, a wó myang é myòqjí lé le, a wó gyô é nohkyap lé le, byî to bê nghut ri.”c
“Yhángmòq é zangbó gi, yhángmòq é matú, dumzo eq lhaí, myìt lèqbàt jowò eq lató hpuq hkyô dùt sháng gàq;
10 Yhángmòq myòq a wó myâng shoq, myòqjí lhoqchit pyám byî é hui sháng gàq;
yhángmòq é nùnghkûng gi, ayang wòlai wun goí nhang é hui sháng gàq.”d
gâ ri.
Tûngbaù Pé Lé Hkyi Yu É Hkyô
11 Ngò dum myi kó lé: Isira-elaq byu pé gi, a wó dum gè râ í lèqbàt byùq bekô lhú? Ra-tsuí lháng a nghut! Yhángmòq é târâ lu lai hkyo é yánmai, yhángmòq lé manôn nhâng râ matú, hkyi yù hkyô gi, tûngbaù pê chyáng jé byùq é nghut lhê. 12 Nghut kôlhang, yhángmòq é târâ lu lai hkyô gi, mingkân é matú wó sùt hkyô eq, yhángmòq sûm pyâm é hkyô gi, tûngbaù pê é matú wó sùt hkyô dùt é nghut jáng, yhángmòq é byíng jùp hkyô gi, je riyhang kô é wó sùt hkyô dùt râ nghut rî-nhung!
13 Núngmòq tûngbaù pé lé ngò taî nyi lhê: ngò gi, tûngbaù pê é lagyo nghut nyi é u má, ngá é hpúngmû lé hpautap nyi lhê. 14 Haû gi, ngá é a-myû pé lé manôn myìt wó bô nhâng mù, yhángmòq ra-am lé wó hkyi yù râ lé myìt myòqbyu é hkyô nghut lhê. 15 Hkâsu mù gâ le, yhángmòq lé he-ngìk pyâm é hkyô gi, mingkân é matú Garai eq buìnùm xoq hkyô dùt bê nghut jáng, yhángmòq lé dum hàp yu é hkyô gi, shi é mai dui toq é dông dùt bê a nghut lhí? 16 Hau htoq agó, sânghî ashi dông nhông byî é mún ra-am gi, chyoiyúng é nghut jáng, mùk htung gón gi, chyoiyúng é nghut lhê; haû a-myìt gi, chyoiyúng é nghut jáng, akoq pé le chyoiyúng é nghut lhê.
17 Haû tsanlun akoq pée ra-am gi, lhoqhkyuî pyâm é hui luî, yòsô tsanlun a‑nyùqf nghut sû nàng gi, haú pé má xoq é hui mù, haû tsanlun a-myìt é xû lé bo shuq lom é nghut jáng, 18 akoq haú pé lé hkâwú tiq pyám kó. Núngmòq haû su kut é nghut jáng, núngmòq gi, haû a-myìt lé htuq é a nghut é za, a-myìt haû shèq núngmòq lé htuq é hkyô lé, núngmòq myìt sé keq. 19 Núngmòq kúm gi, “Ngò, haú má xoq é hui râ matú shèq, akoq haú pé gi, lhoqhkyuî pyâm é huî é ru nghut lhê.” ga taí râ nghut lhê. 20 Haû su gi, nghut lhê. Nghut kôlhang, yhángmòq gi, a lùmjíng é yánmai, lhoqhkyuî pyâm é hui kômù, núngmòq kúm gi, lùmjíng é yánmai, wó gingtîng nyi é nghut lhê. Hkâ nghutbûn nyì, gyùq kyum nyì keq. 21 Hkâsu mù gâ le, Garai Gasang gi, akoq a-kyîng pé lé a ha bûn é nghut le gi, núngmòq lé le ha bun râ a nghut.
