11
Ngò gi, Medi byù Dari, hkóhkâm hkô má zung é sânghî zàn má, Mihka-elaq lé wum-o lhoqkíng byi mù, yhang lé mâgum yû râ matú toq kut é nghut lhê.)
Maupyî Mautsûng Mâ É Hkóhkâm Pé
2 Ahkuî, ngò, nang lé taî kyo râ gi, tengmán é hkyô nghut lhê; Perisi ming má hkóhkâm sum yuq htoq lô shirâ nghut lhê; hau htâng, myi yuq nghû râ yùq dum htoq lô luî, yhang gi, góbang bànshoq htoq má sùtzè je wó râ nghut lhê. Yhang gi, sùtzè mai ùp é a-tsam wó é hkûn, Grik mîngdán lé gyè zan râ matú byù bànshoq bang lé myìt nhaû toq byî râ nghut lhê. 3 Haú hkûn, ùp é ahko ahkáng mó mai ùp luî, kut nau é su kut é hkóhkâm mó rayùq nyi htoq lô râ nghut lhê. 4 Nghut kôlhang, haú yùq wum htan kûng tô é u, yhâng é mîngdán gi, lhoqhpyoq pyâm é hui mù, mauhkûng ô má myî hkyam gam hkoq byùq râ nghut lhê. Ùp é bang gi, yhâng é awùt ashín pé a nghut, ùp é ahko ahkáng lé le, yhang su wó kôrâ a nghut; yhâng é mîngdán gi, nùt htoq pyâm é hui mù, góbang lé byî pyám râ nghut lhê.
5 Maupyî hkyam mâ é hkóhkâm gi, wum htan lò râ nghut lhê; nghut kôlhang, yhâng é gyèzaû pé mâ é rayùq gi, yhâng htoq wum htan lò râ nghut mù, ahko ahkáng mó èq yhûmsing é mîngdán haú lé ùp râ nghut lhê. 6 Zànwut tsómra myáng jáng, yhángnhika gi, xoq tuî lhum kôrâ nghut mù, maupyî mâ é hkóhkam é byìzo gi, xoq tuî lhûm yù râ matú, mautsûng mâ é hkóhkâm chyáng ê jé râ nghut lhê; nghut kôlhang, yhang gi, wum-o a-tsam wó bo to râ a nghut mù, mautsûng hkóhkâm eq yhâng é wum-o a-tsam le wó gîng to râ a nghut. Haú buìnyì pé má, hkóhkam byìzo le, yhang lé châng dé é byù le, yhâng wa le, yhang lé htuqbáng é byu pé le, sat pyâm é hui kôrâ nghut lhê.
7 Nghut kôlhang, byìzo hau é awùt mâ é rayùq gi, yhâng é jowò má zùng râ nghut lhê. Haú yùq gi, mautsûng hkóhkam é gyè hpúng mó lé htim râ nghut mù, yhâng é gingtíng jowò má wàng râ nghut lhê; yhang gi, yhángmòq lé majan zan mù, wó ung pyám râ nghut lhê. 8 Yhang gi, yhángmòq é hparà pé lé le, nyhê yuì mù saî tô é yhángmòq é alhô zòng pé eq yhángmòq é hîng eq ngùn lé saî tô é hpaudap zèhkoq pé lé le, lú yû mù, Egutuq ming shut yu ló râ nghut lhê. Yhang gi, zànwut tsómra myáng shoq mautsûng hkóhkâm lé, gyè a zân é za nyhi to râ nghut lhê. 9 Haú hkûn, mautsûng mâ é hkóhkâm gi, maupyî mâ é hkóhkam é mîngdán lé gyè wó zân wàng râ nghut lhê; nghut kôlhang, yhang gi, yhâng é yhummau má taû ló râ nghut lhê. 10 Hau htâng, mautsûng mâ é hkóhkam é yhang zô pé gi, majan zan râ hên mù, gyè hpúng mó shuî tsîng to râ nghut luî, haú bang gi, a wó lhom hkûm zing é wuìwúm su, mîngdán má wang jàm mù, maupyî mâ é hkóhkam é gingtíng jowò jé shoq majan zân wàng kôrâ nghut lhê.
