Ahkáng Ayá Wó Bâng Ô Má Nyì Râ É Hkyô
13
Yùq hkangmó gi, ùp é ahkáng ayá wó bâng é a‑ô má nyì ra râ nghut lhê; hkâsu mù gâ le, Garai Gasâng chyáng mai za a nghut le gi, ùp é ahkáng ayá jòq é a nghut. Jòq tô é ahkáng ayá pé gi, Garai Gasâng èq byî tô é chyat nghut lhê. 2 Hau é yánmai, ùp é ahkáng ayá lé gumlau toq é sû gi, Garai Gasang byî tô é ùp é ahkáng ayá lé gumlau toq é sû nghut ri; haû su kut é bang gi, târâ jéyáng é hui zo râ hkyô lé ho yù nyi é bang nghut akô. 3 Hkâsu mù gâ le, ùphkang é bang gi, ge é hkyô kut bâng é matú gyùq nán hpo a dùt é za, shut shaî hkyô kut bâng é matú shèq dùt é ru nghut lhê. Ùp é ahkáng wó sû lé gyùq é mai lùt nau lhê a nghut lhí? Haû jáng, ge é hkyô kut àq, haú hkûn, yhang, nang lé hkya-on râ nghut lhê. 4 Hkâsu mù gâ le, yhang gi, náng é matú ge é a-kyû kut byi râ nghut é, Garai Gasâng é duìnhâng zoshâng nghut lhê. Nghut kôlhang, nàng, shut shaî hkyô kut é nghut le gi, gyùq nán nyî àq; haî mù gâ le, yhang gi, shâm lé ajè wun tô é a nghut. Yhang gi, Garai Gasâng é duìnhâng zoshâng nghut mù, shut shaî hkyô kut sû lé dam byi râ matú nhikmó-yo Su é gùnglik nghut lhê. 5 Haû mù luî, dam byi râ lé chiq é yánmai za a nghut, yhûmsîng nhik bô râ é yánmai le, haû ùp é ahkáng ayá wó bâng é a‑ô má nyì râ dùt lhê.6 Núngmòq jahkôn kat râ é gi, hau é yánmai le nghut lhê; hkâsu mù gâ le, haû ùp é ahkáng ayá wó bang gi, Garai Gasâng é duìnhâng zoshâng wuì nghut lhê mù, ùphkang é mû lé, ahkyíng byíng shoq wùn wàq nyi akô nghut ri. 7 Yùq hkangmó lé byi âng é eq rajung za byi keq: jahkôn kat byi ang sû lé gi, jahkôn kat byi keq; hkán kat byi ang sû lé gi, hkán kat byi keq; gyùq kyûm ang sû lé gi, gyùq kyûm keq; hkúngga ang sû lé gi, hkúngga keq.
Rayùq Eq Rayùq Chyitdàp Lhum Râ Hkyô
8 Rayùq eq rayùq chyitdàp lhûm é chyîn mai lai luî, hai chyîn le hkâdàp lhum kó; hkâsu mù gâ le, góyùq lé chyitdàp é sû gi, haû jep é târâ lé lhoqdìk bê sû nghut ri. 9 “Su-myi sulàng lú hkyô hkâkut.”, “Byù hkâsat.”, “Hkâhkau.”, “Hkâ myòqnòq.”a gâ tô é hkunmó pé eq gótû hkunmó haî nghut nghut, “Náng gûng lé nàng chyitdàp é su, náng é chyáng nâm mâ é bang lé le chyitdàp àq.”b gâ é târâ má lo jùp to bê nghut lhê. 10 Chyitdàp myìt gi, chyáng nâm mâ é byù lé a ge é haî le a kut é nghut lhê. Haû mù luî, chyitdàp myìt gi, haû jep é târâ lé lhoqdìk é hkyô nghut ri.
11 Haû mù, ahkui lhê é ahkyíng yàm-yòq lé sê gyo luî, haú hkyô lé kut keq. Núngmòq yhupmui é mai bûn gying râ ahkyíng jé bê; haî mù gâ le, ngá-nhûng é hkyi yù hkyô gi, lùmjíng hi é hkun lhê htoq má ahkuî je chyáng bê nghut ri. 12 Haû myín ahkyíng gi, laî byùq ló râ za nghut bê; nyí ahkyíng gi, jé lô berâ nghut lhê. Haû mù luî, mauchut é múzó lé tô pyám mù, maubó é gyèhking lé wùt to sháng. 13 Ye lhaî é eq shuq wùt é, ashop é dông gùngsho zùm yàp é eq shut é dông nyì zô lhúm nau é myìt bo é, mabyòq jishûm htoq é eq mânon é pé a kut é za, nyí-káng lhê su, ge é a-kyang dông nyì yàp sháng. 14 Hau htoq agó, Yhûmsîng Yesuq Hkrisidùq lé, mèbu su wùt to keq; yubàk gùngsho ô nau é dông lhoqdìk râ matú hkâ-myìt kó.