22 Haû mù luî, Garai Gasâng é shogyo nhikmyin hkyô eq htân htân kut pyâm é hkyô lé, myìt wú keq: lèqbàt é bang lé htân htân kut pyám kôlhang, núngmòq gi, Yhâng é shogyo nhikmyin hkyô má xoq nyi nyi é myháng, núngmòq lé gi, shogyo nhikmyîn nyì râ nghut lhê. Haû a nghut jáng, núngmòq le, zân hpyit pyâm é hui râ nghut lhê. 23 Yhángmòq gi, a lùmjíng hkyô lé tô pyám kô é nghut jáng, dum xoq yu é hui kôrâ nghut lhê; hkâsu mù gâ le, Garai Gasang gi, yhángmòq lé dum wó xoq yu é Sû nghut lhê. 24 Haî mù gâ le, yòsô tsanlun gàm akoq nghut gù núngmòq lé hpyit yû mù, htûng a nghut é dông, hô é tsanlun agàm má xoq é nghut le gi, haû akoq a-kyîng pé nghut é yhángmòq gi, ó le ô é tsanlun-ngùt a-kyîng má xoq yu é lé je riyhang hui râ nghut lhê ô!
Isira-elaq Byu Pé Hkyi Yu É Hui Râ Hkyô
25 Haû mù, gu-mang wuì ê, núngmòq a nghutbun kó sháng gàq nghû, zaú tô é hkyô shî lé, núngmòq a sé dùt râ lé, ngò a ô nau é nghut lhê: haû gi, tûngbaù pé wang lo é laké byíng é hkûn jé shoq, Isira-elaq byu pé ra-am gi, myìt lhoqhtan é huî é hkyô nghut lhê. 26 Hau htâng shèq, Isira-elaq a-myû bànshoq bang hkyi yu é hui râ nghut lhê. Haû gi,
“Hkyi yù Sû gi, Zi-un bùm mai htoq lô râ nghut lhê;
Yhang gi, Garai lé nùnghtáng tô pyâm é hkyô lé, Yakup é awùt ashín mai huî sêng pyám byi râ nghut lhê.
27 Ngò, yhángmòq é yubàk mara lé huî sêng pyám byi jáng,
haû gi, yhángmòq lé Ngò byî tô é Ngá é dangshikaq nghut lhê.”g
ga kâ tô é eq rajung za nghut ri.
28 Haû gabú danglù eq séng luî ga jang, yhángmòq gi, núngmòq é matú gyè nghut akô; nghut kôlhang, hkyin htoq yû hkyô eq séng luî ga jang, yhángmòq gi, myìng hû é îchyí îwâ pê é yánmai, chyitdàp é huî akô nghut ri; 29 hkâsu mù gâ le, Garai Gasâng é chyûnghuq pé eq Yhang ji yu é hkyô lé gi, wó htaî lhik pyâm é a nghut. 30 Núngmòq gi, Garai Gasâng é jì-no a gyô é bang radàm dùt wú kô é nghut kôlhang, yhángmòq jì-no a gyô é yánmai, ahkuî kúm, shogyo nhikmyin hkyô wó hkam yù bekô nghut é su, 31 ahkuî, yhángmòq gi, núngmòq wó hkam yu é Garai Gasâng é shogyo nhikmyin hkyo é yánmai, shogyo nhikmyin hkyô lé wó hkam yù kó sháng gàq ga, yhángmòq le, ahkuî, jì-no a gyo bang dùt bekô nghut ri. 32 Hkâsu mù gâ le, Garai Gasang gi, byù lhúnglhâng bang lé, shogyo nhikmyin hkyô wó tûn shit shoq ga, lhúnglhâng bang lé, jì-no a gyo hkyo é shúm dùt nhang to bê nghut ri.
Hkya-on Kúngtôn Dang
33 Ô! Garai Gasâng é agùn agó é sut nghut é, hpàqchyî byéng-yá eq sê hkyang é u-nuq gi, hkâ-í yhang nìk rî-nhung!
Yhâng é târâ jéyáng hkyô gi, ung sê jung a nghut nhung!
Yhang kut é hkyô pé gi, hkâ-í yhang ho htoq wuî jung nghut rî-nhung!
34 “Haû Yhûmsing é myìt lé, ó yùq wá ung sê lhê lhú? Yhâng é hpàqchyî byi sû gi, ó yùq wá dùt wú é lhú?”h
gâ ri.
35 “Garai Gasâng èq jeju dum tau byi râ dùt shoq, ó yùq wá, Garai Gasang lé byî wú é lhú?”i
gâ ri.
36 Hkâsu mù gâ le, jòq mîjòq gi, Yhâng chyáng mai nghut mù, Yhang dông mai nghut luî,
Yhâng é matú chyat nghut ri. Haû hpungwup shingkang gi,
Yhâng chyáng ahtum abyùq ru joq nyî sháng gàq ô! Amen.