11 Haû mù, maupyî mâ é hkóhkâm gi, nhikjum mó yo luî, mautsûng mâ é hkóhkâm lé majan lhom zan râ nghut lhê. Mautsûng mâ é hkóhkâm gi, gyè hpúng mó shuî tsîng to kôlhang, maupyî hkóhkam èq yhang lé ung pyám râ nghut lhê. 12 Gyè hpúng mó haú lé wó chyup yu é hkûn, maupyî mâ é hkóhkâm gi, myìt myhâng nghutbun mù, gyèzo hkyîng mun lé sat pyám râ nghut lhê; nghut kôlhang, yhang gi, ûngmyuq hkyô lé wó myhik zing to râ a nghut. 13 Hkâsu mù gâ le, mautsûng mâ é hkóhkâm gi, hí lhê htoq myô é gótû gyè hpúng lé dum sîng râ nghut lhê; yhang gi, zànwut tsómra lai jáng, gyèhking hkúm hkúm bo é gyèzo ajùm ayò eq dum yán lé lô kôrâ nghut lhê.
14 Haú ayòq má, byù myo myo gi, maupyî mâ é hkóhkâm lé toq gumlau kôrâ nghut lhê. Shing-rán dang lé lhoqdìk râ matú, náng é byu pé mâ é byù jûm pé gi, gumlau toq kôlhang, gyè sûm byùq kôrâ nghut lhê. 15 Haú hkûn, mautsûng mâ é hkóhkâm gi, lé lô mù, zùmhtâng pé saí luî, gingtîng é wà mó lé zân ung yù râ nghut lhê. Haû maupyî mâ é gyè hpúng pé gi, lhom htuqhtíng râ a-tsam a bò mù, yhángmòq é je ge é gye hpúng lháng, majan lhom zan râ wum a bò kôrâ nghut lhê. 16 Maupyî mâ é hkóhkâm lé majan lé zân é sû gi, yhang kâm é su kut râ nghut mù, yhang lé lhom wó htuqhtîng é byù nyì râ a nghut. Yhang gi, Yúng é Maumyî má awang xuq to râ nghut mù, yhâng é lòq má haú lé wó lhoqhten wó lhoqhpyoq é a-tsam bò râ nghut lhê. 17 Yhang gi, yhâng é mîngdán gón mâ é wum-o a-tsam eq lé râ matú myìt hpyit yû mù, maupyî hkóhkam eq xoq tuî yù râ nghut lhê. Yhang gi, mîngdán haú lé tu mhuq pyám râ matú, maupyî hkóhkâm hpó lé byìzo rayùq byi tso râ nghut lhê; nghut kôlhang, yhang htung tô é hkyô wó dùt râ a nghut mù, yhâng é matú hai a-kyû bò râ a nghut. 18 Haû mù, yhang gi, wuimau yàm mau pé shut lhing ló mù, myo myo lé wó zân ung yù râ nghut lhê; nghut kôlhang, gyèzau hpó rayùq gi, yhang xânghpoq nge wó hkyô lhoqhpoî pyâm é lé lhoqhtûm pyám byi râ nghut mù, xânghpoq nge wó hkyô lé yhang lhoqhpoî pyâm é hkyô gi, yhâng chyáng taû jé râ nghut lhê. 19 Hau htâng má, yhang gi, yhâng é ming mâ é gingtíng jowò pé má taû ló râ nghut lhê; nghut kôlhang, yhang gi, htûng lèqbàt byùq râ nghut mù, yhang lé dum myàng râ a nghut lo.
20 Yhâng é hkô má zung é sû gi, mîngdán é hpung bô hkìkhkâm hkyô wó xoq jòq nyì râ matú, hkán hkyuî sû rayùq nhang htoq kat râ nghut lhê. Nghut kôlhang, hkóhkâm hpó haû gi, nhikjum yô é dông le a nghut, majan má le a nghut é za, a myáng má, lhoqhtûm pyâm é hui zo râ nghut lhê.
