Romaq 10

Gu-mang wuì ê, ngò gi, haû Isira-elaq byu pé hkyi yu é hui kó sháng gàq nghû, gyai yhang myìt shirông luî, Garai Gasâng chyáng yhángmòq é matú kyûdung byî nyi lhê. 2 Hkâsu mù gâ le, yhángmòq gi, Garai Gasâng é hkyô lé gyai yhang myìt zùq é bang nghut é lé, ngò sàksé hkâm lhê; nghut kôlhang, yhángmòq myìt zùq é hkyô gi, hpàqchyî bo é dông a nghut kó. 3 Yhángmòq gi, Garai Gasâng chyáng mai jé lé é díngmán hkyô lé a sé kômù, yhûmsîng díngmán bûn é hkyô lé za ho shi-kùt nyì kô é yánmai, Garai Gasâng é díngmán hkyô hkaû má a nyì kó nghut ri. 4 Hkrisidùq gi, lùmjíng bang yùq hkangmó, díngmán é má wó jé kó sháng gàq ga, jep é târâ ló htum jang dùt bê nghut ri.

5 Mosheq gi, “Haú pé dông châng é sû gi, haú pé mai chyungxe duì râ nghut lhê.” ga, jep é târâ eq sêng é díngmán hkyô lé kâ sân kyô tô é nghut lhê. 6 Nghut kôlhang, lùmjíng hkyô eq sêng é díngmán hkyô gi, “Náng é myìt nhiklhum má, ‘Mauhkûng má, ó yùq dòq ló râ lhú?’ (Haû gi, Hkrisidùq lé shuî gyó lò râ gá nau é nghut lhê), 7 haû a nghut jáng, ‘Nìk é jang má, ó yùq gyó wâng râ lhú?’ (Haû gi, Hkrisidùq lé, shi é mai dui toq nhâng râ gá nau é nghut lhê.) nghû hkâtaí kó.” gâ tô ri. 8 Haû jáng, hkâsu gâ tô ri lhú? “Haû mungdang gi, nàng eq chyâng nyi ri; náng é nhut má le, náng é myìt nhiklhum má lé nghut nyi ri.” gâ tô ri. Haû gi, ngá-mòq hko taî é lùmjíng hkyô eq sêng é mungdang nghut lhê. 9 Haû mù, “Yesuq gi, Yhûmsîng nghut ri.” nghû náng é nhut èq yín yû mù, Garai Gasang gi, Yhang lé, shi é mai dui toq nhâng bê nghut lhê nghû, náng é myìt nhiklhum má lùmjíng é nghut jáng, nàng gi, hkyi yu é hui râ nghut lhê. 10 Hkâsu mù gâ le, byù gi, myìt nhiklhum má lùmjíng jáng, mara hkyut san byî é hui mù, nhut mai yín yû jáng, hkyi yù huî é nghut lhê. 11 Haû Chyúmdang taî é gi, “Yhang lé lùmhkau é sû ó yùq le, hkâ-nhám lháng hoq hpû é hui râ a nghut.” gâ ri. 12 Hkâsu mù gâ le, Yudaq byù eq tûngbaù pê é gyoro má gam hkoq é hkyô haî le a jòq é za, haû Yhûmsîng gi, bànshoq bâng é Yhûmsîng nghut lhê mù, Yhang lé wùt dung bang lhúnglháng lé, agùn agó shimân byî ri. 13 Hkâsu mù gâ le, “Haû Yhûmsing é myìng lé lâng é bang yùq hkangmó gi, hkyi yu é hui râ nghut lhê.” gâ tô ri.

14 Haû nghut lé gi, yhángmòq a lùmjíng é sû lé nhîng, hkâsu wó wùt dung kôrâ lhú? Yhángmòq a wó gyô wú é sû lé nhîng, hkâsu wó lùmjíng kôrâ lhú? Hko kyô é sû a nyi le nhîng, hkâsu wó gyo kôrâ lhú? 15 Nhang kat é a huî le gi, yhángmòq hkâsu kut wó hko kyo kôrâ lhú? Haû eq rajung za, “Gabú danglù pé hko kyo bâng é hkyî-kám pé gi, hkâ-í yhang yúng ri myhî-nhung!” ga kâ tô ri.

16 Nghut kôlhang, Isira-elaq byu pé bànshoq bang gi, gabú danglù lé hàp yù kô é a nghut. Hkâsu mù gâ le, Esai-a gi, “Yhûmsîng ê, ngá-mòq é danglù lé ó yùq wá lùmjíng é lhú?” ga taî ri. 17 Haû nghut mù luî, lùmjíng myìt gi, danglù lé wó gyô é mai lò mù, danglù gyô yu é gi, Hkrisidùq é mungdang mai lo é nghut lhê. 18 Nghut kôlhang, ngò myi kó lé: yhángmòq gi, a wó gyô wú kô é nghut lhê lhú? Yhángmòq gi, wó gyo gù za nghut lhê, haû eq rajung za,

“Yhángmòq é htê gi, myìdàm gón má jam ló bê nghut ri;

yhángmòq é mungdang pé gi, mingkan htúngchyûn hkangmó má jé bê nghut ri.”

gâ tô ri. 19 Ngò dum myi kó lé: Isira-elaq byu pé gi, a sê gyo kô é nghut lhê lhú? Mosheq sânghi má taî é gi,

“Byù rahú lháng a nghut bâng èq, Ngò, núngmòq lé manôn nhâng râ;

sê gyô u-nuq a bo é a-myu èq, Ngò, núngmòq lé wú nhik-yo nhâng râ nghut lhê.”

gâ ri. 20 Hau htoq agó, Esai-a a gyùq a wàm taî é gi,

“Ngo lé a ho é bang gi, Ngo lé myang hô bekô nghut ri;

Ngá hkyô lé a myî é bang lé, Ngò htoq shit bê nghut lhê.”

gâ ri. 21 Nghut kôlhang, Isira-elaq byu pé eq séng luî, Yhang taî é gi,

“Ngò gi, jì-no a gyô é eq ngegáng htu é byù myû lé, nyí wuî Ngá lòq lham mù ji nyi lhê.”

gâ ri.