21 Haû mîngdán hkóhkâm xânghpoq nge wó wùt a nghut é, agè ashop é byù rayùq gi, yhâng é hkô má zùng râ nghut lhê. Yhang gi, nyì ngón yùqyò mù, abun aso nyi tô é mîngdán lé gyè ê zan luî, myìt goí myìt kup é dông mai haú lé wó zân ung yù râ nghut lhê. 22 Haú hkûn, ajùm ayò byíng zan tô é gyè hpúng mó gi, yhâng é hí mai lhoqhkyop pyâm é hui râ nghut lhê; dangshikaq tô tô é zau hpó lháng lhoqhtûm pyâm é hui zo râ nghut lhê. 23 Hkóhkâm hpó haû gi, danghtum htûm tô é htâng má, mhaú zo mhaú shuq hkyô kut râ nghut mù, byù shau kôlhang, wum-o a-tsam bò râ nghut lhê. 24 Yhang gi, mîngdán haú má sùtzè wó dik é bang ngón za myang nyi é su gâ nyi bùm kô é hkûn, yhángmòq lé gyè zan mù, yhâng é îwâ pé le, yhâng é îchyí îwâ pé le, a kut wú é hkyô lé wú ûngmyuq râ nghut lhê. Yhang gi, yhâng htâng châng é bang lé, wó lú yu é zè, wó sing yu é zè pé eq sùtzè pé tsing gàm byî ri. Yhang gi, gingtîng é jowò pé lé tu mhuq pyám râ matú, rayòq zo hpàqchyî htoq râ nghut lhê.
25 Hau htâng, yhang gi, maupyî mâ é hkóhkâm lé gyè zan râ matú, gyè hpúng mó èq wum-o lhoqkíng luî, myìt wum lhoqhtan yu ri. Maupyî mâ é hkóhkâm gi, gyèzo myô dik é eq wum htan dik é gyè hpúng èq yhang lé gyè lhom zan kôlhang, yhang lé lhom ûng râ a nghut. Hkâsu mù gâ le, ashop é dông hpàqchyî htoq é mai yhang lé gyè zan kôrâ nghut lhê. 26 Yhâng é zoshuq zo bang lháng, yhâng lé lhoqhten kôrâ nghut lhê; yhâng é gyèzô pé gi, lhoqhtûm pyâm é hui râ nghut mù, myo myo gi, majan má shi lèq byùq kôrâ nghut lhê. 27 Hkóhkâm haû í yùq gi, agè ashop é myìt chûng kômù, zangbó rabó má za rayùq eq rayùq mhaû lhum kôlhang, haú hkyô wó dùt râ a nghut; hkâsu mù gâ le, tû ge tô é ahkyíng má, haû htûm ló byùq râ nghut lhê. 28 Mautsûng mâ é hkóhkâm haû gi, sùtzè myo myo eq yhâng é mîngdán má taû ló râ nghut lhê; nghut kôlhang, yhang gi, chyoiyúng dangshikaq haú lé myìt mai a ngui byùq mù, myìt má bo é dông kut luî, yhâng é mîngdán má taû ló râ nghut lhê.
29 Yhang gi, tû ge tô é ahkyíng má, maupyî mau lé gyè dum zan râ nghut lhê; nghut kôlhang, shí dâm gi, hî dàm eq shai byùq râ nghut lhê. 30 Buìwàng hkyam wuimau yàm mau pé mâ é wuìsanghpo mâ é bang gi, yhang lé lhom htuqhtíng kôrâ nghut mù, yhang gi, myìt wum gyuî byùq râ nghut lhê. Haû mù, yhang gi, taû ló luî, haû chyoiyúng dangshikaq lé nhikmó-yô é mai myìt ô nau é dông kut pyám râ nghut lhê. Haú dông, yhang gi, taû lò mù, haû chyoiyúng dangshikaq lé tô pyâm é bang lé jeju byi râ nghut lhê.
31 Yhâng é gyè hpúng mó gi, toq mù, noqkuq yhûm mâ é gingtíng jowò lé agòt a-û kut pyám kôrâ nghut é htoq agó, nyí wuî nhông byî é myi nyhé hkungga lé hkûm pyám râ nghut mù, haû lhoqhten lhoqhpyoq é achaq achyut hkyô lé shap to kôrâ nghut lhê. 32 Yhang gi, haû dangshikaq lé lhoqhpyoq é bang lé, dang ngón dang nguî dông myìt htên byùq nhâng râ nghut lhê; nghut kôlhang, yhûmsing é Garai Gasang lé sê é bang gi, wum-o wó gingtíng mù, yhang lé htuqhtíng kôrâ nghut lhê.
33 Byu pé mâ é hpàqchyî bo é bang gi, byù myo myo lé mhoqshit kôrâ nghut lhê; nghut kôlhang, yhángmòq gi, ahkyíng tsómra myáng shoq, sham èq sat é, myî èq nyhê é, shúm zung é eq lú yu pyâm é hui zo kôrâ nghut lhê. 34 Yhángmòq shi lèq ló bum kô é hkûn, yhángmòq é matú, garúm hkyô ra-tsuí zo htoq râ nghut lhê; haû yhûmsing wuízàt nau é bang myo myo gi, yhángmòq lé xoq tuî yù kôrâ nghut lhê. 35 Ahkyíng ló htûm é hkûn jé shoq, byu pé, lhoq sansêng é, lhoq chyoiyúng é eq ra a bo é dùt râ matú, hpàqchyî bò bang ra-am gi, chyungxe sûm byùq kôrâ nghut lhê; hkâsu mù gâ le, haû gi, tû ge tô é ahkyíng má dùt htoq shirâ nghut lhê.
Yhûmsing Gùng Lé Wàq Toq É Hkóhkâm
36 Hkóhkâm haû gi, yhang ô nau é dông kut râ nghut mù, hparà pé bànshoq htoq má yhûmsing gùng lé wàq toq wàq myhâng luî, hparà pê é Garai Gasang lé htuqhtîng é maú nhô za gâ é dang taí râ nghut lhê. Yhang gi, nhikmó-yô é ahkyíng htáng shoq wó ûngmyuq nyî râ nghut lhê; hkâsu mù gâ le, myìt hpyit to bê é hkyô gi, dìk byùq ra râ nghut lhê. 37 Yhang gi, yhâng é îchyí îwâ pê é hparà pé lé le, myiwe wuì noqkuq nau é hparà lé le, hparà hká lé le, haî su a ngam é za, bànshoq bâng htoq má yhûmsing gùng lé wàq toq râ nghut lhê. 38 Hparà haú pê é malaî, yhang gi, gingtîng é jowò lé wú mâgum é hparà lé hkúngga râ nghut lhê; yhang gi, yhâng é îchyí îwâ pé a sê é hparà lé hkungga mù, hîng, ngùn, lungsêng eq hpaudap jung chyûnghuq pé nhông byi râ nghut lhê. 39 Yhang gi, maigan hparà pé garúm yu é èq, a-tsam mó bo é gingtíng jowò lé gyè zan râ nghut mù, yhang lé sê hkyang é bang lé gyai yhang hkúngga râ nghut lhê. Yhang gi, haú bang lé, byù myo myo lé ùp râ wò byi mù, shigyaú chyûnghuq dông maumyî tsing gàm byi râ nghut lhê.
40 Ahkyíng ayòq haû ló htáng râ nghut é u, maupyî mâ é hkóhkâm gi, yhang lé majan zan râ nghut lhê; haú hkûn, mautsûng mâ é hkóhkâm gi, gyèlhêng, gyè myang eq wuìsanghpo myo myô èq, laìdun mó sû yán htoq lô kôrâ nghut lhê; yhang gi, mîngdán myo myo lé gyè zan râ nghut mù, byu pé lé wuìwúm su hkyut ló râ nghut lhê. 41 Yhang gi, Yúng é Maumyî lé le gyè zan râ nghut lhê. Mîngdán myo myo gi, gyòp gyó byùq râ nghut lhê; nghut kôlhang, Edom mau, Moba mau eq Ammon mau mâ é ushuq pé gi, yhâng é lòq mai hkyi xe yu é hui kôrâ nghut lhê. 42 Yhang gi, yhâng é ahko ahkáng lé, mîngdán myo myo má chung jé râ nghut lhê; Egutuq ming gi, wó hpang lùt râ a nghut. 43 Yhang gi, Egutuq ming má hkong tô é sùtzè bànshoq eq hîng ngùn zè lé wó yù râ nghut mù, Libya byu pé eq Hkusha byu pé gi, yhâng é lòqhkaû má nyi byùq kôrâ nghut lhê. 44 Nghut kôlhang, yhang gi, buìhtoq hkyam eq mautsûng hkyam mâ é hkyang lu é yánmai, myìt myô byùq râ nghut mù, byù myo myo lé lhoqhtên pyám é eq sat pyám râ matú, nhikmó-yô é èq htoq e ló râ nghut lhê. 45 Yhang gi, wuìshuq lung-aû eq yúng é chyoiyúng bùm gyoro má, yhâng é hkóhkâm zúm pé saí râ nghut lhê. Nghut kôlhang, yhang lé garúm râ byù a nyi é nghut mù, yhang gi, htûm byùq râ nghut lhê.